ରାୟଗଡା,୨୩।୭(ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ଗଠନ ହେବାର ୩୨ ବର୍ଷ ବିତିଯାଇଥିଲେ ସୁଦ୍ଧା ଜିଲାର ପାନୀୟ ଜଳ ସମସ୍ୟା ଦୂର ହୋଇପାରିନାହିଁ। ପାନୀୟ ଜଳ ପାଇଁ ବ୍ୟବସ୍ଥା ପାଇଁ ବ୍ଲକ୍ ପ୍ରଶାସନ ନିକଟରେ ଗୁହାରିକରି ବିଫଳ ହେବାପରେ ୩୦ କି.ମି. ଦୂର ଜିଲା ପ୍ରଶାସନକୁ ଭେଟି ଗୁହାରି ଜଣାଇଛନ୍ତି କୋଲନରା ବ୍ଲକ ଅନ୍ତର୍ଗତ ଡିମିରିଗୁଡା ପଞ୍ଚାୟତର ସାନ୍ତାବାଡ଼ିଗାଁ ଗ୍ରାମର ୩୦ରୁ ଊଦ୍ଧର୍ବ ମହିଳା। ସମ୍ପୃକ୍ତ ମହିଳାମାନେ ସୋମବାର ରାୟଗଡାରେ ପହଞ୍ଚି ଅତିରିକ୍ତ ଜିଲାପାଳ ଭାସ୍କର ରୟତଙ୍କ ନିକଟରେ ଅଭିଯୋଗ କରିବା ସହ ଏକ ଦାବିପତ୍ର ପ୍ରଦାନ କରିଛନ୍ତି।
କେବଳ ପାନୀୟ ଜଳ ସମସ୍ୟା ନୁହେଁ, ବରଂ ଗାଁରେ ନଳକୂପ ଅଥବା ଷ୍ଟାଣ୍ଡପୋଷ୍ଟ ଖରାପ ହେଲେ ମରାମତି କରୁଥିବା ବିଭାଗୀୟ କର୍ମଚାରୀ ଜଣକ ପ୍ରଥମେ ପାଉଣା ମାଗୁଛନ୍ତି। ଗାଁର ମହିଳାମାନେ ଜଣକ ପିଛା ୫ରୁ ୧୦ ଟଙ୍କା ଚାନ୍ଦା ଆଦାୟ କରି ପାଉଣା ଦେଲେ ମରାମତି ହେଉଥିବା ସେମାନେ ଅଭିଯୋଗ କରିଥିଲେ। ଅତିରିକ୍ତ ଜିଲାପାଳ ରୟତ ସମ୍ପୃକ୍ତ ବିଡିଓଙ୍କୁ ଫୋନକରି ଏଭଳି କାର୍ଯ୍ୟରୁ ନିବୃତ ରହିବାକୁ ସମ୍ପୃକ୍ତ କର୍ମଚାରୀଙ୍କୁ ନିର୍ଦ୍ଦେଶ ଦେବାକୁ କହିବା ସହିତ ଗାଁରେ କିଭଳି ପାନୀୟ ଜଳ ଯୋଗାଣ ସୁରୁଖୁରୁରେ ହୋଇପାରିବ ସେଥିପାଇଁ କଡା ନିର୍ଦ୍ଦେଶ ଦେଇଛନ୍ତି ।
ମହିଳାଙ୍କ ଅଭିଯୋଗ ଅନୁସାରେ, ସାନ୍ତାବାଡ଼ିଗାଁ ଗ୍ରାମରେ ପ୍ରାୟ ୮୦ରୁ ୯୦ ଘର ରହିଛି। ଗ୍ରାମରେ ୩ଟି ନଳକୂପ ଏବଂ ଗୋଟିଏ ସୋଲାର ଚାଳିତ ପମ୍ପ ରହିଛି। ତେବେ ନଳକୂପ ପ୍ରାୟ ସମୟ ଖରାପ ରହୁଥିବା ବେଳେ ବର୍ଷାଦିନେ ଖରା ଅଭାବ ଯୋଗୁ ସୋଲାର ଚଳିତ ପମ୍ପ କାର୍ଯ୍ୟକ୍ଷମ ହୋଇପାରୁନାହିଁ। ଅନ୍ୟପଟେ ରାଜ୍ୟ ସରକାରଙ୍କ ପକ୍ଷରୁ ଗାଁରେ ପାନୀୟ ଜଳ ବ୍ୟବସ୍ଥା ପାଇଁ ପାଣି ଟାଙ୍କି ଓ ପାଇପ କନେକ୍ସନ ରହିଥିଲେ ମଧ୍ୟ ବିଦ୍ୟୁତ୍ ବ୍ୟବସ୍ଥା ହୋଇ ନ ଥିବାରୁ ଏହା କାର୍ଯ୍ୟକ୍ଷମ ହୋଇପାରିନାହିଁ। ଫଳରେ ହାଣ୍ଡିଏ ପାଣି ପାଇଁ ଡହଳବିକଳ ହେଉଛନ୍ତି ଲୋକେ। ଅନ୍ୟପଟେ ନଳକୂପ ଅଥବା ପାଇପ ଖରାପ ହେଲେ ବିଭାଗୀୟ କର୍ମଚାରୀ ମରାମତି କରିବା ପାଇଁ ଟଙ୍କା ମାଗୁଛନ୍ତି। ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟିିଦେଇ ଏହାର ସମାଧାନ କରିବାକୁ ମହିଳାମାନେ ଦାବି କରିଛନ୍ତି। ତେବେ ଅତିରିକ୍ତ ଜିଲାପାଳ ରଇତ ଏ ନେଇ ବିଡିଓଙ୍କ ସହିତ ଫୋନରେ ଆଲୋଚନା କରି ଶୀଘ୍ର ବିଦ୍ୟୁତ୍ ଯୋଗାଣ ବ୍ୟବସ୍ଥା କରି ଗାଁରେ ପାନୀୟ ଜଳ ଯୋଗାଣ ବ୍ୟବସ୍ଥା ସୁଧାରିବାକୁ ନିର୍ଦ୍ଦେଶ ଦେଇଛନ୍ତି ।
