ଇସଲାମବାଦ,୨୨।୯: ଭାରତ ଓ କାନାଡା ମଧ୍ୟରେ କୂଟନୈତିକ ବିବାଦ ଜାରି ରହିଛି। ଏହାରି ଭିତରେ ଭାରତ କାନାଡାବାସୀଙ୍କ ପାଇଁ ଭିସା ସେବା ବନ୍ଦ କରିଛି। ତେବେ ଏହି ତିକ୍ତତା ମଧ୍ୟରେ ପାକିସ୍ତାନର ଗୁଇନ୍ଦା ଏଜେନ୍ସି ଆଇଏସଆଇର ଲିଙ୍କ୍ ଥିବର ସୂଚନା ମିଳିଛି। ଏକ ଜାତୀୟ ଗଣମାଧ୍ୟମର ସୂଚନା ଅନୁଯାୟୀ, କାନାଡାର ଖଲିସ୍ତାନୀ ଗୋଷ୍ଠୀ ଓ ଆଇଏସଆଇ ମଧ୍ୟରେ ସମ୍ପର୍କ ଥିବା ସ୍ପଷ୍ଟ ହୋଇଛି।
ତେବେ ଏହି ବିବାଦ ମଧ୍ୟରେ ପାକିସ୍ତାନ ଏକ ବିବୃତ୍ତି ଜାରି କରି କହିଛି ଯେ ସେ ଭାରତ ଓ କାନାଡାର ବିବାଦର ଗତିବିଧି ଉପରେ ନଜର ରଖିଛି। ପାକିସ୍ତାନର ବୈଦେଶିକ ସଚିବ ସାଇରସ କାଜି କହିଛନ୍ତି ଯେ, ଭାରତ ବିରୋଧରେ କାନାଡାର ଅଭିଯୋଗକୁ ନେଇ ଇସଲାମାବାଦ ଜମାରୁ ଆଶ୍ଚର୍ଯ୍ୟ ହୋଇ ନାହିଁ। ସେହିପରି ଆମେରିକା ଏହି ବିବାଦକୁ ଉଭୟ ଦେଶ ଧ୍ୟାନର ସହ ସମାଧାନ କରିବା ଆବଶ୍ୟକ ବୋଲି କହିଛି।
ଇଣ୍ଡିଆନ ଇଣ୍ଟେଲିଜେନ୍ସର ସୂଚନା ଆଧାରରେ ଅନେକ ଜାତୀୟ ଗଣମାଧ୍ୟମ ରିପୋର୍ଟ କାନାଡାର ଖାଲିସ୍ତାନୀ ଆନ୍ଦୋଳନ ସହ ଜଡିତ ଲୋକମାନେ ଭାନକୋଭରରେ ପାକିସ୍ତାନର ଆଇଏସଆଇଠାରୁ ଅର୍ଥ ଗ୍ରହଣ କରୁଥିବା କହିଛନ୍ତି।
ଆଉଟଲୁକର ଏକ ରିପୋର୍ଟ ଅନୁଯାୟୀ, ପାଞ୍ଚ ଦିନ ପୂର୍ବେ ଆଇଏସଆଇ ଏଜେଣ୍ଟମାନେ କାନାଡାର ଭାନକୋଭରରେ ଅନେକ ଖଲିସ୍ତାନୀ ଦଳର ନେତାଙ୍କୁ ଭେଟିଥିଲେ। ଏହାକୁ ଏକ ସିକ୍ରେଟ ମିଟିଂ ବୋଲି କୁହାଯାଇଥିଲା। ଶିଖ୍ ଫର ଜଷ୍ଟିସ ମୁଖ୍ୟ ଗୁରୁପନ୍ତ ସିଂ ପନ୍ନୁଙ୍କ ବ୍ୟତୀତ ଅନେକ ଖଲିସ୍ତାନୀ ଦଳର ନେତାମାନେ ଏହି ସଭାରେ ଯୋଗ ଦେଇଥିଲେ।
