ଛତ୍ରପୁର ,୧୯।୧୧(ଦିଲ୍ଲୀପ ସାମଲ): ଗଞ୍ଜାମ ଜିଲା ରମ୍ଭା ଥାନା ଅଧିନ କଳାଜମୁନା ଶ୍ରୀ ସାଇ ସରସ୍ବତୀ ଶିଶୁ ବିଦ୍ୟାମନ୍ଦିରର ୫ମ ଶ୍ରେଣୀ ଛାତ୍ର କିରଣ ପ୍ରଧାନଙ୍କ ମୃତ୍ୟୁ ଘଟଣାରେ ନୂଆ ମୋଡ଼। ଏସ୍ଆଇଟି କିମ୍ବା କ୍ରାଇମବ୍ରାଞ୍ଚ ତଦନ୍ତ କରି ଦୋଷୀମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ମଙ୍ଗଳବାର ଗଞ୍ଜାମ ଏସ୍ପିଙ୍କୁ ମୃତ ଛାତ୍ରଙ୍କ ପରିବାର ଏବଂ ଗ୍ରାମବାସୀ ଭେଟିଛନ୍ତି। ଛତ୍ରପୁର ଥାନା ଅନ୍ତର୍ଗତ କମାପଲ୍ଲୀ ଗ୍ରାମର ପ୍ରହ୍ଲାଦ ପ୍ରଧାନଙ୍କ ପୁଅ କିରଣ ପ୍ରଧାନ ଗଞ୍ଜାମ ବ୍ଲକ ଅନ୍ତର୍ଗତ କଳାଜମୁନା ଶ୍ରୀ ସାଇ ସରସ୍ବତୀ ଶିଶୁ ବିଦ୍ୟାମନ୍ଦିରରେ ରହି ପାଠ ପଢୁଥିଲେ। ତାଙ୍କୁ ଷଡ଼ଯନ୍ତ୍ର କରି ବିଷ ଦେଇ ମାରି ଦିଆଯାଇଥିବା ମୃତ କିରଣଙ୍କ ବାପା ପ୍ରହ୍ଲାଦ ଲିଖିତ ଭାବେ ଏସ୍ପି ଶୁଭେନ୍ଦୁ କୁମାର ପାତ୍ରଙ୍କ ନିକଟରେ ଅଭିଯୋଗ କରିଛନ୍ତି।
ଗତ ଅଗଷ୍ଟ ୨୫ରେ କିରଣଙ୍କ ଦେହ ଖରାପ ହେବା ଭାବି ସ୍କୁଲ କର୍ତ୍ତୃପକ୍ଷ ତାଙ୍କୁ ତୁରନ୍ତ ଛତ୍ରପୁର ମେଡିକାଲ ଆଣିଥିଲେ। ଏହାର ସୂଚନା ପାଇ କିରଣଙ୍କ ବାପାମା’ ଛତ୍ରପୁର ମେଡିକାଲରେ ପହଞ୍ଚିଥିଲେ। ସେତେବେଳେ କିରଣ କଥାବାର୍ତ୍ତା କରୁଥିବାରୁ ବାପାମା’ଙ୍କୁ କହିଥିଲେ, ‘ସ୍କୁଲରେ ପାଠ ପଢ଼ୁଥିବା ସମ୍ପର୍କୀୟ ଭାଇ ଲିଟୁ ପ୍ରଧାନ ପାଣି ବୋତଲରେ କିଛି କଳା ଜିନିଷ ମିଶାଇ ବାଧ୍ୟ କରି ପିଇବା ପାଇଁ କହିଥିଲେ। ସେ ସେହି ପାଣିକୁ ପିଇ ଦେଇଥିଲେ। ଏହାର କିଛି ସମୟ ପରେ ତାଙ୍କୁ ବାନ୍ତି ହେବା ସହ ମୁଣ୍ଡ ବୁଲାଇଥିଲା। ଏନେଇ ସେ ସ୍କୁଲ ସାରଙ୍କୁ ଜଣାଇଥିଲେ। ’ ଏନେଇ ପ୍ରହ୍ଲାଦ ନିଜ ଅଭିଯୋଗପତ୍ରରେ ଦର୍ଶାଇଛନ୍ତି। ପୂର୍ବରୁ ଲିଟୁଙ୍କ ପରିବାର ସହ ଜମିଜମା ବିବାଦ ରହିଛି। ଏଣୁ ତାଙ୍କ ପରିବାର ଷଡ଼ଯନ୍ତ୍ର କରି ଏଭଳି ଜଘନ୍ୟ କାଣ୍ଡ ଘଟାଇଥିବା ସେ ସନ୍ଦେହ କରୁଥିବା ପ୍ରହ୍ଲାଦ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ଏହାର ଏସ୍ଆଇଟି କିମ୍ବା କ୍ରାଇମବ୍ରାଞ୍ଚ ତଦନ୍ତ କରି ଦୋଷୀମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରି ସେମାନଙ୍କୁ ନ୍ୟାୟ ପ୍ରଦାନ କରିବା ନିମନ୍ତେ କମାପଲ୍ଲୀ ଗ୍ରାମବାସୀ ଓ ମୃତ କିରଣଙ୍କ ପରିବାରବର୍ଗ ଗଞ୍ଜାମ ଏସ୍ପିଙ୍କୁ ଅନୁରୋଧ କରିଛନ୍ତି। ଏହି ଅବସର ରେ ଆଇନଜୀବି ଚୈତନ୍ୟ ପ୍ରଧାନ, ଭିକାରୀପଲ୍ଲୀ ପଞ୍ଚାୟତର ପୂର୍ବତନ ସମିତି ସଭ୍ୟ ଭାଗିରଥୀ ପ୍ରଧାନ, ମଥୁରା ଚରଣ ସୁବୁଦ୍ଧି, ମାଗତା ପାତ୍ର, ପ୍ରଭାସି ବେହେରା, ପୂର୍ବତନ ସରପଞ୍ଚ ଗାଣ୍ଡୁଧର ଗୌଡ଼ଙ୍କ ସମେତ କମାପଲ୍ଲୀ ଗ୍ରାମର ଶତାଧିକ ମହିଳା ଓ ପୁରୁଷ ମାନେ ଉପସ୍ଥିତ ଥିଲେ।
