ନୂଆଦିଲ୍ଲୀ,୨୬।୬: କରୋନା ସଂକ୍ରମଣ ଜନିତ ସମସ୍ୟା ମଧ୍ୟରେ ଦେଶରେ କ୍ରମାଗତ ଭାବେ ତୈଳଦର ବୃଦ୍ଧି ପାଇବାରେ ଲାଗିଛି। ଶୁକ୍ରବାର ଲଗାତାର ୨୦ ଦିନ ପାଇଁ ତେଲ ଦର ବଢ଼ିଛି। ପେଟ୍ରୋଲ ଲିଟର ପିଛା ୨୧ ପଇସା ବୃଦ୍ଧି ପାଇଛି। ସେହିଭଳି ଡିଜେଲ ଲିଟର ପିଛା ୧୭ ପଇସା ବଢ଼ିଛି। ୨୦ ଦିନରେ ପେଟ୍ରୋଲ ମୋଟ ୮ ଟଙ୍କା ୮୭ ପଇସା ମହଙ୍ଗା ହୋଇଥିବା ବେଳେ ଡିଜେଲ ୧୦ ଟଙ୍କା ୮୦ ପଇସା ବୃଦ୍ଧି ପାଇଛି।
ଦିଲ୍ଲୀରେ ପେଟ୍ରୋଲ ଲିଟର ପିଛା ୭୯.୯୨ ଟଙ୍କାରୁ ବଢ଼ି ୮୦.୧୩ ଟଙ୍କା ହୋଇଛି। ସେହିଭଳି ଡିଜେଲ ଲିଟର ପିଛା ୮୦.୧୯ ଟଙ୍କା ହୋଇଛି। ସେହିଭଳି ବମ୍ବେରେ ପେଟ୍ରୋଲ ୮୬.୯୧ଟଙ୍କା, ଡିଜେଲ ୭୮.୫୧ ଟଙ୍କା ପ୍ରତି ଲିଟର ରହିଛି। ଚେନ୍ନାଇରେ ପେଟ୍ରୋଲ ୮୦.୩୭ ଟଙ୍କା ଏବଂ ଡିଜେଲ ୭୭.୪୪ ଟଙ୍କା ରହିଛି। ସେହିଭଳି କୋଲକାତାରେ ପେଟ୍ରୋଲ ୮୧.୮୨ ଟଙ୍କା, ଡିଜେଲ ୭୫.୩୪ ଟଙ୍କା ଏବଂ ନୋଏଡାରେ ପେଟ୍ରୋଲ ୮୦.୮୫ ଟଙ୍କା ଏବଂ ଡିଜେଲ ୭୨.୨୯ ଟଙ୍କା ହୋଇଛି।
ତେବେ ଅନ୍ତର୍ଜାତୀୟ ତୈଳ ବଜାରର ଦର ହ୍ରାସ ନ ହେବା ପର୍ଯ୍ୟନ୍ତ ତେଲ ଦର ବୃଦ୍ଧିରେ ରୋକ ଲଗାଯାଇପାରିବ ନାହିଁ ବୋଲି ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀଗୁଡ଼ିକ ମତ ରଖୁଛନ୍ତି। ଏପରିସ୍ଥିତିରେ ଚଳିତ ମାସ ଜୁନ୍ ୭ ତାରିଖରୁ ଆଜି ପର୍ଯ୍ୟନ୍ତ ଦେଶର ତେଲ ଦର କ୍ରମାଗତ ଭାବରେ ବୃଦ୍ଧି ପାଇ ଚାଲିଛି। ଏହି ଦରବୃଦ୍ଧିକୁ ନେଇ ବିଭିନ୍ନ ଅନୁଷ୍ଠାନ, ସଂଗଠନ ଏବଂ ରାଜନୈତିକ ଦଳଗୁଡ଼ିକ ପକ୍ଷରୁ ବିରୋଧ ପ୍ରଦର୍ଶନ କରାଯିବା ସହ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
