ଭୁବନେଶ୍ୱର,୨୮।୬(ବ୍ୟୁରୋ): ଗତ ୨୧ ଦିନ ହେବ ଦେଶରେ ପେଟ୍ରୋଲ ଓ ଡିଜେଲ ଦର ବଢି ଚାଲିଛି। କରୋନା ପାଇଁ ବର୍ତ୍ତମାନ ଲୋକମାନେ ବିଭିନ୍ନ ସମସ୍ୟାରେ ଥିବା ବେଳେ ତେଲ ଦରରେ ବିରତି ଲାଗୁ ନ ଥିବାରୁ ଏହା ଖାଉଟିଙ୍କୁ ସମସ୍ୟାରେ ପକାଇଥିବା ଜଣାପଡିଛି। କରୋନା ସଂକ୍ରମଣ ବୃଦ୍ଧିକୁ ନଜରରେ ରଖି ସରକାର ଲକ୍ଡାଉନ କଟକଣା ଜାରି କରିଥିଲେ। ଏହା ଦ୍ୱାରା ଲୋକଙ୍କର ଜୀବନ ଜୀବିକା ଗଭୀର ଭାବେ କ୍ଷତିଗ୍ରସ୍ତ ହୋଇଛି। ଏହି ସମୟରେ ଲଗାତର ତେଲ ଦର ବୃଦ୍ଧି ହେଉଥିବାରୁ ଗ୍ରାହକଙ୍କ ମଧ୍ୟରେ ଗଭୀର ଅସନ୍ତୋଷ ଦେଖାଯାଇଛି। ଏବେ ତେଲ ଦର ଆକାଶ ଛୁଆଁ ହୋଇଥିବା ବେଳେ ଶନିବାର ଡିଜେଲ ଲିଟର ପିଛା ୨୧ ପଇସା ଏବଂ ପେଟ୍ରୋଲ ୨୫ ପଇସା ବଢିଛି। ଫଳରେ ବର୍ତ୍ତମାନ ଖାଉଟି ଡିଜେଲ ଉପରେ ଲିଟର ପିଛା ୧୧.୦୨ ଟଙ୍କା ଏବଂ ପେଟ୍ରୋଲ ୯.୧୨ ଟଙ୍କା ଅତିରିକ୍ତ ଦେୟ ବହନ କରୁଛନ୍ତି। ଶନିବାର ଭୁବନେଶ୍ୱରର ପେଟ୍ରୋଲ ଲିଟର ପିଛା ୮୦.୯୪ ଟଙ୍କା ଓ ଡିଜେଲ ୭୮.୫୫ ଟଙ୍କା ଛୁଇଁଥିବା ପ୍ରମୁଖ ତୈଳ କମ୍ପାନୀଗୁଡିକ ସୂଚନା ଦେଇଛନ୍ତି।
ସେହିଭଳି ଦିଲ୍ଲୀରେ ପେଟ୍ରୋଲ ଦର ୮୦.୧୩ ଟଙ୍କାରୁ ବୃଦ୍ଧି ଘଟି ୮୦.୩୮ଟଙ୍କା ଛୁଇଁଛି। ଏହି ସମୟରେ ଡିଜେଲ ଦର ୮୦.୧୯ ଟଙ୍କାରୁ ୮୦.୪୦ ଟଙ୍କାରେ ପହଞ୍ଚତ୍ଛି। ଦେଶର ଅନ୍ୟ ପ୍ରମୁଖ ମେଟ୍ରୋ ସହର କୋଲ୍କତାରେ ପେଟ୍ରୋଲ ୮୨.୦୫ଟଙ୍କା ଓ ଡିଜେଲ ୭୫.୫୨ ଟଙ୍କା, ମୁମ୍ବାଇରେ ପେଟ୍ରୋଲ ୮୭.୧୪ଟଙ୍କା ଓ ଡିଜେଲ ୭୮.୭୧ ଟଙ୍କା ଏବଂ ଚେନ୍ନାଇରେ ପେଟ୍ରୋଲ ୮୩.୫୯ ଟଙ୍କା ଓ ଡିଜେଲ ୭୭.୬୧ଟଙ୍କା ରହିଛି। ବର୍ତ୍ତମାନ ଅନ୍ତର୍ଜାତୀୟ ତୈଳ ବଜାରରୁ ତେଲ ଆମଦାନୀ ଜନିତ ସମସ୍ୟା କମ୍ପାନୀ ସାମ୍ନା କରୁଛନ୍ତି। ଅପରପକ୍ଷରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଲାଗୁ କରାଯାଉଥିବା ବିଭିନ୍ନ ଟିକସ ତେଲ ଦର ବୃଦ୍ଧିର ଅନ୍ୟତମ ପ୍ରମୁଖ କାରଣ ବୋଲି ତୈଳ ବିପଣନ କମ୍ପାନୀଗୁଡିକ ସୂଚନା ଦେଇଛନ୍ତି। ଚଳିତ ମାସ ଜୁନ ୭ ରୁ ଆଜି ପର୍ଯ୍ୟନ୍ତ (ଶନିବାର) ଦେଶର ତେଲ ଦର ବଢି ଚାଲିଛି। ଏହି ତେଲ ଦର ବୃଦ୍ଧିକୁ ବିରୋଧ କରି ଯୁବ କଂଗ୍ରେସ ପକ୍ଷରୁ ରାଜଧାନୀ ବିକ୍ଷୋଭ ପ୍ରର୍ଦଶନ କରାଯାଇଛି।
