ଚଣ୍ଡିଖୋଲ,୨୮ା୧୧(ଡି.ଏନ.ଏ.): କଟକ ଜଗତପୁର-ପଟ୍ଟାମୁଣ୍ଡାଇ କେନାଲର ତ୍ରିବେଣୀଶ୍ୱରଠାରେ ରବିବାର ଜଳସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଭକ୍ତରଞ୍ଜନ ମହାନ୍ତି, ମୁଖ୍ୟଯନ୍ତ୍ରୀ ସାଗର ରଞ୍ଜନ ମହାନ୍ତି, ଅତିରିକ୍ତ ମୁଖ୍ୟଯନ୍ତ୍ରୀ ପୂର୍ଣ୍ଣଚନ୍ଦ୍ର ରଥ ପ୍ରମୁଖ ପହଞ୍ଚି ଘାଇ ବନ୍ଧା ହୋଇଥିବା ସ୍ଥଳ ପରିଦର୍ଶନ କରିଛନ୍ତି। ସେମାନେ ବିରୂପା ନଦୀ ବନ୍ଧ ଓ ପଟ୍ଟାମୁଣ୍ଡାଇ କେନାଲ ବନ୍ଧର ଅବସ୍ଥା ନିରୀକ୍ଷଣ କରିଛନ୍ତି। ଏବେ ଚାଷ କାର୍ଯ୍ୟରେ ଆଉ ପାଣି ଆବଶ୍ୟକତା ନ ଥିବାରୁ କେନାଲରେ ପାଣି ବନ୍ଦ କରାଯାଇଛି। ତେଣୁ ତୁରନ୍ତ ନଦୀବନ୍ଧ ଓ କେନାଲ ବନ୍ଧର ଉଭୟ ପାର୍ଶ୍ୱ କାର୍ଯ୍ୟ ଶେଷ କରିବା ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି।
ବନ୍ଧ ପୋତା କାର୍ଯ୍ୟ ସରିଥିଲେ ମଧ୍ୟ ଏହି ବନ୍ଧ ଦେଇ ଚାରିଚକିଆ ଯାନ ଚଳାଚଳ ବନ୍ଦ ରହିଛି। ତୁରନ୍ତ ବନ୍ଧକୁ ଓସାର କରି ଯାନ ଚଳାଚଳ ବ୍ୟବସ୍ଥା କରିବାକୁ ପରାମର୍ଶ ଦିଆଯାଇଛି। ଯେହେତୁ ତ୍ରିବେଣୀଶ୍ୱରଠାରେ ବିରୂପା ନଦୀ, ପଟ୍ଟାମୁଣ୍ଡାଇ କେନାଲ, ଗୋବରୀ ନଦୀ ଓ ଶୁକ ନଦୀ ରହିଛି ସେଥିପାଇଁ ଏହି ନଦୀବନ୍ଧକୁ ମଜଭୁତ କରିବାକୁ ସ୍ଥାନୀୟ ଲୋକେ ବିଭାଗୀୟ ଅଧିକାରୀଙ୍କ ନିକଟରେ ଦାବି କରିଥିଲେ। ତେବେ ଖୁବ୍ଶୀଘ୍ର ଉଭୟ ପଟ ନଦୀ ବନ୍ଧ ଓ କେନାଲ ବନ୍ଧ କାର୍ଯ୍ୟ ଶେଷ କରାଯିବ ବୋଲି ସର୍ବୋଚ୍ଚ ଯନ୍ତ୍ରୀ ମହାନ୍ତି ପ୍ରକାଶ କରିଛନ୍ତି। ଏହି ପରିଦର୍ଶନ ସମୟରେ ଅନ୍ୟମାନଙ୍କ ମଧ୍ୟରେ ଅଧୀକ୍ଷଣ ଯନ୍ତ୍ରୀ ସଞ୍ଜୀବ କୁମାର ବେହେରା, ସହକାରୀ ନିର୍ବାହୀ ଯନ୍ତ୍ରୀ ଶକ୍ତି ପ୍ରସାଦ ଦାସ, ସହକାରୀ ଯନ୍ତ୍ରୀ ବୈକୁଣ୍ଠ ନାଥ ଭୋଇ ପ୍ରମୁଖ ଉପସ୍ଥିତ ରହି ଅଧିକାରୀଙ୍କୁ ଘାଇ ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରିଥିଲେ।
ଅକ୍ଟୋବର ୨୯ରେ ଘାଇ ସୃଷ୍ଟି ହୋଇ ବିରୂପା ନଦୀବନ୍ଧ ୧୦୦ ଫୁଟ ଭାଙ୍ଗି ଯାଇଥିଲା। ଏଥିରେ ୬ଟି ଦୋକାନ ଘର ଭାସି ଯିବା ସହ ବାଲିଚନ୍ଦ୍ରପୁରଠାରୁ ଗୋପୀନାଥପୁର ରାସ୍ତା ବିଚ୍ଛିନ୍ନ ହୋଇଥିଲା। ଘାଇ ଦ୍ୱାରା ଯାଜପୁର, କେନ୍ଦ୍ରାପଡ଼ା ଓ କଟକ ଜିଲାର ଚାଷୀ କ୍ଷତିଗ୍ରସ୍ତ ହୋଇଥିଲେ। ପାଖାପାଖି ୩୨ହଜାର ୭ଶହ ହେକ୍ଟର ଚାଷ ଜମି ପ୍ରଭାବିତ ହୋଇଥିଲା। ଧାନ ଆହାର ଢୋକୁ ଥିବାରୁ ଚାଷୀଙ୍କ ମଧ୍ୟରେ ବିଦ୍ରୋହ ସୃଷ୍ଟି ହୋଇଥିଲା। ଜଳ ସମ୍ପଦ ବିଭାଗ ମହାନଦୀ ନର୍ଥ ଡିଭିଜନ ପକ୍ଷରୁ ୭ ଦିନ ମଧ୍ୟରେ ଯୁଦ୍ଧ କାଳୀନ ଭିତ୍ତିରେ ଘାଇ ପୋତା ହେବା ସହ କେନାଲରେ ପାଣି ଛଡ଼ା ଯିବାରୁ ଚାଷୀଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଥିଲା।
