କ୍ରିକେଟ ଇତିହାସରେ ଜଣେ ଏଭଳି ଖେଳାଳି ଥିଲେ, ଯାହାଙ୍କୁ ଫାଶି ଦିଆଯାଇଥିଲା। ସେ ହେଲେ ଓ୍ବେଷ୍ଟଇଣ୍ଡିଜ ପକ୍ଷରୁ ୧୯୩୪ରୁ ୩୯ ମସିହା ପର୍ଯ୍ୟନ୍ତ ଖେଳିଥିବା ଲେସଲି ହିଲଟନ। ଜାମାଇକାରେ ଜନ୍ମିତ ଏହି ପେସର ଅନ୍ତର୍ଜାତୀୟ ସ୍ତରରେ ମାତ୍ର ୬ଟି ଟେଷ୍ଟ ମ୍ୟାଚ୍ ଖେଳି ହାତେଇଥିଲେ ୧୬ ଉଇକେଟ। ସେଥିରେ ସେତେଟା ସଫଳତା ପାଇ ନ ଥିବା ଏହି କ୍ରିକେଟରଙ୍କୁ ୧୯୫୫ରେ ଦିଆଯାଇଥିଲା ଫାଶି। ହିଲଟନ ୧୯୫୪ରେ ତାଙ୍କ ପତ୍ନୀଙ୍କୁ ହତ୍ୟା କରିଥିଲେ।
୧୯୩୯ରେ କ୍ରିକେଟରୁ ଦୂରେଇବା ପରେ ହିଲଟନ ୧୯୪୨ରେ ଲୁରଲାଇନ ରୋଜଙ୍କୁ ପ୍ରେମ ବିବାହ କରିଥିଲେ। ଏହାର ୫ ବର୍ଷ ପରେ ସେମାନଙ୍କର ପୁତ୍ର ସନ୍ତାନ ଜନ୍ମ ହୋଇଥିଲା। କିନ୍ତୁ ୧୯୫୪ରେ ତାଙ୍କ ସ୍ତ୍ରୀ ବ୍ୟକ୍ତିଗତ ବ୍ୟବସାୟ ପାଇଁ ବାରମ୍ବାର ନ୍ୟୁୟର୍କ ଯାଉଥିଲେ। ସେହି ବର୍ଷ ଏପ୍ରିଲରେ ରୟ ଫ୍ରାଙ୍କସିସ୍ ନାମକ ବ୍ୟକ୍ତିଙ୍କ ସହ ଲୁରଲାଇନଙ୍କ ଅବୈଧ ସମ୍ପର୍କ ଥିବା ଏକ ଅଜ୍ଞାତ ଚିଠି ହିଲଟନଙ୍କୁ ମିଳିଥିଲା। ଏହାପରେ ଲୁରଲାଇନ୍ଙ୍କୁ ତୁରନ୍ତ ଜାମାଇକା ଡକାଇ ଏ ସମ୍ପର୍କରେ ପଚାରି ଥିଲେ। ସବୁ ଅଭିଯୋଗ ସ୍ବୀକାର କରିବା ସହ ହିଲଟନଙ୍କ ସହ ଖୁସିରେ ନ ଥିବା କହିଥିଲେ ଲୁରଲାଇନ୍। ଏଥିରେ ରାଗି ଯାଇ ପତ୍ନୀଙ୍କୁ ଗୁଳି କରି ହତ୍ୟା କରିଥିଲେ। କୋର୍ଟରେ ନିଜକୁ ବଞ୍ଚାଇବା ପାଇଁ ଆତ୍ମହତ୍ୟା କରିବାକୁ ଚେଷ୍ଟା କରୁଥିବାବେଳେ ଭୁଲ ବଶତଃ ପତ୍ନୀଙ୍କୁ ଗୁଳି ଲାଗିଥିବା କହିଥିଲେ। ହେଲେ ଲୁରଲାଇନଙ୍କ ମୃତଦେହରୁ ଜବତ ହୋଇଥିଲା ୭ଟି ଗୁଳି। ଶେଷରେ ୧୯୫୫ ମେ’ ୧୭ରେ ହିଲଟନଙ୍କୁ ଫାଶି ଦିଆଯାଇଥିଲା।
