ବ୍ରିସବେନ,୯।୧୨: ଆଶେସ ସିରିଜ୍ର ପ୍ରଥମ ଟେଷ୍ଟର ଦ୍ୱିତୀୟ ଦିନ ୧୩ତମ ଓଭରରେ ଅଷ୍ଟ୍ରେଲିଆନ ଓପନର ଡେଭିଡ୍ ଓ୍ବାର୍ନରଙ୍କୁ ଆଉଟ୍ କରିଥିଲେ ଇଂଲଣ୍ଡ ଅଲରାଉଣ୍ଡର ବେନ ଷ୍ଟୋକ୍ସ। ମାତ୍ର ଏହି କ୍ଷେତ୍ରରେ ଫିଲ୍ଡ ଅମ୍ପାୟର ସାହାଯ୍ୟ ମାଗିବା ପରେ ଏହାକୁ ଓଭର ଷ୍ଟେପ ନୋ ବଲ ଦର୍ଶାଇଥିଲେ ଟିଭି ଅମ୍ପାୟର।
ପରେ ପ୍ରସାରଣକାରୀ ଚ୍ୟାନେଲ ସେଭେନ ରିପ୍ଲେରୁ ଜାଣିବାକୁ ପାଇଥିଲା ଯେ, ଷ୍ଟୋକ୍ସ ତାଙ୍କର ପ୍ରଥମ ୫ ଓଭରରେ ୧୪ ଥର ଓଭର ଷ୍ଟେପ କରିଥିଲେ। ଏଥିରୁ ମାତ୍ର ୨ ଥର ନୋ ବଲ ଦର୍ଶାଇଥିଲେ ଫିଲ୍ଡ ଅମ୍ପାୟର। ଏଭଳି ତ୍ରୁଟି ପଛର କାରଣ ଥିଲା, ଖେଳ ଆରମ୍ଭ ହେବା ପୂର୍ବରୁ ପ୍ରତ୍ୟେକ ଥର ବୋଲରଙ୍କ ଫ୍ରଣ୍ଟ ଫୁଟ୍ ଲାଣ୍ଡିଂକୁ ମନିଟର କରୁଥିବା ଟେକ୍ନୋଲୋଜି ଖରାପ ହୋଇଯାଇଥିଲା। ଏଭଳି ପରିସ୍ଥିତି ଯୋଗୁ ଗାବା ଟେଷ୍ଟ ପୁରୁଣା ନିୟମରେ ଖେଳାଯାଉଛି। ଏହି ନିୟମ ଅନୁଯାୟୀ, ବୋଲରଙ୍କୁ ଯେଉଁ ବଲରେ ଉଇକେଟ ମିଳିବ କେବଳ ସେହି ବଲର ଯାଞ୍ଚ କରାଯିବ ତୃତୀୟ ଅମ୍ପାୟର।
ପ୍ରତ୍ୟେକ ବଲରେ ବୋଲରଙ୍କ ଫ୍ରଣ୍ଟ ଫୁଟ୍ ନୋ ବଲ ଯାଞ୍ଚ କରିବା ପାଇଁ ୨୦୧୯ ଡିସେମ୍ବରରେ ଆଇସିସି ପରୀକ୍ଷାମୂଳକ ଭାବେ ଏହି ଟେକ୍ନୋଲୋଜି ବ୍ୟବହାର କରିଥିଲା। ଗତବର୍ଷ ଇଂଲଣ୍ଡ ଓ ପାକିସ୍ତାନ ମଧ୍ୟରେ ଖେଳାଯାଇଥିବା ଟେଷ୍ଟ ମ୍ୟାଚ୍ରୁ ଏହି ଟେକ୍ନୋଲୋଜି ନିୟମିତ ଭାବେ ବ୍ୟବହାର କରାଯାଉଛି।
