ଥୁଆମୂଳରାମପୁର,୭ା୨(ଦୁର୍ଗା କୀର୍ତ୍ତି): କଳାହାଣଣ୍ଡି ଜିଲା ଥୁଆମୂଳରାମପୁର ବ୍ଲକ ଗୋପୀନାଥପୁର ପଞ୍ଚାୟତର ଫଟକି ମହୁଲ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ଶନିବାର ଅନୁଷ୍ଠିତ ଭୀମ ଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର ଏକ ପ୍ରକାର ପ୍ରହସନରେ ପରିଣତ ହୋଇଛି। ସରକାରୀ ଯୋଜନାର ସୁଫଳ ଭିନ୍ନକ୍ଷମଙ୍କ ପାଖରେ ପହଞ୍ଚାଇବା ପରିବର୍ତ୍ତେ ଏଠାରେ ନିୟୋଜିତ ଅଧିକାରୀ ଓ ଡାକ୍ତରଙ୍କ ଆକ୍ରୋଶମୂଳକ ବ୍ୟବହାର ଦେଖିବାକୁ ମିଳିଛି। ବିଶେଷ କରି ଖବର ସଂଗ୍ରହ ବେଳେ ସାମ୍ବାଦିକଙ୍କୁ ଦୁର୍ବ୍ୟବହାର ଓ ଭିଡିଓ କରିବାକୁ ବାରଣ କରାଯିବା ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି।
‘ଆମ ଇଚ୍ଛା ଆମେ କାମ କରିବୁ କି ନାହିଁ’
ଶିବିରରେ ମୁକ ଓ ବଧିର ଏବଂ ମସ୍ତିସ୍କ ଜନିତ ଅକ୍ଷମତା ବିଭାଗର ଡାକ୍ତରମାନେ ସେବା ଯୋଗାଇବା ପରିବର୍ତ୍ତେ ଆରାମରେ ବସିଥିବାର ଦୃଶ୍ୟ ସାମ୍ବାଦିକ ଜଣକ କଏଦ କରୁଥିବା ବେଳେ ଜଣେ ବିଶେଷଜ୍ଞ ଉତ୍ତ୍ୟକ୍ତ ହୋଇ କହିଥିଲେ, “ତୁମକୁ କିଏ କହିଲା ଭିଡିଓ କରିବାକୁ? ଆମ ଇଚ୍ଛା ଆମେ କାମ କରିବୁ କି ନାହିଁ”।
ଅନ୍ୟପଟେ ଘଟଣାର ସମାଧାନ କରିବା ବଦଳରେ ବ୍ଲକ ସାମାଜିକ ସୁରକ୍ଷା ଅଧିକାରୀ (BSSO) ସୁନାରାମ ସୋରେନ ସାମ୍ବାଦିକଙ୍କୁ ଭିଡିଓ ଡିଲିଟ କରିବାକୁ ନିର୍ଦ୍ଦେଶ ଦେଇଥିଲେ। ଜନସାଧାରଣଙ୍କ ଟିକସ ପଇସାରେ ମୋଟା ଅଙ୍କର ଦରମା ଓ ଏଭଳି ଶିବିର ଆୟୋଜନ କଲେ ଟିଏଡିଏ (TA/DA) ନେଉଥିବା ଏହି ଅଧିକାରୀମାନେ ନିଜକୁ ‘ଜନସେବକ’ ନୁହେଁ ବରଂ ‘ଶାସକ’ ମନେ କରୁଥିବା ଅଭିଯୋଗ ହୋଇଛି। ବ୍ଲକ କାର୍ଯ୍ୟାଳୟଠାରୁ ପ୍ରାୟ ୩୫ ରୁ ୫୫ କିମି ଦୂରରେ ଶିବିର ହୋଇଥିବାରୁ ସିଲେଟ, ତାଳନଗି ଓ ପୋଡ଼ାପଦର୍ ଭଳି ଦୁର୍ଗମ ଅଞ୍ଚଳର ଅନେକ ଭିନ୍ନକ୍ଷମ ପହଞ୍ଚି ପାରି ନ ଥିଲେ। BSSO ୧୫୯ ଜଣଙ୍କ ପଞ୍ଜିକରଣ ହୋଇଥିବା କହୁଥିବା ବେଳେ ବାସ୍ତବରେ ମାତ୍ର ୧୨୦-୧୩୦ ଜଣ ଆସିଥିବା ସୂଚନା ମିଳିଛି।
ଏପରିକି ଅନେକ ଯୋଗ୍ୟ ହିତାଧିକାରୀଙ୍କୁ ବାଡ଼ି କିମ୍ବା କ୍ରଚ ଆଦି ଦିଆଯାଇ ନାହିଁ। ଡୁମେରପଦରର ମନହର ନାଏକଙ୍କୁ ‘ସାଇଜ ସମସ୍ୟା’ ଦର୍ଶାଇ ଖାଲି ହାତରେ ଫେରାଇ ଦିଆଯାଇଥିବା ବେଳେ, ଅନେକଙ୍କର ୭୦-୮୦ ପ୍ରତିଶତ ଅକ୍ଷମତା ଥିଲେ ମଧ୍ୟ ସାର୍ଟିଫିକେଟରେ କମ ପ୍ରତିଶତ (%) ଦର୍ଶାଯାଇଥିବାରୁ ସେମାନେ ସରକାରୀ ସୁବିଧାରୁ ବଞ୍ଚିତ ହେଉଛନ୍ତି।
ମୁଖ୍ୟ ଘଟଣା
* ସାମ୍ବାଦିକଙ୍କୁ ବାରଣ: କାର୍ଯ୍ୟରେ ଅବହେଳା ଲୁଚାଇବାକୁ ଗଣମାଧ୍ୟମ ପ୍ରତିନିଧିଙ୍କୁ ଦୁର୍ବ୍ୟବହାର।
* ସେବାରେ ତ୍ରୁଟି: ଅନେକ ଭିନ୍ନକ୍ଷମଙ୍କୁ ଉପକରଣ ନମିଳିବାରୁ ଅସନ୍ତୋଷ।
* ଶିକ୍ଷା ବ୍ୟାହତ: ସ୍କୁଲ ବନ୍ଦ କରି କାର୍ଯ୍ୟକ୍ରମ ଆୟୋଜନ ହେଉଥିବାରୁ ଅଭିଭାବକଙ୍କ କ୍ଷୋଭ।
ଏହି ଶିବିରରେ ବିଜେପି ନେତା ପବିତ୍ର ନାଏକ, ବିଷ୍ଣୁ ନାଏକ, ସରପଞ୍ଚ ଧନସିଂ ମାଝୀ, PEO ଗୋରାସିଂ ମାଝୀ ଏବଂ MI ବିଭୁ ରଞ୍ଜନ ସାହୁ ପ୍ରମୁଖ ଉପସ୍ଥିତ ଥିଲେ। ଗଣତାନ୍ତ୍ରିକ ଅଧିକାରର ହନନ କରୁଥିବା ଏଭଳି ଅହଂକାରୀ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
Dharitri – Odisha’s No.1 Odia Daily