ନୂଆଦିଲ୍ଲୀ,୧୫।୫: ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିବୃତ୍ତିରେ ପାକିସ୍ତାନ ଦୃଢ ଆପତ୍ତି ଉଠାଇଛି। ନିକଟରେ ମୋଦି କହିଥିଲେ, ଆମେ ପାକିସ୍ତାନକୁ ଚୁଡ଼ି ପିନ୍ଧାଇବୁ। ପାକିସ୍ତାନର ବୈଦେଶିକ ମନ୍ତ୍ରଣାଳୟ କହିଛି, ନିର୍ବାଚନ ରାଲିରେ ଭାରତୀୟ ରାଜନେତାମାନେ ପାକିସ୍ତାନକୁ ଟାଣିବାଠାରୁ ଦୂରେଇ ରହିବା ଉଚିତ। ନିର୍ବାଚନରେ ଲାଭ ପାଇବା ପାଇଁ ଜାତୀୟ ନେତାମାନେ ଜାତୀୟତାବାଦୀ ଭାବନାକୁ ଉତ୍ସାହିତ କରିବା ପାଇଁ କାର୍ଯ୍ୟ କରୁଛନ୍ତି। ଏଭଳି ପରିସ୍ଥିତିରେ ଭାରତର ଲୋକଙ୍କ ମଧ୍ୟରେ ପାକିସ୍ତାନ ବିରୋଧୀ ଭାବନା ସୃଷ୍ଟି ହେଉଛି। ଏହା ନିର୍ବାଚନ ରଣନୀତିର ଏକ ଅଂଶ କିନ୍ତୁ ଏହି ପଦ୍ଧତି ଦୁଇ ଦେଶ ମଧ୍ୟରେ ସମ୍ପର୍କ ପାଇଁ କ୍ଷତିକାରକ।
ପାକିସ୍ତାନର ବୈଦେଶିକ ମନ୍ତ୍ରଣାଳୟ କହିଛି, ଘରୋଇ ନିର୍ବାଚନରେ ଲାଭ ପାଇବା ପାଇଁ ଭାରତୀୟ ନେତାମାନେ ପାକିସ୍ତାନକୁ ଟାଣିବା ବନ୍ଦ କରିବା ଉଚିତ୍। ସମ୍ବେଦନଶୀଳ ଏବଂ ରଣନୈତିକ ପ୍ରସଙ୍ଗରେ ଆମେ ସତର୍କତା ପାଇଁ ନିବେଦନ କରୁଛୁ। ଆମେ ମଧ୍ୟ ଅନ୍ତର୍ଜାତୀୟ ନେତୃତ୍ୱକୁ ଏହି ପ୍ରସଙ୍ଗରେ ହସ୍ତକ୍ଷେପ କରିବାକୁ ଅନୁରୋଧ କରୁଛୁ କାରଣ ଏହା ଆଞ୍ଚଳିକ ଶାନ୍ତି ଏବଂ ସ୍ଥିରତା ପାଇଁ ଏକ ଗୁରୁତର ବିପଦ।
ପାକିସ୍ତାନୀ ବୈଦେଶିକ ମନ୍ତ୍ରଣାଳୟ କହିଛି, ନିର୍ବାଚନ ପ୍ରଚାର ସମୟରେ ଭାରତୀୟ ନେତାଙ୍କ ବାରମ୍ବାର ପାକିସ୍ତାନ ବିରୋଧୀ ବିବୃତ୍ତି ଭାରତର ଉଗ୍ରବାଦୀ ମାନସିକତାକୁ ପ୍ରତିଫଳିତ କରୁଛି। ଏଭଳି ବାକ୍ୟ ଭାରତୀୟ ନେତାଙ୍କ ଅହଂକାରକୁ ପ୍ରତିଫଳିତ କରେ।
ନିକଟରେ କଶ୍ମୀରର ନେତା ଫାରୁକ ଅବଦୁଲ୍ଲା କହିଥିଲେ ଯେ, ପାକିସ୍ତାନରୁ ପିଓକେ ଫେରାଇବା ଏତେ ସହଜ ନୁହେଁ। ପାକିସ୍ତାନ ପରମାଣୁ ଦେଶ ଏବଂ ସେ ଚୁଡିପିନ୍ଧି ବସି ନାହାଁନ୍ତି। ବିହାରର ମୁଜାଫରପୁରରେ ଏକ ରାଲିରେ ପ୍ରଧାନମନ୍ତ୍ରୀ ମୋଦି ବିବୃତ୍ତି ଦେଇ କହିଛନ୍ତି, ହଁ ସେମାନେ ଚୁଡି ପିନ୍ଧୁ ନାହାଁନ୍ତି ତେବେ ଆମେ ସେମାନଙ୍କୁ ପିନ୍ଧାଇଦେବା।
