ଇସଲାମାବାଦ,୧।୧୧: ବିମାନରୁ ଓହ୍ଲାଇବା ସମୟରେ ପାକିସ୍ତାନ ରାଷ୍ଟ୍ରପତି ଆସିଫ ଅଲି ଜରଦାରୀ ତଳେ ପଡି ଯାଇଥିଲେ ଫଳରେ ତାଙ୍କ ଗୋଡ ଭାଙ୍ଗି ଯାଇଥିବା ସୂଚନା ମିଳିଛି। ବୁଧବାର ରାତିରେ ଏହି ଘଟଣା ଘଟିଛି। ଦୁବାଇ ଅନ୍ତର୍ଜାତୀୟ ବିମାନବନ୍ଦରରେ ଜରଦାରୀ ଆହତ ହୋଇଥିଲେ।
ଗୁରୁବାର ରାତିରେ ପାକିସ୍ତାନର ରାଷ୍ଟ୍ରପତିଙ୍କ କାର୍ଯ୍ୟାଳୟ ଏହା ନିଶ୍ଚିତ କରିଛି। ରାଷ୍ଟ୍ରପତିଙ୍କ କାର୍ଯ୍ୟାଳୟ ସୂତ୍ରରୁ ପ୍ରକାଶ ଯେ ବିମାନ ଅବତରଣ ପରେ ତାଙ୍କୁ ଡାକ୍ତରଖାନା ନିଆଯାଇଥିଲା। ପରୀକ୍ଷା ପରେ ଡାକ୍ତରମାନେ ତାଙ୍କ ଗୋଡରେ ପ୍ଲାଷ୍ଟର ଲଗାଇଛନ୍ତି। ଡାକ୍ତରଙ୍କ କହିବାନୁସାରେ, ପ୍ଲାଷ୍ଟର ଏକ ମାସ ପାଇଁ ରହିବ । ତଥାପି, ସେ ବିପଦମୁକ୍ତ ଅଛନ୍ତି।
ପ୍ଲାଷ୍ଟର ଲଗାଇବା ପରେ ଡାକ୍ତରମାନେ ରାଷ୍ଟ୍ରପତି ଆସିଫ ଅଲି ଜରଦାରୀଙ୍କୁ ଘରକୁ ପଠାଇଛନ୍ତି। ତାଙ୍କୁ ସମ୍ପୂର୍ଣ୍ଣ ବିଶ୍ରାମ ନେବାକୁ ମଧ୍ୟ ପରାମର୍ଶ ଦିଆଯାଇଛି। ପାକିସ୍ତାନୀ ଖବରକାଗଜ ଡନ ଅନୁଯାୟୀ ଆସିଫ ଅଲି ଜରଦାରୀଙ୍କୁ ପୂର୍ବରୁ ମଧ୍ୟ ଅନେକ ସ୍ବାସ୍ଥ୍ୟ ସମସ୍ୟାର ସମ୍ମୁଖୀନ ହେବାକୁ ପଡିଥିଲା। ଗତ ବର୍ଷ ମାର୍ଚ୍ଚରେ ସେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ରେ ମଧ୍ୟ ତାଙ୍କର ଗୋଟିଏ ଚକ୍ଷୁ ଅସ୍ତ୍ରୋପଚାର କରିଥିଲେ।
୨୦୨୨ରେ, ସେ ଏକ ସପ୍ତାହ ପାଇଁ କରାଚିର ଡକ୍ଟର ଜିଆଉଦ୍ଦିନ ହସ୍ପିଟାଲରେ ଭର୍ତ୍ତି ହୋଇଥିଲେ। ସେତେବେଳେ ସେ ଛାତି ସଂକ୍ରମଣରେ ପୀଡିତ ଥିଲେ। ତେବେ ଜରଦାରୀଙ୍କ ବ୍ୟକ୍ତିଗତ ଡାକ୍ତର ତଥା ଘନିଷ୍ଠ ବନ୍ଧୁ ଡକ୍ତେର ଅସୀମ ହୁସେନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି ଯେ ରାଷ୍ଟ୍ରପତିଙ୍କ ସ୍ବାସ୍ଥ୍ୟ ଭଲ ଅଛି। ପିପିପି ଅଧ୍ୟକ୍ଷ ବିଲାୱଲ ଭୁଟ୍ଟୋ ଆସିଫ ଅଲି ଜରଦାରୀଙ୍କ ପୁଅ।
