ନୂଆଦିଲ୍ଲୀ, ୧୩।୧୨(ପି.ଟି.): କରୋନା ମହାମାରୀ ଜନିତ ଲକ୍ଡାଉନ ଯୋଗୁ ଖବରକାଗଜ ଶିଳ୍ପ ଗତ ୮ ମାସରେ ପ୍ରାୟ ୧୨,୫୦୦ କୋଟି ଟଙ୍କା କ୍ଷତି ସହି ଅଭୂତପୂର୍ବ ଆର୍ଥତ୍କ ସଙ୍କଟ ଦେଇ ଗତି କରୁଛି। ଏହି ସଙ୍କଟରୁ ଖବରକାଗଜ ଶିଳ୍ପକୁ ମୁକୁଳାଇବାକୁ ସରକାର ସହାୟତା ପ୍ୟାକେଜ ଘୋଷଣା କରନ୍ତୁ ବୋଲି ଇଣ୍ଡିଆନ୍ ନ୍ୟୁଜ୍ପେପର ସୋସାଇଟି (ଆଇଏନ୍ଏସ୍) ଅନୁରୋଧ କରିଛି।
ନ୍ୟୁଜ୍ପ୍ରିଣ୍ଟ, ଜିଏନ୍ପି ଏବଂ ଏଲ୍ଡବ୍ଲ୍ୟୁସି କାଗଜ ଉପରୁ ଅବଶିଷ୍ଟ ୫ ପ୍ରତିଶତ ସୀମା ଶୁଳ୍କ ଛାଡ଼ କରିବା, ଦୁଇବର୍ଷ ଟିକସ ଅବକାଶ ଦେବା, ସରକାରୀ ବିଜ୍ଞାପନ ମୂଲ୍ୟ ୫୦ ପ୍ରତିଶତ ବଢ଼ାଇବା, ଛାପା ଗଣମାଧ୍ୟମରେ ସରକାରୀ ଖର୍ଚ୍ଚ ୨୦୦ ପ୍ରତିଶତ ବୃଦ୍ଧି କରିବା ଏବଂ ବକେୟା ବିଜ୍ଞାପନ ଦେୟ ତୁରନ୍ତ ପୈଠ କରିବା ପାଇଁ ଆଇଏନ୍ଏସ୍ ସରକାରଙ୍କୁ ଅନୁରୋଧ କରିଛି।
ଅସୁବିଧା ସମୟରେ ଭାରତୀୟ ଖବରକାଗଜ ଶିଳ୍ପ ଯାଞ୍ଚ୍ ହୋଇଥିବା ଓ ତଥ୍ୟପୂର୍ଣ୍ଣ ଖବର ପରିବେଷଣ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଛି, ଯାହାକି ସୁପ୍ରିମକୋର୍ଟ ଓ ଅନ୍ୟାନ୍ୟ ସଂସ୍ଥା ସ୍ବୀକାର କରିଛନ୍ତି। ତେବେ ମହାମାରୀ ଯୋଗୁ ବିଜ୍ଞାପନ ଏବଂ ଖବରକାଗଜ ପ୍ରସାରଣ ଗୁରୁତର ପ୍ରଭାବିତ ହୋଇଛି। ସେଥିପାଇଁ ଅନେକ ଖବରକାଗଜ ପ୍ରକାଶନ ବନ୍ଦ କରିଦେଇଛନ୍ତି କିମ୍ବା ସଂସ୍କରଣକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖିଛନ୍ତି। ଏହି ସ୍ଥିତି ଜାରି ରହିଲେ ଆହୁରି ଅନେକ ଖବରକାଗଜ ନିକଟ ଭବିଷ୍ୟତରେ ବନ୍ଦ ହୋଇଯିବେ। ଉକ୍ତ ଶିଳ୍ପକୁ ସହାୟତାର ଜରୁରୀ ଆବଶ୍ୟକତା ଥିବା ଆଇଏନ୍ଏସ୍ କିଛି ମାସ ହେଲା କହିଆସୁଛି ବୋଲି ଏହାର ଅଧ୍ୟକ୍ଷ ଏଲ୍. ଆଡିମୁଲମ୍ କହିଛନ୍ତି।
୮ ମାସରେ ଖବରକାଗଜ ଶିଳ୍ପ ୧୨,୫୦୦ କୋଟି ଟଙ୍କା କ୍ଷତି ସହିଥିବାବେଳେ ବର୍ଷକରେ ପ୍ରାୟ ୧୬,୦୦୦ କୋଟି କ୍ଷତିର ସମ୍ମୁଖୀନ ହେବ ବୋଲି ଆକଳନ କରାଯାଇଛି। ବିଶ୍ୱର ସର୍ବବୃହତ୍ ଗଣତନ୍ତ୍ରର ଚତୁର୍ଥ ସ୍ତମ୍ଭରେ ଏଭଳି ସଙ୍କଟ ଯୋଗୁ ଖବରକାଗଜ ସହ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡ଼ିତ ୩୦ ଲକ୍ଷ କର୍ମଚାରୀ ପ୍ରଭାବିତ ହୋଇଛନ୍ତି। ଏହାର ପ୍ରଭାବ କର୍ମଚାରୀଙ୍କ ପରିବାର ସମେତ ଆନୁଷଙ୍ଗିକ ଶିଳ୍ପ ଯଥା ପ୍ରିଣ୍ଟିଂ ପ୍ରେସ୍ ଓ ଯୋଗାଣ ଶୃଙ୍ଖଳ ଉପରେ ମଧ୍ୟ ପଡ଼ିଛି। ସଙ୍କଟରୁ ମୁକୁଳିବା ଲାଗି ସମୁଦାୟ ଶିଳ୍ପ ଯଥାସାଧ୍ୟ ଉଦ୍ୟମ ଜାରି ରଖିଥିବାବେଳେ ସରକାରୀ ସହାୟତାର ଆବଶ୍ୟକତା ଜରୁରୀ ହୋଇପଡ଼ିଛି।
