ବ୍ରହ୍ମପୁର,୧୮ା୧୨(ସ୍ମୃତି ରଂଜନ ମହାଲିକ)-ବିବାଦରୁ ଦୂରେଇ ଶୃଙ୍ଖଳିତ ହୁଅ। ମିଳିମିଶି ଦଳର ସଂଗଠନକୁ ଅଧିକ ମଜଭୁତ ପାଇଁ କାମ କର। ବ୍ରହ୍ମପୁର ମହାନଗର ନିଗମ (ବିଇଏମ୍ସି)ର ବିଜେଡି କର୍ପୋରେଟରମାନଙ୍କୁ ଏହି ପରାମର୍ଶ ଦେଇଛନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ। ସମୁଦାୟ ୩୬ କର୍ପୋରେଟରଙ୍କ ମଧ୍ୟରୁ ବୁଧବାର ସାରେ ନବୀନଙ୍କୁ ଭେଟିଥିଲେ ୩୩ କର୍ପୋରେଟର। ସାଙ୍ଗରେ ଥିଲେ ଜିଲା ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ପୂର୍ବତନ ବିଧାୟକ ବିକ୍ରମ ପଣ୍ଡା, ମେୟର ସଂଘମିତ୍ରା ଦଳେଇ ଓ ଡେପୁଟି ମେୟର ବିବେକ। ସେମାନଙ୍କୁ ସାକ୍ଷାତ ପାଇଁ ନବୀନ ନିବାସରୁ ଡକରା ହୋଇଥିଲା। ସମସ୍ତେ ପ୍ରଥମେ ଶଙ୍ଖ ଭବନକୁ ଯାଇଥିଲେ। ସେଠାରେ ବରିଷ୍ଠ ନେତା ଦେବୀ ମିଶ୍ର ଓ ଅନ୍ୟମାନଙ୍କ ସହ ଆଲୋଚନା କରିଥିଲେ।
ସୂଚନାଯୋଗ୍ୟ, ଗତ ସାଧାରଣ ନିର୍ବାଚନ ପରଠାରୁ ବିଇଏମ୍ସି ବିଜେଡି କର୍ପୋରେଟରଙ୍କ ମଧ୍ୟରେ ଗୋଷ୍ଠୀ କନ୍ଦଳ ବଢ଼ି ଚାଲିଛି। ଗୋଟିଏ ଗୋଷ୍ଠୀ ଜିଲା ସଭାପତି, ମେୟର ଓ ଡେପୁଟି ମେୟରଙ୍କ ପକ୍ଷରେ ଥିବା ବେଳେ ଅନ୍ୟ ଗୋଷ୍ଠୀ ବିକ୍ରମଙ୍କ ସପକ୍ଷରେ ଅଛନ୍ତି। ବ୍ରହ୍ମପୁର ବିଧାନସଭା କ୍ଷେତ୍ରରେ କିଏ ନେତୃତ୍ୱ ଜାହିର କରିବ ସେନେଇ ବିବାଦ ସୂତ୍ରପାତ ହୋଇଥିବା କେତେକ କର୍ପୋରେଟର ଓ ଦଳର କର୍ମୀଙ୍କ ମହଲରେ ଚର୍ଚ୍ଚା ହେଉଛି। ଫଳରେ ବିବାଦ କ୍ରମଶଃ ଜଟିଳ ହେବାରେ ଲାଗିଛି। ଗତ ୧୩ ତାରିଖରେ ମେୟର, ଜିଲା ସଭାପତି ଓ ପୂର୍ବତନ ବିଧାୟକ ପଣ୍ଡାଙ୍କ ସହ ନବୀନ ନିବାସରେ ବିଜେଡି ସଭାପତି ଆଲୋଚନା କରିଥିଲେ। ମିଳିମିଶି ରହିବାକୁ କହିଥିଲେ। ତଥାପି କନ୍ଦଳ ତୁଟି ନ ଥିବାରୁ ପୁଣି ଉପରୋକ୍ତ ମର୍ମରେ ପରାମର୍ଶ ଦେଇଛନ୍ତି। ବ୍ରହ୍ମପୁର ଫେରିବା ପରେ କର୍ପୋରେଟରଙ୍କଠାରୁ ଏହି ସୂଚନା ମିଳିଛି। ମେୟରଙ୍କୁ ସମ୍ମାନ ଦେବାକୁ କର୍ପୋରେଟରମାନଙ୍କୁ ନବୀନ ପରାମର୍ଶ ଦେଇଛନ୍ତି।
