ନୂଆଦିଲ୍ଲୀ,୭।୪: ସୋମବାର ବିଶ୍ୱ ସ୍ବାସ୍ଥ୍ୟ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ସୁସ୍ଥ ଜୀବନଶୈଳୀ ଗ୍ରହଣ କରିବା ଏବଂ ସ୍ଥୂଳକାୟତା ବା ମୋଟାପଣ ଏଡାଇବାକୁ ନିବେଦନ କରିଛନ୍ତି। ସେ କହିଥିଲେ ଯେ ବ୍ୟକ୍ତିଗତ ଫିଟନେସକୁ ପ୍ରାଥମିକତା ଦେବା ଦ୍ୱାରା ଭାରତ ଏକ ବିକଶିତ ରାଷ୍ଟ୍ର ହେବା ଲକ୍ଷ୍ୟରେ ଗୁରୁତ୍ୱପୂର୍ଣ୍ଣ ଯୋଗଦାନ ମିଳିବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇନଷ୍ଟାଗ୍ରାମରେ ପୋଷ୍ଟ କରି କହିଛନ୍ତି, ବିଶ୍ୱ ସ୍ବାସ୍ଥ୍ୟ ଦିବସରେ, ଆସନ୍ତୁ ଏକ ସୁସ୍ଥ ବିଶ୍ୱ ଗଠନ ପାଇଁ ଆମର ପ୍ରତିବଦ୍ଧତା ପ୍ରକାଶ କରିବା। ଆମ ସରକାର ସ୍ବାସ୍ଥ୍ୟସେବା ଉପରେ ଧ୍ୟାନ ଦେବା ଏବଂ ଲୋକଙ୍କ କଲ୍ୟାଣ ପାଇଁ ବିଭିନ୍ନ କ୍ଷେତ୍ରରେ ନିବେଶ କରିବା ଜାରି ରଖିବ। ଉତ୍ତମ ସ୍ବାସ୍ଥ୍ୟ ହେଉଛି ଯେକୌଣସି ସମୃଦ୍ଧ ସମାଜର ମୂଳଦୁଆ।
ଏକ ଭିଡିଓ ବାର୍ତ୍ତାରେ, ପ୍ରଧାନମନ୍ତ୍ରୀ ପୁରୁଣା କଥାକୁ ମନେ ପକାଇ ଦେଇଥିଲେ ଯେ ସ୍ବାସ୍ଥ୍ୟ ହେଉଛି ପରମ ସୌଭାଗ୍ୟ ଏବଂ ପରମ ସମ୍ପତ୍ତି ଏବଂ ଭାରତରେ ବଢି ଚାଲିଥିବା ମୋଟାପଣ ସଙ୍କଟ ଉପରେ ଚିନ୍ତା ପ୍ରକାଶ କରିଥିଲେ।
ସେ କହିଥିଲେ, ଆଜିକାଲି ଆମର ଜୀବନଶୈଳୀ ଆମ ସ୍ବାସ୍ଥ୍ୟ ପାଇଁ ଏକ ବଡ଼ ବିପଦ ପାଲଟିଛି। ଏକ ସଦ୍ୟ ରିପୋର୍ଟ ଅନୁଯାୟୀ, ୨୦୫୦ ସୁଦ୍ଧା ୪୪ କୋଟିରୁ ଅଧିକ ଭାରତୀୟ ମୋଟାପଣର ଶିକାର ହେବେ। ଏହା ଚିନ୍ତାର ବିଷୟ, ଏହା ଏକ ବଡ଼ ସଙ୍କଟ ସୃଷ୍ଟି କରିପାରେ।
ପ୍ରଧାନମନ୍ତ୍ରୀ ତାଙ୍କ ବାର୍ତ୍ତାରେ ଏହା ମଧ୍ୟ କହିଛନ୍ତି ଯେ ତେଲ ବ୍ୟବହାର ହ୍ରାସ କରିବା ଭଳି ସୁସ୍ଥ ଖାଦ୍ୟ ଅଭ୍ୟାସ ଗ୍ରହଣ କରିବା କେବଳ ଏକ ବ୍ୟକ୍ତିଗତ ନିଷ୍ପତ୍ତି ନୁହେଁ ବରଂ ଏହା ଆମର ସାମାଜିକ ଦାୟିତ୍ୱ ମଧ୍ୟ।
ସେ ଏହି ସମସ୍ୟାକୁ ବନ୍ଦ କରିବା ପାଇଁ ତୁରନ୍ତ ପଦକ୍ଷେପ ନେବାକୁ ଆହ୍ବାନ ଦେଇଥିଲେ ଏବଂ ଏକ ସରଳ ପରାମର୍ଶ ଦେଇଥିଲେ: ମୁଁ ଆଜି ଆପଣଙ୍କଠାରୁ ଏକ ପ୍ରତିଶ୍ରୁତି ନେବାକୁ ଚାହୁଁଛି ଯେ ଆମେ ସମସ୍ତେ ଆମର ରନ୍ଧନ ତେଲ ୧୦ ପ୍ରତିଶତ ହ୍ରାସ କରିବା ଉଚିତ। ଏହା ମୋଟାପଣ ହ୍ରାସ କରିବା ଦିଗରେ ଏକ ବଡ଼ ପଦକ୍ଷେପ ହେବ।
ସେ ଲୋକମାନଙ୍କୁ ସେମାନଙ୍କର ଦୈନନ୍ଦିନ କାର୍ଯ୍ୟସୂଚୀରେ ନିୟମିତ ଶାରୀରିକ କାର୍ଯ୍ୟକଳାପ ବେ ଯୋଗ ଓ ବ୍ୟାୟାମ ଯୋଡ଼ିବାକୁ ମଧ୍ୟ ଉତ୍ସାହିତ କରିଥିଲେ।
ଏହା ବ୍ୟତୀତ, ଆମକୁ ବ୍ୟାୟାମକୁ ଆମ ଜୀବନଶୈଳୀର ଏକ ଅଂଶ କରିବାକୁ ପଡିବ ବୋଲି ସେ କହିଥିଲେ। ଯଦି ଆମେ ନିଜକୁ ଫିଟ ରଖିବା, ତେବେ ଏହା ବିକଶିତ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।
