ନୂଆଦିଲ୍ଲୀ : ଶ୍ରମ କୋଡ୍ ବିଲ୍କୁ ନିକଟରେ ସଂସଦର ଅନୁମୋଦନ ମିଳିଛି। ଏହାକୁ ବିରୋଧକରି ଦେଶର ଶ୍ରମ ସଙ୍ଗଠନଗୁଡ଼ିକ ନଭେମ୍ବର ୨୬ରେ ଦେଶବ୍ୟାପୀ ଦିନିକିଆ ଧର୍ମଘଟ ଡାକରା ଦେଇଛନ୍ତି। ଆୟକର ପ୍ରଦାନ କରିବାକୁ ସକ୍ଷମ ନ ଥିବା ପରିବାରଗୁଡ଼ିକୁ ସରକାର ସିଧାସଳଖ ବ୍ୟାଙ୍କଖାତାକୁ ଅର୍ଥରାଶି ପ୍ରେରଣ କରିବା ନେଇ ସଙ୍ଗଠନଗୁଡିକ ଦାବି ଉଠାଇଛନ୍ତି। ନୂଆ ଶ୍ରମ କୋଡ୍ ଦ୍ୱାରା ସଂସ୍ଥାଗୁଡିକ ଶ୍ରମିକଙ୍କ ଉପରେ ଜୋର ଜବରଦସ୍ତି କରିବା ସହ ଦାସତ୍ୱ ଭଳି ପ୍ରଥା ପୁଣି ଥରେ ଦେଖିବାକୁ ମିଳିବ ବୋଲି ଦାବିରେ କୁହାଯାଇଛି। ସେହିଭଳି ଧର୍ମଘଟ କରିବା ଅଧିକାରକୁ ମଧ୍ୟ ନୂଆ ଆଇନରେ ଛଡ଼ାଇ ନିଆଯାଇଛି। ନୂଆ ଆଇନରେ ଅଣସଙ୍ଗଠିତ କ୍ଷେତ୍ରଗୁଡିକର ଶ୍ରମିକଙ୍କୁ ଅଣଦେଖା କରାଯାଇଥିବା ଅଭିଯୋଗ ହୋଇଛି। ସରକାର ଯେଉଁ ୩ ଶ୍ରମ କୋଡ୍ ବିଲ୍କୁ ପାସ୍ କରାଇଛନ୍ତି, ତାହା ଅଗଣତାନ୍ତ୍ରିକ। ବିରୋଧୀ ଦଳର ଅନୁପସ୍ଥିତିରେ ଏହାକୁ ସରକାର ପାସ୍ କରାଇଥିବାରୁ ସଙ୍ଗଠନଗୁଡିକ ଏହାକୁ ବିରୋଧ କରିଛନ୍ତି। ଶ୍ରମିକ ସଙ୍ଗଠନଗୁଡ଼ିକର ଏହି ଧର୍ମଘଟ ଡାକରାରେ ଆର୍ଏସ୍ଏସ୍ ସହବନ୍ଧିତ ଭାରତୀୟ ମଜଦୁର ସଂଘ ସାମିଲ ହେବ ନାହିଁ ବୋଲି ଜଣାପଡ଼ିଛି। ଆୟକର ପରିସରରେ ଆସୁ ନ ଥିବା ପରିବାରଗୁଡିକୁ ମାସିକ ୭,୫୦୦ ଟଙ୍କା ପ୍ରଦାନ, ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନାରେ ଅଧିକ କାମ ଯୋଗାଣ, ଶ୍ରମ କୋଡ୍ ଏବଂ ଫାର୍ମ ବିଲ୍କୁ ପ୍ରତ୍ୟାହାର ଭଳି ଅନ୍ୟ ଦାବି ରଖାଯାଇଛି।
