ଭୁବନେଶ୍ୱର,୬ା୭(ବ୍ୟୁରୋ): ଦିବ୍ୟାଙ୍ଗ ଅଙ୍ଗନଓ୍ବାଡି କର୍ମୀଙ୍କୁ ଘର ନିକଟ କେନ୍ଦ୍ରରେ ତୁରନ୍ତ ନିଯୁକ୍ତି ଦେବାକୁ ଓଡ଼ିଶା ମାନବିକ ଅଧିକାର କମିଶନ (ଓଏଚ୍ଆର୍ସି) ବଲାଙ୍ଗୀର ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ଏହାସହ ଦିବ୍ୟାଙ୍ଗଙ୍କୁ କାହିଁକି ତାଙ୍କ ଘର ଅଙ୍ଗନଓ୍ବାଡିରେ ନିଯୁକ୍ତି ଦିଆଯାଇ ନ ଥିଲା ସେନେଇ ଅଗଷ୍ଟ ୭ ସୁଦ୍ଧା ରିପୋର୍ଟ ଦେବାକୁ କମିଶନ ଡିଏସ୍ଡବ୍ଲ୍ୟୁଓ ଏବଂ ଉପଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ବଲାଙ୍ଗୀରର ଦିବ୍ୟାଙ୍ଗ ଅଙ୍ଗନଓ୍ବାଡି କର୍ମୀ ମମତାରାଣୀ ପଣ୍ଡାଙ୍କ ଏକ ପିଟିଶନର ଶୁଣାଣି କରି କମିଶନ ଏହି ରାୟ ଦେଇଛନ୍ତି।
ସୂଚନା ଅନୁଯାୟୀ, ମମତାରାଣୀଙ୍କୁ ତାଙ୍କ ଘରଠାରୁ ପ୍ରାୟ ୩ କିମି ଦୂର ବଲାଙ୍ଗୀର ବ୍ଲକ ଅନ୍ତର୍ଗତ ଚୁଡାପାଲି ଅଙ୍ଗନଓ୍ବାଡ଼ି କେନ୍ଦ୍ର-ସିରେ ନିଯୁକ୍ତି ଦିଆଯାଇଛି। ସେ ଜଣେ ଦିବ୍ୟାଙ୍ଗ ହୋଇଥିବାରୁ ଭାଇଙ୍କ ସାହାଯ୍ୟରେ ଅଙ୍ଗନଓ୍ବାଡ଼ି କେନ୍ଦ୍ରକୁ ନିୟମିତ ଯାଉଥିଲେ। ହେଲେ ୨୦୧୫ ନଭେମ୍ବର ୨୦ରେ ଭାଇଙ୍କ ମୃତ୍ୟୁ ପରେ ଯିବା ଆସିବାରେ ତାଙ୍କର ସମସ୍ୟା ହୋଇଥିଲା। ଅନ୍ୟପକ୍ଷରେ ଚୁଡ଼ାପାଲି ଅଙ୍ଗନଓ୍ବାଡି କେନ୍ଦ୍ର-ବି ଦାୟିତ୍ୱରେ ଥିବା ଅଙ୍ଗନଓ୍ବାଡ଼ି କର୍ମଚାରୀଙ୍କର ୨୦୧୭ ଜାନୁୟାରୀ ୨୪ରେ ମୃତ୍ୟୁ ଘଟିଥିଲା। ଏହାପରେ ଘରଠାରୁ କିଛିଦୂରରେ ରହିଥିବା ଉକ୍ତ କେନ୍ଦ୍ରର ଅତିରିକ୍ତ ଦାୟିତ୍ୱ ମମତାରାଣୀଙ୍କୁ ମଧ୍ୟ ଦିଆଗଲା। ମମତାରାଣୀ କିଛିଦିନ ଉଭୟ ଅଙ୍ଗନଓ୍ବାଡ଼ି କେନ୍ଦ୍ରର ଦାୟିତ୍ୱ ବୁଝୁଥିବାବେଳେ ଚୁଡ଼ାପାଲି ଅଙ୍ଗନଓ୍ବାଡ଼ି କେନ୍ଦ୍ର-ବି’ରେ ଖାଲି ପଡିଥିବା ପଦବୀ ପାଇଁ ବିଜ୍ଞାପନ ବାହାରିଥିଲା। ତେଣୁ ଘରପାଖରେ ଥିବା ଉକ୍ତ କେନ୍ଦ୍ରରେ ତାଙ୍କୁ ନିୟମିତ ଭାବେ ଅବସ୍ଥାପିତ କରିବାକୁ ଦିବ୍ୟାଙ୍ଗ ମମତାରାଣୀ ବିଭାଗୀୟ ଅଧିକାରୀଙ୍କୁ ନିବେଦନ କରିଥିଲେ। ହେଲେ ତାଙ୍କୁ ବାଦ୍ ଦେଇ ୨୦୧୯ ନଭେମ୍ବର ୧୪ରେ ଉକ୍ତ କେନ୍ଦ୍ରରେ ଆଉଜଣଙ୍କୁ ନିଯୁକ୍ତ କରାଗଲା। ଏନେଇ ମମତାରାଣୀ ଉପରିସ୍ଥ ଅଧିକାରୀଙ୍କ ନିକଟକୁ ଦୌଡି ନିରାଶ ହେବାପରେ ଓଏଚ୍ଆରସିଙ୍କ ଦ୍ୱାରସ୍ଥ ହୋଇଥିଲେ। ଏପରିକି ଚୁଡ଼ିପାଲି ଅଙ୍ଗନଓ୍ବାଡି କେନ୍ଦ୍ରରେ ନବନିଯୁକ୍ତ କର୍ମୀଙ୍କ ସହ ମମତାରାଣୀ ପାରସ୍ପାରିକ ବୁଝାମଣା କରି ସ୍ଥାନାନ୍ତର ପାଇଁ ରାଜିହୋଇ ଉପରିସ୍ଥ ଅଧିକାରୀଙ୍କ ନିକଟରେ ଆବେଦନ କରିଥିଲେ। ଏହାକୁ ଜିଲା ସାମାଜିକ କଲ୍ୟାଣ ଅଧିକାରୀ ମଧ୍ୟ ଅନୁମୋଦନ କରିଥିଲେ ମଧ୍ୟ ଉପଜିଲାପାଳଙ୍କ ନିର୍ଦ୍ଦେଶ ଯୋଗୁ ବନ୍ଦ ରହିଥିଲା ବୋଲି ମମତାରାଣୀ ଅଭିଯୋଗ କରିଥିଲେ।
