ନୂଆଦିଲ୍ଲୀ,୧୦।୫: ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି। ଏବେ ପାକିସ୍ତାନ ସେନା ସିଧାସଳଖ ଯୁଦ୍ଧ ଘୋଷଣା କରିଛି। ଅଲ ଜାଜିରା ଅନୁଯାୟୀ, ପାକିସ୍ତାନୀ ସେନା କହିଛି ଯେ ‘ଆମେ ଭାରତ ସହିତ ଯୁଦ୍ଧ ସ୍ଥିତିରେ ଅଛୁ।’ ଏହି ବୟାନ ଏପରି ଏକ ସମୟରେ ଆସିଛି ଯେତେବେଳେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ ପୂର୍ବରୁ କହିସାରିଛନ୍ତି ଯେ ଭାରତ ସହିତ ଯୁଦ୍ଧ ଏବେ ନିଶ୍ଚିତ। କାରଣ ସେମାନଙ୍କ ପାଖରେ ଅନ୍ୟ କୌଣସି ବିକଳ୍ପ ନାହିଁ। ଯଦିଓ ସରକାରଙ୍କ ପକ୍ଷରୁ ଯୁଦ୍ଧ ଘୋଷଣା କରାଯାଏ, ହେଲେ ପାକିସ୍ତାନର ସରକାର ବୋଲି ନିଜକୁ ଭାବୁଥିବା ପାକିସ୍ତାନୀ ସେନା ଆଗରେ ଶେହବାଜ ସରିଫ କେତେ ନ୍ୟୁନ ତାହା ସ୍ପଷ୍ଟ କରୁଛି।
ଖ୍ବାଜା ଆସିଫ ଏକ ଟିଭି ସାକ୍ଷାତକାରରେ କହିଛନ୍ତି ଯେ ଭାରତ ସୀମାରେ ଲଗାତାର ଉତ୍ତେଜନାମୂଳକ କାର୍ଯ୍ୟ ଜାରି ରଖିଛି। ପାକିସ୍ତାନ ଏବେ ଏହାର ଜବାବ ଦେବାକୁ ବାଧ୍ୟ ହେବ। ଏହି ବିବୃତ୍ତି ନିଜେ କହୁଛି ଯେ ପାକିସ୍ତାନ ଏପରି ଏକ ଦେଶ ଯେଉଁଠାରେ ସରକାର ସେନାର କବ୍ଜାରେ ରହିଛି। ସେନା ଯେପରି ନଚାଉଛି, ସରକାର ସେହିପରି ନାଚୁଛି। ଆଜି ବିଶ୍ୱ ଏହାର ଉଦାହରଣ ଦେଖିଛି।
ସଂସଦରେ ଖ୍ବାଜା ଆସିଫ ଦାବି କରିଛନ୍ତି ଯେ ଅନ୍ତର୍ଜାତୀୟ ମଞ୍ଚରେ ପାକିସ୍ତାନର ସ୍ବର ଶୁଣାଯାଉଛି । କୌଣସି ଦେଶ ଖୋଲାଖୋଲି ଭାବରେ ଭାରତକୁ ସମର୍ଥନ କରୁନାହିଁ। ଆମେରିକା ଭଳି ଶକ୍ତିଶାଳୀ ଦେଶ ଏହାକୁ ଅନେକ ଥର ଭର୍ତ୍ସନା କରିଛନ୍ତି। ଗୁରୁବାର ଦିନ, ଆମେରିକାର ବୈଦେଶିକ ମନ୍ତ୍ରୀ ପାକିସ୍ତାନୀ ପ୍ରଧାନମନ୍ତ୍ରୀଙ୍କୁ ଭର୍ତ୍ସନା କରିଥିଲେ। ସେହି ସମୟରେ, ଆଜି ପୁଣି ଥରେ ଆମେରିକା ପାକିସ୍ତାନ ସରକାରଙ୍କୁ କଡ଼ା ସମାଲୋଚନା କରିଛି। ସେ ଭାରତ ଏବଂ ପାକିସ୍ତାନ ମଧ୍ୟରେ କୌଣସି ପ୍ରକାରର ମଧ୍ୟସ୍ଥତାକୁ ମଧ୍ୟ ମନା କରିଦେଇଛନ୍ତି।
