ରାଜନଗର,୭।୩(ଭାସ୍କର ରାଉତରାୟ): ଗହୀରମଥାରେ ଅଲିଭ୍ ରିଡ୍ଲେ କଇଁଛଙ୍କ ସାମୂହିକ ଅଣ୍ଡାଦାନ ପ୍ରକ୍ରିୟା ଜାରି ରହିଛି। ଦୁଇ ଦିନ ମଧ୍ୟରେ ୧ ଲକ୍ଷରୁ ଊର୍ଦ୍ଧ୍ୱ ଅଲିଭ୍ ରିଡ୍ଲେ କଇଁଛ ଅଣ୍ଡା ଦେଇସାରିଛନ୍ତି। ଏହି ପ୍ରକିୟା ଆଉ ୨ରୁ ୪ ଦିନ ଚାଲିବ। ପାଗ ଅନୁକୂଳ ଥିବାରୁ ଲକ୍ଷାଧିକ ମା’ କଇଁଛ ଏବେ କୂଳ ମୁହଁରେ ଅଣ୍ଡା ଦେବା ଅପେକ୍ଷାରେ ଅଛନ୍ତି ବୋଲି ରାଜନଗର ଡିଏଫଓ ସୁଦର୍ଶନ ଗୋପୀନାଥ ଯାଦବ ସୂଚନା ଦେଇଛନ୍ତି।
ଗହୀରମଥା ସର୍ବବୃହତ୍ ରୁକେରୀ(ସାମୂହିକ ଅଣ୍ଡାଦେବା ସ୍ଥାନ)ରେ ପରିଣତ ହୋଇଥିବା ବେଳେ ଋଷିକୁଲ୍ୟା ନଦୀ ମୁହାଣରେ ସର୍ବାଧିକ ଆରିବାଡା (ସାମୂହିକ ବସା) ଦେଖିବାକୁ ମିଳିଛି। ପୂର୍ବ ରେକର୍ଡକୁ ଅତିକ୍ରମ କରି ଚଳିତବର୍ଷ ଋଷିକୁଲ୍ୟା ମୁହାଣ ନିକଟରେ ୬,୯୮,୭୧୮ ଅଲିଭ ରିଡ୍ଲେ ଅଣ୍ଡା ଦେଇଛନ୍ତି।
ସେହିପରି ଗତ ୫ ତାରିଖରୁ ଗହୀରମଥାରେ କଇଁଛଙ୍କ ସାମୂହିକ ବସା ଆରମ୍ଭ ହୋଇଛି। ପ୍ରଥମ ଦିନରେ ୭୮,୭୪୩ କଇଁଛ ଅଣ୍ଡା ଦାନ କରିଥିବା ବେଳେ ୬ ତାରିଖରେ ୧,୧୪,୦୦୨ କଇଁଛ ଅଣ୍ଡା ଦାନ କରିଛନ୍ତି। ଏହି ବିରଳ କଇଁଛଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ବିଭାଗ ସାମୁଦ୍ରିକ ପୋଲିସ ସହଯୋଗରେ ୬୭ଟି ପାଟ୍ରୋଲିଂ କ୍ୟାମ୍ପ କରାଯାଇଛି।
ସେହିପରି ୨୪ଘଣ୍ଟା ନିରୀକ୍ଷଣ ପାଇଁ ହାଇସ୍ପିଡ୍ ଜାହାଜ ସମେତ ୨୨ଟି ପାଟ୍ରୋଲିଂ ବୋଟ୍ ନିୟୋଜିତ କରାଯାଇଛି। ବାସସ୍ଥଳୀର ନିରନ୍ତର ତଦାରଖ, ଆଲୋକ କଟକଣା ଲାଗୁ ହେବା ସହିତ ଅଣ୍ଡାର ସୁରକ୍ଷା ପାଇଁ ଅତିରିକ୍ତ ୮ଟି କୃତ୍ରିମ ହାଚେରୀ କୁଜଙ୍ଗ ଓ ଗହୀରମଥା ବନ୍ୟପ୍ରାଣୀ ରେଞ୍ଜ୍ରେ ପ୍ରତିଷ୍ଠା ହୋଇଛି।
ରାଜନଗର ଡିଏଫ୍ଓ ସୁଦର୍ଶନ ଗୋପୀନାଥ ଏବଂ ଉପକୂଳ ଡିଭିଜନର ଉତ୍ସର୍ଗୀକୃତ ଦଳ ଦ୍ୱାରା ଏହାକୁ ସକ୍ରିୟ ଭାବରେ ତଦାରଖ କରାଯାଉଛି। ତଟରକ୍ଷୀ ବାହିନୀ, ମତ୍ସ୍ୟ ଓ ଏଆର୍ଡି ବିଭାଗ ଏବଂ ସାମୁଦ୍ରିକ ପୋଲିସ ପକ୍ଷରୁ ମିଳିତ ସାମୁଦ୍ରିକ ପାଟ୍ରୋଲିଂରେ ୨୪ଟି ଟ୍ରଲର, ୩ଟି ଗିଲ୍ ନେଟର୍ ଓ ଗୋଟିଏ ଯାନ୍ତ୍ରିକ ଡଙ୍ଗା ଜବତ ହୋଇଥିବାବେଳେ ୨୨୮ଜଣ ଗିରଫ ହୋଇଛନ୍ତି। ସେହିପରି ଜବତ ୧୫୯.୧ କୁଇଣ୍ଟାଲ ମାଛ ୧୪.୭ ଲକ୍ଷ ଟଙ୍କାରେ ନିଲାମ ହୋଇଥିବା ବିଭାଗ ପକ୍ଷରୁ ସୂଚନା ଦିଆଯାଇଛି।