ବଲାଙ୍ଗୀର,୧୭ା୭(ସୁନିଲ କୁମାର ମହାନ୍ତି): ବଲାଙ୍ଗୀର ଲୋୟର ସୁକତେଲ ଜଳଭଣ୍ଡାର ଭିତରେ ଥିବା କୁମିଆପାଲି ଗାଁର ଲୋକଙ୍କୁ ଗାଁ ଛାଡ଼ିବାକୁ ଲୋୟର ସୁକ୍ତେଲ ଥଇଥାନ, ପୁନର୍ବାସ, ଶିବିର ଓ କୋଠା ବିଭାଗ ପକ୍ଷରୁ ଗାଁରେ ସର୍ବସାଧାରଣ ନୋଟିସ୍ ଛପାଯାଇଛି। ଉକ୍ତ ନୋଟିସ୍ରେ ଚଳିତ ମୌସୁମୀରେ ଲୋୟର ସୁକତେଲ ପ୍ରକଳ୍ପ ସମ୍ପୂର୍ଣ୍ଣ ଭାବେ ଜଳମଗ୍ନ ହୋଇଯିବ। ଏହାଯୋଗୁ ଧନଜୀବନ ହାନି ହେବାର ଆଶଙ୍କା ରହିଛି। ଏଣୁ ଲୋୟର ସୁକତେଲ ଜଳଭଣ୍ଡାର ସୀମାରୁ ଦୂରରେ ଥିବା କପିଳବାହାଲ ବିସ୍ଥାପିତ କଲୋନୀଠାରେ ନିର୍ମିତ ପୁନର୍ବସତି ଥଇଥାନ ଶିବିରକୁ ଯଥାଶୀଘ୍ର ସ୍ଥାନାନ୍ତରିତ ହେବାକୁ କୁମିଆପାଲି ଗ୍ରାମବାସୀଙ୍କୁ ଅନୁରୋଧ କରାଯାଇଛି। ଲୋୟର ସୁକତେଲ ଥଇଥାନ, ପୁନର୍ବାସ, ଶିବିର ଓ କୋଠା ବିଭାଗ ପକ୍ଷରୁ ଅଧୀକ୍ଷଣ ଯନ୍ତ୍ରୀ ଅଜୟ କୁମାର ବେହେରାଙ୍କ ସ୍ବାକ୍ଷର ଥିବା ଏଭଳି ଏକ ନୋଟିସ ଗୁରୁବାର ଗାଁରେ ଛପା ଯିବା ପରେ ଗ୍ରାମବାସୀ ଉଦ୍ବେଗ ପ୍ରକାଶ କରିଛନ୍ତି I ଲୋକଙ୍କ ଦାବି ପୂରଣ ନ କରି ସେମାନଙ୍କୁ ବିସ୍ଥାପିତ କରିବା ଠିକ ନୁହେଁ ବୋଲି ସେମାନେ କହିଛନ୍ତି I କୁମିଆପାଲି ଗାଁର ରାମଚନ୍ଦ୍ର ବରିହା କହିଛନ୍ତି ଯେ, ୨୦୧୩ ଭୂମି ଅଗ୍ରହଣ ଆଇନ ଲାଗୁ କରି ବିସ୍ଥାପିତଙ୍କ ଥଇଥାନ ଏବଂ କ୍ଷତିପୂରଣ ଦେବା, କୁମିଆପାଳିରେ ୧୧ (୧) ନୋଟିସ ରଦ୍ଧ କରି ସର୍ଭେ କରିବା ଏବଂ ବିସ୍ଥାପିତଙ୍କୁ ଜମି ବଦଳରେ ଜମି ଯୋଗାଇ ଦେବାକୁ ସେମାନେ ଦାବି କରୁଛନ୍ତି। ତାଙ୍କର ଦାବି ପୂରଣ ହୋଇ ନ ଥିବାରୁ ସେମାନେ ଗାଁ ଛାଡ଼ିବେ ନାହିଁ ବୋଲି ନିଷ୍ପତ୍ତି ନେଇଛନ୍ତି।
ଅନ୍ୟପଟେ ଚଳିତବର୍ଷ ଲୋୟର ସୁକ୍କଲେ ପ୍ରକଳ୍ପ ଜଳଭଣ୍ଡାରରେ ପୂର୍ଣ୍ଣ କ୍ଷମତାରେ ପାଣି ରଖାଯିବ ବୋଲି କୁହାଯାଉଛି। ଜଳଭଣ୍ଡାର ଭିତରେ ଥୁବା କୁମିଆପାଲିରେ ଏବେବି ୮୬ ଆଦିବାସୀ ପରିବାର ରହୁଛନ୍ତି। ସେମାନଙ୍କ ପାଇଁ କପିଲବାହାଲ ମୌଜାରେ ଏକ ପୂର୍ନବାସ କଲୋନୀ ତିଆରି କରାଯାଇଛି। ସେମାନଙ୍କୁ ସେହି କଲୋନୀକୁ ସ୍ଥାନାନ୍ତର ହେବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ଜଳଭଣ୍ଡାରର ଜଳସ୍ତର ବଢ଼ୁଥିବାରୁ କୁମିଆପାଲି ଗାଁକୁ ଯେକୌଣସି ସମୟରେ ପାଣି ଘେରିବା ଭୟ ରହୁଛି ପାଣି ଗାଁକୁ ପହଞ୍ଚୁବା ପୂର୍ବରୁ ଲୋକଙ୍କୁ ସ୍ଥାନାନ୍ତର କରିବା ପାଇଁ ପ୍ରଶାସନ ଉଦ୍ୟମ କରୁଛନ୍ତି। ଲୋକେ କିନ୍ତୁ ଦାବି ପୂରଣ ନହେଲେ ଗାଁ ଛାଡ଼ିବେ ନାହିଁ ବୋଲି କହୁଛନ୍ତି। ଖୁଣ୍ଟପାଲି, ତବଲବାଞ୍ଜି ଗାଁରେ ଥିବା କିଛି ଲୋକଙ୍କୁ ଶୀଘ୍ର ଗାଁରୁ ସ୍ଥାନାନ୍ତର ହେବାକୁ କୁହାଯିବା ସହ ୨୧ ତାରିଖ ସୁଦ୍ଧା ଏହି ୩ ଗାଁର ବିଦ୍ୟୁତ୍ କାଟ୍ କରିବାକୁ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି।
