ଢେଙ୍କାନାଳ ଅଫିସ,୯।୪: ଜଳସେଚନ ପ୍ରକଳ୍ପରେ ଯାଇଛି ବାସ। ଉଜୁଡ଼ିଛି ମୂଲ୍ୟବାନ୍ ଚାଷଜମି। ଭିଟାମାଟିରୁ ପର ହେବାର ଇତିମଧ୍ୟରେ ବିତିଗଲାଣି ଦୀର୍ଘ ୪ ଦଶନ୍ଧି। ତଥାପି ମିଳୁନାହିଁ ନ୍ୟାୟ। ଫଳରେ ଦୁର୍ଦ୍ଦିନରେ ଦିନ କାଟୁଛନ୍ତି ଦଣ୍ଡାଧାର ବିସ୍ଥାପିତ।
ଜମିକୁ ଜଳସେଚନ ଯୋଗାଇଦେବା ଲକ୍ଷ୍ୟରେ କଙ୍କଡ଼ାହାଡ଼ ବ୍ଲକ କଣ୍ଟାପାଳରେ ୧୯୮୦ରେ ନିର୍ମାଣ କରାଯାଇଥିଲା ଦଣ୍ଡାଧର କ୍ଷୁଦ୍ର ଜଳସେଚନ ପ୍ରକଳ୍ପ। ଏଥିରେ ବିସ୍ଥାପିତ ହୋଇଥିବା ୫୦୦ରୁ ଊର୍ଦ୍ଧ୍ୱ ପରିବାରକୁ ୪ଟି କଲୋନିରେ ବିଭକ୍ତ କରାଯାଇ ଥଇଥାନ କରାଯିବାକୁ ଲକ୍ଷ୍ୟ ରଖାଯାଇଥିଲା। ସେମାନଙ୍କୁ ଘର ଡିହ ପଟ୍ଟା ଏବଂ ପ୍ରତି ପରିବାର ପିଛା ୩ ଏକର ଲେଖାଏ ଚାଷ ଉପଯୋଗୀ ଜମି ଯୋଗାଇ ଦେବାଲାଗି ସେତେବେଳେ ପ୍ରତିଶ୍ରୁତି ଦିଆଯାଇଥିଲା। ବିସ୍ଥାପିତ ପରିବାର ମଧ୍ୟରୁ କେତେକଙ୍କୁ ପଟ୍ଟା ଏବଂ ଚାଷଜମି ମିଳିଥିବାବେଳେ ଅନେକେ ଏବେ ବି ସରକାରୀ ସୁବିଧାରୁ ବଞ୍ଚତ୍ତ ହୋଇ ରହିଛନ୍ତି। ଅନ୍ୟପଟେ ଯେଉଁମାନଙ୍କୁ ଚାଷ ଜମିପଟ୍ଟା ଏବଂ ଘରଡିହ ମିଳିଛି, ସେମାନେ ଏବେ ବି ଅଡୁଆରେ ପଡ଼ିଛନ୍ତି। କାରଣ ଯୋଗାଇ ଦିଆଯାଇଥିବା ଜମିରୁ ଜବରଦଖଲ ଉଚ୍ଛେଦ ହୋଇପାରୁ ନ ଥିବାରୁ ସେମାନେ କେବଳ କାଗଜକଲମରେ ଏହାର ମାଲିକ ହୋଇ ରହିଛନ୍ତି। ସେହିପରି ଅନେକଙ୍କୁ ମିଳିଥିବା ଚାଷଜମି ଅନୁର୍ବର। ସେଠାରେ ଚାଷ କରିବା ସମ୍ଭବ ହୋଇପାରୁନାହିଁ। ୪ଟି କଲୋନିକୁ ୨ଟି ସ୍ବତନ୍ତ୍ର ଗ୍ରାମର ମାନ୍ୟତା ପ୍ରଦାନ କରିବା ଲାଗି ବିସ୍ଥାପିତ ପ୍ରଜା ମଞ୍ଚ ଦାବି କରି ଆସୁଥିଲେ ମଧ୍ୟ ଅଦ୍ୟାବଧି ତାହା ପୂରଣ ହୋଇପାରିନାହିଁ। ଫଳରେ ବିସ୍ଥାପିତ କଲୋନି ପାରିପାର୍ଶ୍ୱିକ ଅଞ୍ଚଳର ବିକାଶ ହୋଇପାରୁ ନ ଥିବା ଅଭିଯୋଗ ହେଉଛି। ତେଣୁ କ୍ଷତିଗ୍ରସ୍ତ ପରିବାରକୁ ମୌଳିକ ସୁବିଧା ଯୋଗାଇ ଦେବା, ସ୍ବତନ୍ତ୍ର ପ୍ୟାକେଜ୍ ଘୋଷଣା କରିବା, ସରକାରୀ ଜମିରୁ ଜବରଦଖଲ ଉଚ୍ଛେଦ, ଶ୍ମଶାନ ଜମି ଚିହ୍ନଟ, ପଟ୍ଟା ମୁତାବକ ଥଇଥାନ କରିବା ଲାଗି ଗ୍ରାମବାସୀ ଦାବି କରିଛନ୍ତି।
