ନୂଆଦିଲ୍ଲୀ,୧୬।୨: ବିଗତ ୯ ମାସରୁ ଅଧିକ ସମୟ ହେବ ପେଟ୍ରୋଲ ଏବଂ ଡିଜେଲ ମୂଲ୍ୟରେ କୌଣସି ପ୍ରକାର ପରିବର୍ତ୍ତନ ହୋଇନାହିଁ। ଏପରିକି ଅନ୍ତଃରାଷ୍ଟ୍ରୀୟ ତୈଳ ବଜାରରେ ତେଲ ଦର କମିଥିବା ବେଳେ ଭାରତ ବଜାରରେ ତୈଳ ଦର ସ୍ଥିର ରହିବାକୁ ନେଇ ଉଭୟ ବିରୋଧୀ ଓ ଖାଉଟି ସରକାରଙ୍କୁ ବିଭିନ୍ନ ସମୟରେ ଆକ୍ଷେପ କରୁଛନ୍ତି। ହେଲେ ଖୁବ୍ଶୀଘ୍ର ଭାରତ ବଜାରରେ ତେଲ ଦର (ପେଟ୍ରୋଲ-ଡିଜେଲ) ହ୍ରାସ ପାଇପାରେ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି। ବିଶେଷକରି ତେଲକୁ ଜିଏସ୍ଟି ପରିସରକୁ ଆଣିବା ନେଇ ସରକାର ଯୋଜନା କରୁଥିବା ଜଣାପଡ଼ିଛି। ଏପରିକି ଚଳିତ ମାସ ୧୮ ତାରିଖରେ ହେବାକୁ ଥିବା ଜିଏସ୍ଟି କାଉନସିଲ ବୈଠକରେ କେନ୍ଦ୍ର ସରକାର କିଛି ଉତ୍ପାଦ ଉପରୁ ଟିକସ ହ୍ରାସ ସମ୍ପର୍କରେ ଘୋଷଣା କରିପାରନ୍ତି ବୋଲି ବିଶେଷ ସୂତ୍ରରୁ ଜଣାପଡିଛି। ସେହିଭଳି ପେଟ୍ରୋଲ, ଡିଜେଲ ଉପରୁ ମଧ୍ୟ ଟିକସ ହ୍ରାସ ହୋଇପାରେ ବୋଲି ବଜାର ବିଶେଷଜ୍ଞ ଆକଳନ କରୁଛନ୍ତି। କାରଣ ଅଶୋଧିତ ତୈଳର ବୈଶ୍ୱିକ ମୂଲ୍ୟରେ ବ୍ୟାପକ ହ୍ରାସ ଘଟିଛି। ଏପରିକି ବର୍ତ୍ତମାନ ସମୟରେ ଅଶୋଧିତ ତୈଳର ମୂଲ୍ୟ ସ୍ଥିର ହୋଇ ରହିଛି।
ବ୍ରେଣ୍ଟ ଅଏଲ ଫ୍ୟୁଚର୍ସ ହ୍ରାସ ସହ ବୁଧବାର ୮୪.୩୨ ଡଲାର ପ୍ରତି ବ୍ୟାରେଲ ପିଛା ବ୍ୟବସାୟ କରୁଥିଲା। ଏପରିକି ତୈଳ କମ୍ପାନୀଗୁଡିକ ମଧ୍ୟ ଏହାର ଲାଭ ବର୍ତ୍ତମାନ ସୁଦ୍ଧା ଗ୍ରାହକଙ୍କୁ ଦେଇନାହାନ୍ତି। ସେହିପରି କମ୍ପାନୀଗୁଡିକ ପୂର୍ବ କ୍ଷତିକୁ ଭରଣା କରିବାରେ ଲାଗିଛନ୍ତି ବୋଲି କହୁଥିବା ବେଳେ ପ୍ରକୃତ କଥା କାହାକୁ ଜଣାନାହିଁ। ଅପରପକ୍ଷରେ ଭାରତ ନିଜ ଆବଶ୍ୟକତାର ଦୁଇତୃତୀୟାଂଶରୁ ଅଧିକ ତେଲ ବିଭିନ୍ନ ରାଷ୍ଟ୍ରରୁ ଆମଦାନୀ କରିଥାଏ। ବିଶେଷକରି ଖୁଚୁରା ମୁଦ୍ରାସ୍ଫୀତିକୁ କମ୍ କରିବା ପାଇଁ ଆର୍ବିଆଇ ଦ୍ୱାରା କରାଯାଇଥିବା ସୁପାରିସ ଉପରେ ମଧ୍ୟ ସରକାର ନିଷ୍ପତ୍ତି ନେଇପାରନ୍ତି ବୋଲି କୁହାଯାଉଛି। ଅପରପକ୍ଷରେ ସରକାର ମକା ଏବଂ ତୈଳ ଉପରୁ ଟିକସ ହ୍ରାସ କରିପାରନ୍ତି ବୋଲି ଆକଳନ କରାଯାଉଛି ବୋଲି ନ୍ୟୁଜ୍ ଏଜେନ୍ସି ରଏଟର୍ସ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଏହା ଉଲ୍ଲେଖ କରାଯାଥିବା ଜଣାପଡିଛି। ତେବେ ୨୦୨୩ ଫେବୃୟାରୀର ଦରବୃଦ୍ଧି ହାରକୁ ହ୍ରାସ କରିବା ପରେ ହିଁ ସରକାର କୌଣସି ନିଷ୍ପତ୍ତି ଗ୍ରହଣ କରିବେ ବୋଲି ବଜାର ବିଶେଷଜ୍ଞମାନେ ଆକଳନ କରିଛନ୍ତି। ଏପରିକି ୨୦୨୩ ଜାନୁୟାରୀରେ ଭାରତର ମୁଦ୍ରାସ୍ଫୀତି ହାର ୬.୫୨% ରହିଥିଲା, ଯାହା ୨୦୨୨ ଡିସେମ୍ବରରେ ୫.୭୨% ଥିଲା।
