ଚଣ୍ଡିଗଡ଼/ନୂଆଦିଲ୍ଲୀ, ୨୧ା୩: ଖଲିସ୍ତାନୀ ନେତା ଅମ୍ରିତ୍ପାଲ ସିଂଙ୍କୁ ଧରିବା ପାଇଁ ପଞ୍ଜାବ ପୋଲିସର ରାଜ୍ୟବ୍ୟାପୀ ଚଢ଼ାଉ ସୋମବାର ତୃତୀୟ ଦିନରେ ପହଞ୍ଚତ୍ଛି। ଭାରତରେ ଖଲିସ୍ତାନୀ ଆନ୍ଦୋଳନ ତେଜିବା ଉଦ୍ୟମ ପଛରେ ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇର ହାତ ଥିବା ପୋଲିସ ସନ୍ଦେହ କରୁଛି ବୋଲି ପୋଲିସ ଆଇଜି ସୁଖଚୈନ ସିଂ ଗିଲ୍ କହିଛନ୍ତି। ଏହା ବ୍ୟତୀତ ଅମ୍ରିତ୍ପାଲଙ୍କ ସଂଗଠନକୁ ଭାରତ ବିରୋଧୀ କାର୍ଯ୍ୟ ପାଇଁ ବିଦେଶରୁ ବିପୁଳ ପାଣ୍ଠି ଆସୁଥିଲା ବୋଲି ସନ୍ଦେହ କରାଯାଉଛି। ଶାନ୍ତି ଓ ସଦ୍ଭାବନା ଭଙ୍ଗ ଉଦ୍ୟମ ଅଭିଯୋଗରେ ବର୍ତ୍ତମାନ ସୁଦ୍ଧା ୧୧୪ ଜଣଙ୍କୁ ଗିରଫ କରାଗଲାଣି। ଏଥିସହିତ ୧୦ଟି ଅସ୍ତ୍ର ଜବତ ହୋଇଥିବା ଆଇଜିପି କହିଛନ୍ତି। ଅମ୍ରିତ୍ପାଲଙ୍କ ‘ଓ୍ବାରିସ୍ ପଞ୍ଜାବ ଡେ’ ସଂଗଠନ ସହ ସମ୍ପୃକ୍ତ ୫ ଜଣଙ୍କ ବିରୋଧରେ ଜାତୀୟ ସୁରକ୍ଷା ଆଇନ (ଏନ୍ଏସ୍ଏ)ରେ ମାମଲା ରୁଜୁ ହୋଇଛି। ସେମାନଙ୍କ ମଧ୍ୟରୁ ଦଲ୍ଜିତ ସିଂ କାଲ୍ସି, ଭଗଓ୍ବନ୍ତ ସିଂ, ଗୁର୍ମିତ ସିଂ ଏବଂ ପ୍ରଧାନମନ୍ତ୍ରୀ ବାଜେକେଙ୍କୁ ଗିରଫ କରାଯାଇ ଆସାମର ଦିବ୍ରୁଗଡ଼ କେନ୍ଦ୍ରୀୟ ଜେଲ୍କୁ ପଠାଇଦିଆଯାଇଛି। ଏହା ବ୍ୟତୀତ ଶନିବାର ରାତିରେ ଜଳନ୍ଧରରେ ଆତ୍ମସମର୍ପଣ କରିଥିବା ଅମ୍ରିତ୍ପାଲଙ୍କ ଦାଦା ହର୍ଜିତ ସିଂଙ୍କ ବିରୋଧରେ ମଧ୍ୟ ଏନ୍ଏସ୍ଏ ଲାଗିଛି। ତାଙ୍କୁ ଦିବ୍ରୁଗଡ଼ ଜେଲକୁ ପଠାଯିବ ବୋଲି ପୋଲିସ କହିଛି। ଅସ୍ତ୍ରଶସ୍ତ୍ର ଜବତ ପରେ ଅମ୍ରିତ୍ପାଲଙ୍କୁ ଜଣେ ଆତଙ୍କବାଦୀ ବିଚେତନା କରି ତାଙ୍କ ବିରୋଧରେ ତଦନ୍ତ ଚଳାଇବାକୁ ଉଦ୍ୟମ ହେଉଛି। ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଅମ୍ରିତ୍ପାଲ ଓ ତାଙ୍କର ୭ ସହଯୋଗୀଙ୍କ ବିରୋଧରେ ତଦନ୍ତ କରିପାରେ। ନୂଆ ମାମଲାରେ ଖଲିସ୍ତାନୀ ନେତାଙ୍କୁ ଅଭିଯୁକ୍ତ ନମ୍ବର ଓ୍ବାନ ଭାବେ ଦର୍ଶାଯାଇଛି। ନିଶା ନିବାରଣ କେନ୍ଦ୍ର ଚଳାଇବା ନାଁରେ ଅମ୍ରିତ୍ପାଲ ଯୁବବର୍ଗଙ୍କୁ ଅସ୍ତ୍ର ଶିକ୍ଷାଦେବା ସହ ଆତ୍ମଘାତୀ ବୋମା ସାଜିବା ଲାଗି ପ୍ରବର୍ତ୍ତାଉଥିଲେ। ଶନିବାର ଅମ୍ରିତ୍ପାଲ ଯେଉଁ ମର୍ସିଡିଜ୍ ଏସ୍ୟୁଭିରେ ଖସି ପଳାଇଥିଲେ, ତାହା ଡ୍ରଗ୍ ବ୍ୟବସାୟୀ ରାଭେଲ ସିଂଙ୍କର ବୋଲି ଜଣାପଡ଼ିଛି।
