ନୂଆଦିଲ୍ଲୀ, ୧୨।୯ : ସୋମବାର, କେରଳରେ କଂଗ୍ରେସର ଭାରତ ଯୋଡ ଯାତ୍ରାର ଦ୍ୱିତୀୟ ଦିନରେ ବହୁ ସଂଖ୍ୟାରେ ଲୋକଙ୍କ ଭିଡ଼ ଜମାହୋଇଛି। ଦଳର ନେତା ରାହୁଲ ଗାନ୍ଧୀ ସକାଳେ ଭେଲାୟାନି ଜଙ୍କଶନରୁ ତାଙ୍କର ପଦଯାତ୍ରା ଆରମ୍ଭ କରିଛନ୍ତି। ଏହି ୧୫୦ ଦିନିଆ ଯାତ୍ରାରେ ଶୃଙ୍ଖଳା ବଜାୟ ରଖିବା ପାଇଁ ଭାରତ ଯାତ୍ରୀଙ୍କ ପାଇଁ ନିର୍ଦ୍ଦେଶାବଳୀ ଜାରି କରାଯାଇଛି। ଯାତ୍ରା ସମୟରେ କ’ଣ କରାଯିବ ଏବଂ କ‘ଣ କରିବା ଉଚିତ ନୁହେଁ ସେବିଷୟରେ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି। ଏଥିରେ ଦର୍ଶାଯାଇଛି ଯେ ଭାରତ ଯୋଡ ଯାତ୍ରାରେ ଅଂଶଗ୍ରହଣ କରୁଥିବା ବ୍ୟକ୍ତିମାନେ କେବଳ ଶାକାହାରୀ ଖାଦ୍ୟ ଖାଇବେ। ଯାତ୍ରା ସମୟ ମଧ୍ୟରେ ଆମିଷ, ମଦ୍ୟପାନ ଏବଂ ଧୂମପାନଠାରୁ ଦୂରରେ ରହିବାକୁ ପଡିବ ।
ଯାତ୍ରୀମାନଙ୍କୁ ସରଳ ଢଙ୍ଗରେ ରହିବାକୁ କୁହାଯାଇଛି। ଯାତ୍ରା ସମୟରେ ଖାଦ୍ୟ, ଶଯ୍ୟା ସୁବିଧା ଏବଂ ଅନ୍ୟାନ୍ୟ ଜିନିଷ ଉପରେ ଅଭିଯୋଗ କରିବା ନିଷେଧ। ଏହା ବ୍ୟତୀତ ଯାତ୍ରା ସମୟରେ କେବଳ ଧଳା ପୋଷାକ ପିନ୍ଧିବାକୁ କୁହାଯାଇଛି। ଏହି ନିୟମ ଭାରତ ଯାତ୍ରୀ ତଥା ରାଜ୍ୟ ଭ୍ରମଣକାରୀ ଏବଂ ଅତିଥି ଭ୍ରମଣକାରୀଙ୍କ ପାଇଁ ପ୍ରଯୁଜ୍ୟ ହେବ। ତେବେ ସ୍ବେଚ୍ଛାସେବୀ ଯାତ୍ରୀମାନଙ୍କୁ ପୋଷାକ ସମ୍ବନ୍ଧରେ ଛାଡ ଦିଆଯାଇଛି। ଯାତ୍ରୀମାନେ ଯାତ୍ରା ସମୟରେ ବିଳାସ, ସୁବିଧା ଏବଂ ବିଶେଷ ଆତିଥ୍ୟ ଆଶା କରିବେ ନାହିଁ ବୋଲି କୁହାଯାଇଛି। ଯାତ୍ରା ସମୟରେ ଲୋକଙ୍କୁ ନମ୍ରତା, ପ୍ରେମ ଏବଂ ଧୈର୍ଯ୍ୟ ସହିତ ସାକ୍ଷାତ କରିବାକୁ ନିର୍ଦ୍ଦେଶ ଜାରି ହୋଇଛି।
ଖାଦ୍ୟ ବ୍ୟବସ୍ଥା ମଧ୍ୟ ଯାତ୍ରୀଙ୍କ ପାଇଁ ଆଗୁଆ ସ୍ଥିର କରାଯାଇଛି। ଏହା ଅନୁଯାୟୀ ଯାତ୍ରୀମାନେ ରହୁଥିବା ରାଜ୍ୟର ସ୍ଥାନୀୟ କମିଟିକୁ ଦାୟିତ୍ୱ ବହନ କରିବାକୁ ପଡ଼ିବ। ଭାରତ ଯାତ୍ରୀମାନଙ୍କ ରହିବା ପାଇଁ କଣ୍ଟେନର ବ୍ୟବସ୍ଥା କରାଯାଇଛି। ଏଥି ସହିତ ଅତିଥି ତଥା ରାଜ୍ୟ ଯାତ୍ରୀମାନଙ୍କ ପାଇଁ ରହିବା ଏବଂ ଖାଦ୍ୟର ବ୍ୟବସ୍ଥା ରାଜ୍ୟ କଂଗ୍ରେସ କମିଟି ଦ୍ୱାରା କରାଯିବ। ଯଦି ଯାତ୍ରା ସମୟରେ ଯାତ୍ରୀ ବିରତି ନେବାକୁ ଚାହାଁନ୍ତି, ତେବେ ଖଟ ଏବଂ ଗାମୁଛା ଉପରେ ବିଶ୍ରାମ ନେବେ। ଦିନର କାର୍ଯ୍ୟକ୍ରମର ମତାମତ ମଧ୍ୟ ସାରେ ନିଆଯିବ।
