ଆବୁଧାବି,୧୩।୯: ଏସିଆ କପ ୨୦୨୫ର ଉତ୍ସାହ ନିରନ୍ତର ବୃଦ୍ଧି ପାଉଛି। ଶୁକ୍ରବାର ଖେଳାଯାଇଥିବା ଗ୍ରୁପ ଏ ମ୍ୟାଚ୍ରେ ପାକିସ୍ତାନ ଓମାନକୁ ୯୩ ରନ୍ରେ ପରାସ୍ତ କରି ଟୁର୍ନାମେଣ୍ଟରେ ଏକ ଭଲ ଆରମ୍ଭ କରିଛି। ଏହି ବିଜୟ ପାକିସ୍ତାନୀ ଦଳର ଆତ୍ମବିଶ୍ୱାସକୁ ଦ୍ୱିଗୁଣିତ କରିଥିବା ବେଳେ, ଅଧିନାୟକ ସଲମାନ ଅଲି ଆଗାଙ୍କ ମନୋଭାବ ମଧ୍ୟ ଦେଖିବା ଯୋଗ୍ୟ ଥିଲା। ସେ ମ୍ୟାଚ ପରେ କହିଥିଲେ, ଯଦି ତାଙ୍କ ଦଳ ଏପରି ଖେଳିବାକୁ ଜାରି ରଖେ, ତେବେ ସେମାନେ ଯେକୌଣସି ଦଳକୁ ପରାସ୍ତ କରିପାରିବେ।
ଓମାନ ବିପକ୍ଷରେ ବିଜୟ ପରେ, ଅଧିନାୟକ ସଲମାନ ଅଲି ଆଗା ଦଳର ପ୍ରଦର୍ଶନ ଉପରେ ଖୁସି ପ୍ରକାଶ କରିଥିଲେ। କିନ୍ତୁ ଉନ୍ନତିର ଆବଶ୍ୟକତା ମଧ୍ୟ ଦର୍ଶାଇଥିଲେ। ସେ କହିଥିଲେ,ବୋଲିଂ ୟୁନିଟ ଉତ୍କୃଷ୍ଟ ଥିଲା, ମୁଁ ସେମାନଙ୍କ ଉପରେ ବହୁତ ଖୁସି। ଆମର ତିନି ପ୍ରକାରର ସ୍ପିନର ଅଛନ୍ତି ଏବଂ ଏହା ଆମର ଶକ୍ତି। ଏହା ଦୁବାଇ ଏବଂ ଆବୁଧାବିର ପିଚ୍ରେ ବହୁତ ଉପଯୋଗୀ ହେବ। ବ୍ୟାଟିଂରେ ଉନ୍ନତିର ସୁଯୋଗ ଅଛି କିନ୍ତୁ ଯଦି ଆମେ ଆମର ଯୋଜନାରେ ଅଟଳ ରହିଥାଉ, ତେବେ ଆମେ ଯେକୌଣସି ଦଳକୁ ପରାସ୍ତ କରିପାରିବୁ।
ଏହାପୂର୍ବରୁ ସେ ଅଧିନାୟକଙ୍କ ସାମ୍ବାଦିକ ସମ୍ମିଳନୀରେ କହିଥିଲେ, ଯଦି ଟିମ ଇଣ୍ଡିଆ ଆକ୍ରମଣାତ୍ମକ ପ୍ରଦର୍ଶନ କରିବାକୁ ଚାହେଁ, ତେବେ ତାଙ୍କ ଦଳ ମଧ୍ୟ ଆକ୍ରମଣାତ୍ମକ ମନୋଭାବରେ ଭାରତକୁ ସ୍ବାଗତ କରିବ।
ପାକିସ୍ତାନର ପରବର୍ତ୍ତୀ ମୁକାବିଲା ଏବେ ସେପ୍ଟେମ୍ବର ୧୪ରେ ଦୁବାଇରେ ଭାରତ ସହିତ ହେବ। ଏହି ମ୍ୟାଚକୁ ଟୁର୍ନାମେଣ୍ଟର ସବୁଠାରୁ ହାଇ-ଭୋଲଟେଜ ମ୍ୟାଚ ବୋଲି ବିବେଚନା କରାଯାଉଛି। ପାକିସ୍ତାନର ବିଜୟ ନିଶ୍ଚିତ ଭାବରେ ଦଳର ଆତ୍ମବିଶ୍ୱାସକୁ ବୃଦ୍ଧି କରିଛି, କିନ୍ତୁ ପ୍ରକୃତ ପରୀକ୍ଷା ଭାରତ ଭଳି ଶକ୍ତିଶାଳୀ ଦଳ ବିପକ୍ଷରେ ହେବ।
