ନୂଆଦିଲ୍ଲୀ,୧୭।୮: ନୂଆ ଟିମ୍ ଘୋଷଣା କରିବା ପରେ ଭାଜପା ସଭାପତି ନୀତିନ ନବୀନ ପ୍ରଥମ ଥର ପାଇଁ ପ୍ରତିକ୍ରିୟା ପ୍ରକାଶ କରିଛନ୍ତି। ସଭାପତି ନବନିଯୁକ୍ତ ଭାଜପା କାର୍ଯ୍ୟକର୍ତ୍ତାଙ୍କୁ ଶୁଭେଚ୍ଛା ଜଣାଇଛନ୍ତି।
ଅଭିଜ୍ଞତା ଏବଂ ଉତ୍ସାହରେ ଭରା ନୂଆ ଟିମ ସଂଗଠନକୁ ଆଗକୁ ନେବ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ ମୋଦିଙ୍କ ଦିଗଦର୍ଶନରେ ନୂଆ ଟିମ କାମ କରିବ। ବିକଶିତ ଭାରତ ଓ ଦେଶ ନିର୍ମାଣ ପାଇଁ ସଂଗଠନକୁ ଆହୁରି ମଜଭୂତ କରାଯିବ ବୋଲି ସଭାପତି ମତବ୍ୟକ୍ତି କରିଛନ୍ତି।
ସୋମବାର ଭାଜପାର ନୂଆ ଟିମ୍ ଘୋଷଣା କରାଯାଇଛି। ଏଥିରେ ସ୍ମୃତି ଇରାନୀଙ୍କୁ ସାଧାରଣ ସମ୍ପାଦକ ଏବଂ ବସୁନ୍ଧରା ରାଜେଙ୍କୁ ଉପାଧ୍ୟକ୍ଷ ଭାବେ ନିଯୁକ୍ତ କରାଯାଇଛି।
୧୬ ଜଣ ବରିଷ୍ଠ ନେତାଙ୍କୁ ଉପାଧ୍ୟକ୍ଷ ଦାୟିତ୍ୱ ଦିଆଯାଇଛି। ବସୁନ୍ଧରା ରାଜେ ସିନ୍ଧିଆ, ତିରଥ ସିଂ ରାୱତ, ରାମ ମାଧବ, ବୈଜୟନ୍ତ ‘ଜୟ’ ପଣ୍ଡା, ଡି ପୁରନ୍ଦେଶ୍ୱରୀ, ରେଖା ଭର୍ମା, ଭାରସାବନ ନରେନ୍ଦ୍ରଭାଇ ଦୋଶୀ, ଭାରତୀ ପ୍ରବୀଣ ପାୱାର, ମନପ୍ରୀତ ସିଂ ବାଦଲ, ଲାଲ ସିଂ ଆର୍ଯ୍ୟ, ପ୍ରଫେସର ଏମ ନାଗରାଜ, ପ୍ରଫେସର ତରିକ ମଞ୍ଚଚୋରଙ୍କୁ ବଡ଼ ଦାୟିତ୍ୱ ଦିଆଯାଇଛି।
ବିଏଲ ସନ୍ତୋଷଙ୍କୁ ଜାତୀୟ ସାଧାରଣ ସମ୍ପାଦକ (ସଂଗଠନ) ଭାବେ ନିଯୁକ୍ତ କରାଯାଇଥିବା ବେଳେ ଶିବପ୍ରକାଶ ଏବଂ ସୌଦାନ ସିଂହଙ୍କୁ ଜାତୀୟ ଯୁଗ୍ମ ସାଧାରଣ ସମ୍ପାଦକ (ସଂଗଠନ) ଭାବେ ନିଯୁକ୍ତ ହୋଇଛନ୍ତି। ବିନୋଦ ତାୱଡେ, ସୁନୀଲ ବଂଶଲ, ବିପ୍ଳବ କୁମାର ଦେବ, ସ୍ମୃତି ଇରାନୀ, ସତୀଶ ପୁନିଆ, ଗଜେନ୍ଦ୍ର ପଟେଲ, ହରିଶ ଦ୍ୱିବେଦୀ ଏବଂ ସଞ୍ଜୟ ଭାଟିଆଙ୍କୁ ଜାତୀୟ ସାଧାରଣ ସମ୍ପାଦକ ଭାବରେ ନିଯୁକ୍ତ କରାଯାଇଛି।
ଉପ-ସଭାପତି, ସାଧାରଣ ସମ୍ପାଦକ, ସଚିବ ଏବଂ ମୁଖପାତ୍ରଙ୍କ ତାଲିକା ଯୁବ, ମହିଳା ଏବଂ ଜାତି ସମୀକରଣ ସମ୍ପର୍କରେ ଏକ ସତର୍କ ସନ୍ତୁଳନକୁ ପ୍ରତିଫଳିତ କରେ। ଆସନ୍ତା ବର୍ଷ ପ୍ରାରମ୍ଭରେ ଉତ୍ତର ପ୍ରଦେଶରେ ବିଧାନସଭା ର୍ନିବାଚନ ଅନୁଷ୍ଠିତ ହେବାକୁ ଥିବାରୁ ଭାଜପା ନୂତନ ଦଳରେ ଉତ୍ତର ପ୍ରଦେଶର ଅନେକ ନେତାଙ୍କୁ ସାମିଲ କରିଛି।
