ପୁରୀ,୨୯ା୭: ପୁଣି ଭକ୍ତଙ୍କ ଭାବାବେଗ ସହିତ ଖେଳ। ଆଡ଼ପ ମଣ୍ଡପକୁ ପହଣ୍ଡି ବେଳେ ବଡ଼ଠାକୁର ଚାରମାଳ ଉପରେ ପଡ଼ିଯିବା ଘଟଣା ଦେଶ ଦୁନିଆର ଅଗଣିତ ଶ୍ରଦ୍ଧାଳୁଙ୍କ ମନରେ କଷ୍ଟ ଦେଇଥିଲା। ଘଟଣାର ତଦନ୍ତ କରାଯାଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ କୁମାର ପାଢ଼ୀ ନିର୍ଦ୍ଦେଶ ଦେଇଥିଲେ।
ଏହି ସ୍ପର୍ଶକାତର ଘଟଣା ସମ୍ପର୍କରେ ନୀଳାଦ୍ରି ବିଜେଠାରୁ ୧୦ ଦିନ ମଧ୍ୟରେ ୩ଜଣିଆ ଟିମ୍ ରିପୋର୍ଟ ପ୍ରଦାନ କରିବାକୁ କୁହାଯାଇଥିଲା। ଅର୍ଥାତ ସୋମବାର ତଦନ୍ତ ରିପୋର୍ଟ ମୁଖ୍ୟ ପ୍ରଶାସକଙ୍କ ନିକଟରେ ପହଞ୍ଚିବା କଥା। କିନ୍ତୁ ବଡ଼ ଦୁଃଖର ବିଷୟ ଏ ପର୍ଯ୍ୟନ୍ତ ୩ଜଣିଆ କମିଟି ଗଠନ ହୋଇପାରିନାହିଁ। କମିଟି ଗଠନ ଲାଗି ପ୍ରକ୍ରିୟା ଜାରି ରହିଛି ବୋଲି କହିଛନ୍ତି ଶ୍ରୀମନ୍ଦିର ଅଧିକାରୀ।
ଅଧିକାରୀ ସୂଚନା ଦେଇଛନ୍ତି, କମିଟି ଗଠନ ଲାଗି ଜିଲାପାଳ ଓ ଏସ୍ପିଙ୍କୁ ଚିଠି କରାଯାଇଛି। ଜିଲାପାଳ, ଜଣେ ଅତିରିକ୍ତ ଜିଲାପାଳ ଓ ଏସ୍ପି, ଜଣେ ଅତିରିକ୍ତ ଏସ୍ପିଙ୍କ ନାମ ସୁପାରିସ କରିବା ପରେ କମିଟି ଗଠନ ହେବ। କମିଟିରେ ଶ୍ରୀମନ୍ଦିର ନୀତି ପ୍ରଶାସକ ରହିବେ। ପୂର୍ଣାଙ୍ଗ କମିଟି ଗଠନ ହେବା ପରେ ତଦନ୍ତ କରାଯାଇ ରିପୋର୍ଟ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ପ୍ରଦାନ କରାଯିବ।
ତେବେ ଆଜି ପର୍ଯ୍ୟନ୍ତ ଠାକୁରଙ୍କ ଘଟଣାର ତଦନ୍ତ ପ୍ରକ୍ରିୟାକୁ ଅନ୍ଧାରରେ ରଖିଛି ପ୍ରଶାସନ। ସବୁଠାରୁ ବଡ଼ କଥା ଅଗଣିତ ଶ୍ରଦ୍ଧାଳୁ ଓ ଓ ଜଗନ୍ନାଥପ୍ରେମୀଙ୍କ ଭାବାବେଗ ସହ ଖେଳା ଯାଉଛି। ଠାକୁରଙ୍କ କୁରଙ୍କ ତଳେ ପଡ଼ିଯିବା ଘଟଣାକୁ ନେଇ ସମସ୍ତଙ୍କ ମନରେ ଉଦ୍ବେଗ ରହିଥିବା ବେଳେ ପ୍ରଶାସନ ଏପର୍ଯ୍ୟନ୍ତ ନିରବ ରହିବା ପ୍ରଶ୍ନବାଚୀ ସୃଷ୍ଟି କରିଛି। ଠାକୁର ପଡିଯିବା ଘଟଣାକୁ ଶ୍ରୀମନ୍ଦିର ପ୍ରଶାସନ ଖାମଖିଆଲ ଭାବେ ନେଉଥିବା ଅଭିଯୋଗ ହେଉଥିବା ବେଳେ ଏହା ଅନେକଙ୍କୁ ବ୍ୟଥିତ କରିଛି। ତେଣୁ କେବେ କମିଟି ଗଠନ ହୋଇ ତଦନ୍ତ ରିପୋର୍ଟ ପ୍ରଦାନ କରୁଛି ତାହା ଉପରେ ସମସ୍ତଙ୍କ ନଜର ରହିଛି।
