ବିଞ୍ଝାରପୁର,୨୯ା୧୧(ଡି.ଏନ.ଏ.): ସରକାର ଜନସାଧାରଣଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ବିପୁଳ ଟଙ୍କା ଖର୍ଚ୍ଚ କରୁଛନ୍ତି। ହେଲେ ଆବଶ୍ୟକ ଡାକ୍ତର ନିଯୁକ୍ତ କରୁ ନ ଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି ବିଞ୍ଝାରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ। ଏଠାରେ ୪ ବିଶେଷଜ୍ଞକଙ୍କ ସ୍ଥାନରେ ରହିଛନ୍ତି ମାତ୍ର ଜଣେ। ସେ ମଧ୍ୟ ସବୁଦିନ କାର୍ଯ୍ୟକ୍ଷେତ୍ରକୁ ଆସୁ ନ ଥିବା ଅଭିଯୋଗ ହୋଇଛି। ସେହିପରି ୧୦ ଏମ୍ବିବିଏସ୍ ଡାକ୍ତରଙ୍କ ସ୍ଥାନରେ ମାତ୍ର ୩ ଜଣ ରହିଛନ୍ତି। ସେମାନଙ୍କ ମଧ୍ୟରୁ ଡାକ୍ତର କ୍ଷୀତିଶ ନାୟକ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଦାୟିତ୍ୱରେ ରହିଛନ୍ତି। ତେଣୁ ସେ ଅଧିକାଂଶ ସମୟ ରୋଗୀସେବା କରି ପାରୁ ନ ଥିବା ଜଣାଯାଇଛି। ଫଳରେ ଉକ୍ତ ୩ ଏମ୍ବିବିଏସ୍ ଡାକ୍ତର, ଜଣେ ଦାନ୍ତ ଡାକ୍ତର ଓ ୨ ଚୁକ୍ତିଭିତ୍ତିକ ଡାକ୍ତରଙ୍କୁ ନେଇ ଚାଲିଛି ଏହି ସାସ୍ଥ୍ୟକେନ୍ଦ୍ର। ଉକ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ବିଞ୍ଝାରପୁର ସମେତ ବରୀ ବ୍ଲକ୍ ଓ କେନ୍ଦ୍ରାପଡ଼ା ଜିଲା ଆଳି ବ୍ଲକର ହଜାରହଜାର ରୋଗୀ ନିର୍ଭର କରୁଛନ୍ତି। ସ୍ବାସ୍ଥ୍ୟକେନ୍ଦ୍ରରେ ଭେଷଜ ବିଶେଷଜ୍ଞ, ସ୍ତ୍ରୀରୋଗ ବିଶେଷଜ୍ଞ, ଶିଶୁରୋଗ ବିଶେଷଜ୍ଞ, ଅସ୍ତ୍ରୋପଚାର ୪ଜଣ ବିଶେଷଜ୍ଞ ପଦବୀ ଥିଲାବେଳେ ମାତ୍ର ଜଣେ ସ୍ତ୍ରୀ ରୋଗ ବିଶେଷଜ୍ଞ ନିଯୁକ୍ତ ଅଛନ୍ତି। ତେବେ ସେ ଯେଉଁଦିନ ସ୍ବାସ୍ଥ୍ୟକେନ୍ଦ୍ରକୁ ଆସନ୍ତି ମାତ୍ର ଘଣ୍ଟେ ୨ ଘଣ୍ଟା ରହି ଫେରିଯାନ୍ତି ଏବଂ ମଙ୍ଗଳପୁରସ୍ଥିତ ଏକ କ୍ଲିନିକରେ ରୋଗୀ ଚିକିତ୍ସା କରନ୍ତି ବୋଲି ସ୍ବାସ୍ଥ୍ୟକେନ୍ଦ୍ରର କେତେଜଣ କର୍ମଚାରୀଙ୍କ ସୂତ୍ରରୁ ସୂଚନା ମିଳିଛି। ଫଳରେ ଏଠାକୁ ରୋଗୀମାନେ ଆସି ଦହଗଞ୍ଜ ହୋଇ ଯାଜପୁର ମୁଖ୍ୟ ଡାକ୍ତରଖାନା କିମ୍ବା ଅନ୍ୟତ୍ର ଯାଉଥିବା ଦେଖାଯାଉଛି। ତେଣୁ ଏଠାରେ ଶୀଘ୍ର ଆବଶ୍ୟକୀୟ ଡାକ୍ତର ପଦବୀ ପୂରଣ କରିବା ପାଇଁ ଦାବି ହୋଇଛି। ଏ ସମ୍ପର୍କରେ ଭାରପ୍ରାପ୍ତ ଚିକିତ୍ସା ଅଧିକାରୀ ନାୟକଙ୍କୁ ପଚାରିବାରୁ ସେ ଅଭିଯୋଗକୁ ଖଣ୍ଡନ କରିବା ସହ ଆବଶ୍ୟକ ଅନୁଯାୟୀ ସ୍ତ୍ରୀ ଓ ପ୍ରସୂତି ରୋଗୀଙ୍କୁ ଅନ୍ୟତ୍ର ପଠାଯାଉଥିବା କହିଛନ୍ତି।
