ମୁମ୍ବାଇ: ବଲିଉଡ୍ ଅଭିନେତା ସୈଫ ଅଲ୍ଲୀ ଖାନ୍ଙ୍କୁ ଛୁରାମାଡ଼ ହୋଇଛି। ଗୁରୁବାର ସକାଳ ତିନିଟାରେ ତାଙ୍କ ଘରେ ଚୋର ପଶିଯାଇଥିବା ବେଳେ ଅଭିନେତାଙ୍କୁ ଛଅ ଥର ଆକ୍ରମଣ କରିଛି। ସେଥିରୁ ୨ ଆଘାତ ଗୁରୁତର ରହିଛି। ତାଙ୍କୁ ଲୀଳାବତୀ ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ସୈଫଙ୍କ ସ୍ବାସ୍ଥାବସ୍ଥା ନେଇ ଡାକ୍ତରଖାନା ପକ୍ଷରୁ ସୂଚନା ଦିଆଯାଇଛି।
ହସ୍ପିଟାଲର ସିଇଓ ନୀରଜ ଉତ୍ତମାନୀ କହିଛନ୍ତି, ସୈଫଙ୍କ ଦେହର ଛଅଟି ସ୍ଥାନରେ କ୍ଷତ ରହିଛି। ସେଥିରୁ ଦୁଇଟି ଗୁରୁତର ଅଛି। ଗୋଟିଏ ସ୍ପାଇନାଲ୍ କର୍ଡ ପାଖରେ ବାଜିଛି। ଏବେ ତାଙ୍କ ଚିକିତ୍ସା କରାଯାଉଛି।
ଘଟଣାକୁ ନେଇ ପୋଲିସ ତଦନ୍ତ ଆରମ୍ଭ କରିଛି। କ୍ରାଇମବ୍ରାଞ୍ଚ ଟିମ୍ ତିନିଜଣ କର୍ମଚାରୀଙ୍କୁ ହେପାଜତକୁ ନେଇଛି। ସୁରକ୍ଷା ଦାୟିତ୍ୱରେ ଥିବା ଯୋଗୁ ଏବେ ସେମାନଙ୍କୁ ପଚରାଉଚରା କରାଯାଉଛି। ଏପରିକି ପୋଲିସ ସୈଫ୍ଙ୍କ ଘରେ କାମ କରୁଥିବା ଏବଂ ସୁରକ୍ଷାକର୍ମୀଙ୍କ ମୋବାଇଲ ଫୋନ୍ ଜବତ କରିଛି।
ଅପରପକ୍ଷେ ଛୁରାମାଡ଼କୁ ନେଇ ସୈଫଙ୍କ ଟିମ୍ ପକ୍ଷରୁ ଆଧିକାରୀକ ବୟାନ ଜାରି କରାଯାଇଛି। ତାଙ୍କ ବାସଭବନରୁ ଚୋରି ଉଦ୍ୟମ କରାଯାଇଥିଲା। ଏବେ ତାଙ୍କର ସର୍ଜରୀ ଚାଲିଛି। ବିଶେଷକରି ପ୍ରଶଂସକମାନେ ଚିନ୍ତିତ ହୋଇପଡ଼ିଥିବା ଯୋଗୁ ଧୌର୍ଯ୍ୟ ରଖିବାକୁ ଅନୁରୋଧ କରାଯାଇଛି।
ପୋଲିସ ସୈଫଙ୍କ ଘରେ ଲାଗିଥିବା ସିସିଟିଭି ଯାଞ୍ଚ କରୁଛି। ଆକ୍ରମଣକାରୀ କିଏ ଥିଲେ, କେଉଁଠାରୁ ଆସିଥିଲେ, ତାଙ୍କର ଉଦ୍ଦେଶ୍ୟ କ’ଣ ଥିଲା,ଏହାର ସୂଚନା ଏଯାଏ ପୋଲିସକୁ ମିଳିପାରି ନାହିଁ। ତେବେ ବୁଧବାର ରାତିରେ ମୋଟ ସାତଜଣ ସୁରକ୍ଷାକର୍ମୀ ନିଯୁକ୍ତ ଥିବା ଜଣାପଡ଼ିଛି।
