ନୂଆପଡ଼ା,୩୦।୧୨(ମକାରୁ ବେମାଲ):ନୂଆପଡ଼ା ଜିଲାରେ ଶ୍ରମକାର୍ଡ ଧାରୀଙ୍କ ମୃତ୍ୟୁର ୪ବର୍ଷ ପରେ ମଧ୍ୟ ସହାୟତା ମିଳୁନି। ବିଭାଗୀୟ ଅଧିକାରୀ ଓ କର୍ମଚାରୀମାନଙ୍କ ଅବହେଳା ଯୋଗୁ ଯୋଜନାଗୁଡିକ ଗରିବ ହିତାଧିକାରୀମାନଙ୍କ ପାଖରେ ପହଞ୍ଚତ୍ ପାରୁନାହିଁ। ଜିଲା କାର୍ଯ୍ୟାଳୟରେ ମଧ୍ୟସ୍ଥ ଯୋଗୁ ଯୋଗୁଁ ହିତାଧିକାରୀ ହଇରାଣ ହେଉଛନ୍ତି। ଏହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଜିଲା ଶ୍ରମ ଅଧିକାରୀ କାର୍ଯ୍ୟାଳୟ ଖରିଆର ରୋଡରେ। ଜିଲା ଶ୍ରମ କାର୍ଯ୍ୟାଳୟରେ ମଧ୍ୟସ୍ଥଙ୍କୁ ନ ଧରିଲେ କୌଣସି କାର୍ଯ୍ୟ ହେଉ ନ ଥିବା ହିତାଧିକାରୀମାନେ ଅଭିଯୋଗ କରିଛନ୍ତି। ନୂତନ ଶ୍ରମିକ ପଞ୍ଜିକରଣ, ନବୀକରଣ ହେଉ ବା ଛାତ୍ରବୃତ୍ତି ଶିକ୍ଷା ସହାୟତା, ମୃତ୍ୟୁକାଳୀନ ସହାୟତା, ବିବାହ ସହାୟତା ତଥା ଅନ୍ୟାନ୍ୟ ସହାୟତା ପାଇଁ ମଧ୍ୟସ୍ଥ ନ ହେଲେ କାର୍ଯ୍ୟ ହେଉନାହିଁ।
ପ୍ରାପ୍ତ ସୂଚନା ଅନୁଯାୟୀ ନୂଆପଡ଼ା ଜିଲା କୋମନା ବ୍ଲକ ଅନ୍ତର୍ଗତ ଜଡାମୁଣ୍ଡା ଗାଁର ଶ୍ରମିକକାର୍ଡ ଧାରୀ ରବି ମାଝୀ ୨୦୨୧ ଅକ୍ଟୋବର ୧୮ରେ ମୃତ୍ୟୁବରଣ କରିଛନ୍ତି। ଶ୍ରମିକ କାର୍ଡଧାରୀଙ୍କ ମୃତ୍ୟୁ ହେଲେ ତାଙ୍କର ଉତ୍ତରାଧିକାରୀ ମୃତ୍ୟୁକାଳୀନ ସହାୟତା ପାଇବା ପାଇଁ ହକଦାର। ହେଲେ ଆଜକୁ ୪ବର୍ଷ ବିତି ଯାଇଥିଲେ ମଧ୍ୟ ରବିଙ୍କ ପରିବାର ମୃତ୍ୟୁକାଳୀନ ସହାୟତା ପାଇବାରୁ ବଞ୍ଚିତ ହୋଇଛନ୍ତି। ରବିଙ୍କ ସ୍ତ୍ରୀ ସୁଶିଳା ଓ ଝିଅ ଦୌପଦୀ ଜିଲା ଶ୍ରମ କାର୍ଯ୍ୟାଳୟ ଖରିଆର ରୋଡଙ୍କୁ ଦୌଡି ଦୌଡି ନୟାନ୍ତ ହୋଇ ପଡିଲେଣି। ରବିଙ୍କ ମୃତ୍ୟୁ ହେବା ପରେ ତାଙ୍କ ସ୍ତ୍ରୀ ସୁଶିଳା ମାନସିକ ବିକୃତ ହୋଇ ଯାଇଛନ୍ତି। ସେଥିପାଇଁ ଝିଅ ଦୌପଦୀ ମା’ଙ୍କୁ ସାଙ୍ଗରେ ଧରି ଶ୍ରମ କାର୍ଯ୍ୟାଳୟକୁ ଦୌଡୁଛନ୍ତି। ମୃତ୍ୟୁକାଳୀନ ସହାୟତା ଆଜି ମିଳିବ, କାଲି ମିଳିବ ବୋଲି ଗଡି ୪ ବର୍ଷ ବିତିଯାଇ ସହାୟତା ନ ମିଳିବାରୁ ମା’ଓ ଝିଅ ନିରାଶ ହୋଇ ମାନବ ଅଧିକାର ପରିଷଦ ଜିଲା ସମ୍ପାଦକ ଗୋବିନ୍ଦ ଅହିରଙ୍କୁ ଘଟଣା ସମ୍ପର୍କରେ ଜଣାଇଥିଲେ। ମାନବ ଅଧିକାର ପରିଷଦ ଜିଲା ସମ୍ପାଦକ ଅହିର ଜିଲା ଶ୍ରମ ଅଧିକାରୀ ଜସ୍ନିନ ଶୁଭଦର୍ଶନୀ ସାହୁଙ୍କୁ ଯୋଗାଯୋଗ କରି ସମସ୍ୟା ସମ୍ପର୍କରେ ଆଲୋଚନା କରିଥିଲେ। ଏହା ପରେ ମା’ ଓ ଝିଅ ପରିଷଦ ସମ୍ପାଦକ ଅହିର ସହ ଶ୍ରମ କାର୍ଯ୍ୟାଳୟକୁ ଯାଇ ଶ୍ରମ ନିର୍ଦ୍ଦେଶକ ରବୀନ୍ଦ୍ର ବାର୍ଲାଙ୍କଠାରେ ଅଭିଯୋଗ କରିଥିଲେ। ମୃତ୍ୟୁ ପ୍ରମାଣପତ୍ର ସହ ଅନ୍ୟାନ୍ୟ କାଗଜାତ କାର୍ଯ୍ୟାଳୟରେ ଦାଖଲ ପରେ ମୃତ୍ୟୁକାଳୀନ ସହାୟତା କାର୍ଯ୍ୟ ସଫଳ ହେଲା। ଆଗାମୀ ଦିନରେ ଜିଲା ଶ୍ରମ କାର୍ଯ୍ୟାଳୟରେ ଏଭଳି ଶ୍ରମିକମାନଙ୍କୁ ହଇରାଣ କରାଗଲେ ମାନବ ଅଧିକାର ପରିଷଦରେ ମାମଲା ରୁଜୁ କରାଯିବ ବୋଲି ପରିଷଦ ସମ୍ପାଦକ ଅହିର ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
