ସିଙ୍ଗାପୁର,୨୪।୩ : ସିଙ୍ଗାପୁରରୁ ଏବେ କରୋନା କଟକଣା ହଟିବାକୁ ଯାଉଛି। ଟିକାକରଣ ପରେ ସିଙ୍ଗାପୁର ପ୍ରଶାସନ ନିଷ୍ପତ୍ତି ନେଇଛି ଯେ ଲୋକଙ୍କ ଗତିବିଧି ଉପରେ ଆଉ ପ୍ରତିବନ୍ଧକ ଲଗାଯିବ ନାହିଁ। ଏହା ବ୍ୟତୀତ, ଯଦି କେହି ଟିକାର ସମସ୍ତ ଡୋଜ୍ ନେଇଛନ୍ତି, ତେବେ ତାଙ୍କ ପାଇଁ ମାସ୍କ ପିନ୍ଧିବାର ଆବଶ୍ୟକତା ନାହିଁ।
କରୋନା ମାମଲା ହ୍ରାସ ପରେ ସିଙ୍ଗାପୁରର ପ୍ରଧାନମନ୍ତ୍ରୀ ଲି ହେସିଏନ୍ ଲୋଙ୍ଗ୍ କହିଛନ୍ତି ଯେ ବର୍ତ୍ତମାନ ପାଞ୍ଚ ଜଣଙ୍କ ବଦଳରେ ୧୦ ଜଣ ଲୋକ ଗୋଟିଏ ସ୍ଥାନରେ ଏକାଠି ହୋଇପାରିବେ ଏବଂ ୭୫ ପ୍ରତିଶତ କର୍ମଚାରୀ ଅଫିସକୁ ଯାଇ ପାରିବେ। ଯାତ୍ରୀମାନଙ୍କ ପାଇଁ ପରୀକ୍ଷା ଏବଂ କ୍ୱାରେଣ୍ଟାଇନ କଟକଣାକୁ କୋହଳ କରାଯିବ।
ମାର୍ଚ୍ଚ ୨୯ରୁ କରୋନା ସହ ଜଡିତ ବହୁ ପ୍ରତିବନ୍ଧକ ହଟାଯିବ ବୋଲି ସେ କହିଛନ୍ତି। ବର୍ତ୍ତମାନ ଆମକୁ କରୋନା ସହିତ ବଞ୍ଚିବାକୁ ପଡ଼ିବ ବୋଲି ସେ ଏହା ସ୍ପଷ୍ଟ କରିଛନ୍ତି।
ପର୍ଯ୍ୟଟନ ଶିଳ୍ପକ ସ୍ବାଭାବିକ କରିବା ପାଇଁ ସିଙ୍ଗାପୁର ମାଲେସିଆ, ଥାଇଲାଣ୍ଡ ଏବଂ ଭିଏତନାମ ସହିତ ଟିକାକରଣ ବୃଦ୍ଧି କରିବାକୁ ନିଷ୍ପତ୍ତି ନେଇଛି। ଆବଶ୍ୟକ କ୍ୱାରେଣ୍ଟାଇନ ଏବଂ କୋଭିଡ ପରୀକ୍ଷଣର ନିୟମକୁ ମଧ୍ୟ କୋହଳ କରାଯାଇଛି। ସିଙ୍ଗାପୁର ପ୍ରଶାସନ କହିଛି ଯେ ବାହାରେ ମାସ୍କ ପିନ୍ଧିବା ଜରୁରୀ ନୁହେଁ। ଘର ଭିତରେ ସଂକ୍ରମଣର ଅଧିକ ଆଶଙ୍କା ରହିଥାଏ। ତେଣୁ ଘରେ ମାସ୍କ୍ ପିନ୍ଧିବା ଜରୁରୀ ବୋଲି ପ୍ରଶାସନ କହିଛି।
ଇସ୍ରାଏଲ ପ୍ରଥମେ ନିଜକୁ କରୋନାମୁକ୍ତ ଘୋଷଣା କରିଥିଲା। ଟିକାକରଣ ପରେ ଜନସଂଖ୍ୟାର ୭୦ ପ୍ରତିଶତଙ୍କୁ ଆଉ ମାସ୍କ ପିନ୍ଧିବାର ଆବଶ୍ୟକତା ନାହିଁ ବୋଲି ସରକାର ଘୋଷଣା କରିଥିଲେ। ଏହା ବ୍ୟତୀତ ଭୁଟାନ ପରି ଛୋଟ ଦେଶ ମଧ୍ୟ ମାସ୍କରୁ ମୁକ୍ତି ଘୋଷଣା କରି ସାରିଛି।
