ନୂଆଦିଲ୍ଲୀ,୮ା୨: ଯଦି ଆପଣ ଏକ ପୁରୁଣା ଆଣ୍ଡ୍ରଏଡ୍ ସ୍ମାର୍ଟଫୋନ୍ ବ୍ୟବହାର କରୁଛନ୍ତି, ତେବେ ସାବଧାନ ହୋଇଯାଆନ୍ତୁ। ଗୁଗଲ ରିପୋର୍ଟ ଅନୁଯାୟୀ, ବିଶ୍ୱର ପ୍ରାୟ ୧୦୦ କୋଟିରୁ ଅଧିକ ଆଣ୍ଡ୍ରଏଡ୍ ଫୋନ୍ ଏବେ ସାଇବର ଆକ୍ରମଣ ଓ ମାଲୱେର ବିପଦରେ ରହିଛି। ଏହାର ମୁଖ୍ୟ କାରଣ ହେଉଛି ପୁରୁଣା ଅପରେଟିଂ ସିଷ୍ଟମ୍ ପାଇଁ ସୁରକ୍ଷା ଅପଡେଟ୍ ବନ୍ଦ ହୋଇଯିବା।
ଗୁଗଲ୍ ସ୍ପଷ୍ଟ କରିଛି ଯେ, ଯେଉଁ ଫୋନ୍ଗୁଡ଼ିକ Android 12 କିମ୍ବା ତା’ଠାରୁ ପୁରୁଣା ଭର୍ସନରେ ଚାଲୁଛି, ସେଗୁଡ଼ିକୁ ଆଉ ସୁରକ୍ଷା ଅପଡେଟ୍ ମିଳିବ ନାହିଁ। ପରିସଂଖ୍ୟାନ ଅନୁଯାୟୀ ପ୍ରାୟ ୪୨.୧% ଆଣ୍ଡ୍ରଏଡ୍ ବ୍ୟବହାରକାରୀ ଏବେ ବି ଅସୁରକ୍ଷିତ ସଫ୍ଟୱେର୍ ବ୍ୟବହାର କରୁଛନ୍ତି। ମାତ୍ର ୫୭.୯% ଫୋନ୍ରେ Android 13 କିମ୍ବା ତା’ଠାରୁ ନୂଆ ଭର୍ସନ ରହିଛି। ସବୁଠାରୁ ନୂଆ Android 16 ବ୍ୟବହାରକାରୀଙ୍କ ସଂଖ୍ୟା ମାତ୍ର ୭.୫%।
କ’ଣ ହୋଇପାରେ କ୍ଷତି?
ସୁରକ୍ଷା ଅପଡେଟ୍ ଅଭାବରୁ ହ୍ୟାକରମାନେ ସହଜରେ ଆପଣଙ୍କ ଫୋନ୍ରେ ପ୍ରବେଶ କରିପାରିବେ। ଏହାଦ୍ୱାରା ଆପଣଙ୍କର ୟୁଜର୍ ନେମ୍ ଓ ପାସୱାର୍ଡ ଚୋରି ହୋଇପାରେ।ବ୍ୟାଙ୍କିଙ୍ଗ୍ ଆପ୍ ଏବଂ ଆର୍ଥିକ ତଥ୍ୟ ହ୍ୟାକରଙ୍କ ହାତକୁ ଯାଇପାରେ। ଓଟିପି (OTP) ଏବଂ ବ୍ୟକ୍ତିଗତ ମେସେଜ୍ ପଢ଼ାଯାଇପାରେ।
ଆପଣଙ୍କ ଫୋନ୍ ସୁରକ୍ଷିତ କି ନାହିଁ କେମିତି ଜାଣିବେ?
ନିଜ ଫୋନ୍ର ସ୍ଥିତି ଯାଞ୍ଚ କରିବା ପାଇଁ ଏହି ଷ୍ଟେପ୍ ଅନୁସରଣ କରନ୍ତୁ:
ଫୋନ୍ର Settings କୁ ଯାଆନ୍ତୁ।
About Phone ଉପରେ କ୍ଲିକ୍ କରନ୍ତୁ।
ସେଠାରେ Android Version ଯାଞ୍ଚ କରନ୍ତୁ।
ଯଦି ଆପଣଙ୍କ ଫୋନ୍ Android 12 କିମ୍ବା ତା’ଠାରୁ ପୁରୁଣା ଏବଂ ନୂଆ ଅପଡେଟ୍ ଆସୁନାହିଁ, ତେବେ ଗୁଗଲ୍ ଏହି ଫୋନ୍ ବଦଳାଇବାକୁ ପରାମର୍ଶ ଦେଇଛି।
ଗୁଗଲ କହିଛି ଯେ, ସୁରକ୍ଷିତ ରହିବା ପାଇଁ ଜଣେ ବ୍ୟବହାରକାରୀ ନୂଆ ଫୋନ୍ କିଣିବା ଉଚିତ। ଏଥିପାଇଁ ଦାମୀ ଫୋନ୍ କିଣିବା ଜରୁରୀ ନୁହେଁ, ବରଂ ଏକ ସାଧାରଣ ବଜେଟ୍ ଫୋନ୍ ଯେଉଁଥିରେ Android 13 କିମ୍ବା ନୂଆ ଭର୍ସନ ଅଛି, ତାହା ପୁରୁଣା ପ୍ରିମିୟମ ଫୋନ୍ ଅପେକ୍ଷା ଅଧିକ ସୁରକ୍ଷିତ। ଯଦିଓ ‘ଗୁଗଲ୍ ପ୍ଲେ ପ୍ରୋଟେକ୍ଟ’ ମାଲୱେର ସ୍କାନିଂ କରୁଛି, କିନ୍ତୁ ଏହା ସିଷ୍ଟମ୍-ଲେଭଲ୍ ସୁରକ୍ଷାର ବିକଳ୍ପ ନୁହେଁ।
