ଇସଲାମାବାଦ,୩୧।୫: ସମସ୍ତେ ଜାଣନ୍ତି ଯେ ପାକିସ୍ତାନରେ ଆତଙ୍କବାଦୀମାନେ ବଢୁଛନ୍ତି। କିନ୍ତୁ, ଅପରେଶନ ସିନ୍ଦୁର ସମୟରେ ସାରା ବିଶ୍ୱରୁ ଉପହାସ ପରେ ମଧ୍ୟ ପାକିସ୍ତାନ ପଛକୁ ହଟି ନାହଁି। ପୁଣି ଥରେ ପାକିସ୍ତାନ ସରକାରଙ୍କ ସହିତ ଆତଙ୍କବାଦୀଙ୍କ ସମ୍ପର୍କର ପର୍ଦ୍ଦାଫାଶ ହୋଇଛି।
ମେ ୨୮ ତାରିଖରେ, ପରମାଣୁ ପରୀକ୍ଷଣର ବାର୍ଷିକୀରେ ପାକିସ୍ତାନର ପଞ୍ଜାବ ପ୍ରଦେଶର କସୁର ଜିଲାରେ ଏକ ରାଲି ଆୟୋଜନ କରାଯାଇଥିଲା। ଏହାକୁ ୟୁମ-ଏ-ତକବୀର କୁହାଯାଏ। ଏହି ରାଲି ସହିତ ଜଡିତ ଏକ ଫଟୋ ସାମ୍ନାକୁ ଆସିଛି, ଯେଉଁଥିରେ ପାକିସ୍ତାନ ସରକାରଙ୍କ ମନ୍ତ୍ରୀମାନେ ଆତଙ୍କବାଦୀଙ୍କ ସହିତ ମଞ୍ଚ ଶେୟାର କରୁଥିବାର ଦେଖାଯାଉଛି।
ସୋସିଆଲ ମିଡିଆରେ ଭାଇରାଲ ହେଉଥିବା ଫଟୋ ଏବଂ ଭିଡିଓରେ ପାକିସ୍ତାନ ସରକାରଙ୍କ ଖାଦ୍ୟ ମନ୍ତ୍ରୀ ମାଲିକ ରସିଦ ଅହମ୍ମଦ ଖାନ ଏବଂ ପଞ୍ଜାବ ବିଧାନସଭା ବାଚସ୍ପତି ମାଲିକ ମହମ୍ମଦ ଅହମ୍ମଦ ଖାନଙ୍କୁ ଦେଖାଯାଉଛି।
ଏହି ଦୁଇ ମନ୍ତ୍ରୀଙ୍କ ସହିତ ଲସ୍କର-ଏ-ତୋଇବା (ଏଲଇଟି) ଆତଙ୍କବାଦୀ ସୈଫୁଲ୍ଲା କସୁରୀ, ତଲହା ସଇଦ ଏବଂ ଆମିର ହମଜା ମଧ୍ୟ ଦେଖାଯାଉଛି। ତଲହା ସଇଦ ହେଉଛନ୍ତି ଲସ୍କର ପ୍ରତିଷ୍ଠାତା ହାଫିଜ ସଇଦର ପୁଅ। ଏହି ଲୋକମାନେ ଭାରତ ବିରୁଦ୍ଧରେ ବିଷ ଓଗାଳି ଚାଲିଛନ୍ତି।
ଏହି ସମୟରେ, ଶହବାଜଙ୍କ ମନ୍ତ୍ରୀମାନେ ଆତଙ୍କବାଦୀଙ୍କୁ ସ୍ବାଗତ କରିଥିଲେ ଏବଂ ସେମାନଙ୍କୁ ଆଲିଙ୍ଗନ କରିଥିଲେ। କେବଳ ଏତିକି ନୁହେଁ, ସେମାନେ ସେମାନଙ୍କ ପ୍ରଶଂସାରେ ଭାଷଣ ମଧ୍ୟ ଦେଇଥିଲେ। ଏହି ସମୟରେ ମାଲିକ ରସିଦ କହିଥିଲେ ଯେ ୨୪ କୋଟି ପାକିସ୍ତାନୀ ହାଫିଜ ସଇଦ ଏବଂ ସୈଫୁଲ୍ଲା କସୁରୀ ଭଳି ଲୋକଙ୍କୁ ସମର୍ଥନ କରନ୍ତି।
ଶାହବାଜଙ୍କ ମନ୍ତ୍ରୀ ମଧ୍ୟ ତାଙ୍କ ଦେଶର ଆତଙ୍କବାଦୀଙ୍କୁ ହିରୋ ବୋଲି କହିଥିଲେ ଏବଂ ପାକିସ୍ତାନ ସରକାର ମୁଦାସିରଙ୍କ ଭାଇକୁ ଚାକିରି ଦେବେ ବୋଲି ଘୋଷଣା କରିଥିଲେ। ମୁଦାସିର ଜଣେ ଲସ୍କର କମାଣ୍ଡର ଥିଲେ ଏବଂ ଅପରେଶନ ସିନ୍ଦୁର ସମୟରେ ତାଙ୍କୁ ହତ୍ୟା କରାଯାଇଥିଲା।
ଏହି ରାଲି ସହିତ ଜଡିତ ଭିଡିଓ ଏବଂ ଫଟୋ ଏବେ ସାରା ବିଶ୍ୱରେ ବ୍ୟାପି ଯାଇଛି ଏବଂ ବିଶେଷଜ୍ଞମାନେ ଏହାକୁ ପାକିସ୍ତାନ ଏବଂ ଆତଙ୍କବାଦୀଙ୍କ ମଧ୍ୟରେ ସମ୍ପର୍କର ପ୍ରମାଣ ବୋଲି କହୁଛନ୍ତି। ତଥାପି, ରାଲିର ଶେଷରେ ସୁରକ୍ଷା କର୍ମୀମାନେ ଗଣମାଧ୍ୟମକୁ ରେକର୍ଡିଂ ବନ୍ଦ କରିବାକୁ ଇଙ୍ଗିତ ଦେଇଥିଲେ, କିନ୍ତୁ ସେତେବେଳକୁ ବହୁତ ଡେରି ହୋଇଯାଇଥିଲା।
ଏହା ଦର୍ଶାଉଛି ଯେ ପାକିସ୍ତାନ ତାର ଆତଙ୍କବାଦୀ ସଂଯୋଗକୁ ଲୁଚାଇବାକୁ ଚାହୁଁଛି, କିନ୍ତୁ ତାହା କରିପାରିଲା ନାହିଁ। ଭାରତ ବହୁ ଦିନ ଧରି କହିଆସୁଛି ଯେ ପାକିସ୍ତାନ ଆତଙ୍କବାଦୀଙ୍କୁ ସୁରକ୍ଷା ଦେଉଛି।
