କୁଜଙ୍ଗ,୧୩।୨(ମନୋଜ ପ୍ରଧାନ): ଅଲିଭ୍ରିଡ୍ଲେ କଇଁଛଙ୍କ ସୁରକ୍ଷା ପାଇଁ କେନ୍ଦ୍ର ସରକାର ପାରାଦୀପରେ କଇଁଛ କରିଡର କରିବାକୁ ବଜେଟରେ ଘୋଷଣା କରିଥିବା ବେଳେ କୁଜଙ୍ଗ ବନାଞ୍ଚଳ ନୂଆଗାଁ ବନକ୍ଷେତ୍ର ଅନ୍ତର୍ଗତ ଜଟାଧାର ତଣ୍ଡାରେ ଦୈନିକ ଶତାଧିକ ଅଲିଭ୍ରିଡ୍ଲେ କଇଁଛ ମରୁଛନ୍ତି। ସେମାନଙ୍କ ସୁରକ୍ଷା ପାଇଁ ବନବିଭାଗ କୌଣସି ପଦକ୍ଷେପ ନେଉନଥିବା ବେଳେ ମୃତ କଇଁଛଗୁଡ଼ିକୁ ତଣ୍ଡାବାଲିରେ ପୋତି ଦିଆଯାଉଛି। ଏନେଇ ପରିବେଶବିତ୍ମାନେ କ୍ଷୋଭ ପ୍ରକାଶ କରିଛନ୍ତି। ନୋଳିଆ ସାହିର ଗଣେଶ ବେହେରାଙ୍କ କହିବାନୁଯାୟୀ, ସେ ଗୁରୁବାର ତଣ୍ଡା ଯାଇଥିବାବେଳେ ବହୁ ସଂଖ୍ୟାରେ ଅଲିଭ୍ରିଡ୍ଲେ କଇଁଛ ସମୁଦ୍ର କୂଳରେ ମରିପଡ଼ିଥିବା ଦେଖିଥିଲେ।
ଏ ସମ୍ପର୍କରେ ଜଣାପଡ଼ିବା ପରେ କୁଜଙ୍ଗ ବନାଞ୍ଚଳ ଅଧିକାରୀ ସଞ୍ଜୟ ପ୍ରଧାନଙ୍କୁ ଯୋଗାଯୋଗ କରିବାରେ ସେ ମୋବାଇଲ୍ ଫୋନ୍ ଉଠାଇ ନ ଥିଲେ। ବନପାଳ ପଦ୍ମନାଭ ରାଉତ କଇଁଛ ମୃତ୍ୟୁ ଘଟଣାକୁ ସ୍ବୀକାର କରିବା ସହ ସେମାନଙ୍କୁ ବାଲିରେ ପୋତିବା ପାଇଁ କର୍ମଚାରୀ ନିୟୋଜିତ ଅଛନ୍ତି ବୋଲି କହିଥିଲେ। ଏତେ ସଂଖ୍ୟାରେ କଇଁଛ ମରିବାର କାରଣ ସମ୍ପର୍କରେ ସେ କହିଛନ୍ତି, ଯେହେତୁ ଉକ୍ତ ଅଞ୍ଚଳ ଅଭୟାରଣ୍ୟ ମୁକ୍ତ, ତେଣୁ ଅବାଧରେ ମତ୍ସ୍ୟଜୀବୀମାନେ ଟ୍ରଲର ସାହାଯ୍ୟରେ ମାଛ ଧରୁଛନ୍ତି। ଜାଲ ଓ ଟ୍ରଲର ମାଡ଼ରେ କଇଁଛଙ୍କ ମୃତ୍ୟୁ ଘଟୁଛି। ପ୍ରକାଶ ଯେ, ଅଲିଭ୍ରିଡ୍ଲେ କଇଁଛମାନେ ସାଧାରଣତଃ ଫେବୃଆରୀ, ମାର୍ଚ୍ଚରେ ଅଣ୍ଡା ଦିଅନ୍ତି। ସେମାନେ ନଭେମ୍ବରରୁ କୂଳମୁହାଁ ହୁଅନ୍ତି। କଇଁଛମାନଙ୍କ ସୁରକ୍ଷା ଓ ନିରାପଦ ଅଣ୍ଡାଦାନ ନିମନ୍ତେ ଅଭୟାରଣ୍ୟ ଅଞ୍ଚଳରେ ଟ୍ରଲରରେ ମାଛଧରା ଉପରେ କଟକଣା ଥାଏ। ଯେହେତୁ ଜଟାଧାର ତଣ୍ଡା ଅଞ୍ଚଳ ଏକ ମୁକ୍ତ ଅଞ୍ଚଳ, ଏଠାରେ ମତ୍ସ୍ୟଜୀବୀ ମାନେ ଟ୍ରଲ୍ରରେ ମାଛ ଧରିଥା’ନ୍ତି।
