ଓ୍ବାଶିଂଟନ,୨୬।୯: ଆମେରିକାର ରାଷ୍ଟ୍ରପତି ନିର୍ବାଚନରେ ରିପବ୍ଲିକାନ ପାର୍ଟି ପ୍ରାର୍ଥୀ ନିକ୍କି ହେଲି ରାଷ୍ଟ୍ରପତି ଜୋ ବାଇଡେନଙ୍କ ନାଁରେ ଗୁରୁତର ଅଭିଯୋଗ ଆଣିଛନ୍ତି। ସେ ଅଭିଯୋଗ କରିଛନ୍ତି ଯେ, ବାଇଡେନ୍ ଆମେରିକାକୁ କମ୍ୟୁନିଷ୍ଟ ଚାଇନା ଉପରେ ଅଧିକ ନିର୍ଭରଶୀଳ କରିଦେଇଛନ୍ତି। ମୁଁ ସାହସର ସହିତ ଦେଶର ପ୍ରତ୍ୟେକ ଶତ୍ରୁ ସହିତ ଲଢିବି ବୋଲି ନିକ୍କି ଦାବି କରିଛନ୍ତି।
ଓକାଲୋହୋମା ସିଟିରେ ହାମ ଇନଷ୍ଟିଚ୍ୟୁଟ ଫର ଆମେରିକୀୟ ଏନର୍ଜି ଦ୍ୱାରା ଆୟୋଜିତ ଆମେରିକାର ଶକ୍ତି ସୁରକ୍ଷା ସମ୍ମିଳନୀରେ ସେ ଉଦବୋଧନ ଦେଇଥିଲେ। ଏହି ଅବସରରେ ସେ କହିଛନ୍ତି ଯେ, ବାଇଡେନ୍ କମ୍ୟୁନିଷ୍ଟ ଚାଇନା ଉପରେ ଆମେରିକାକୁ ଅଧିକ ନିର୍ଭରଶୀଳ କରିଛନ୍ତି। କରୋନା ମହାମାରୀ ପ୍ରମାଣିତ କରିଛି ଯେ, ଆମେ ଗୁରୁତ୍ୱପୂର୍ଣ୍ଣ ସାମଗ୍ରୀ ପାଇଁ ଶତ୍ରୁକୁ କେବେବି ବିଶ୍ୱାସ କରିବା ଉଚିତ୍ ନୁହେଁ। ଅତ୍ୟାଧୁନିକ ଜ୍ଞାନକୌଶଳ ସୃଷ୍ଟି କରିବା ପାଇଁ ଆମର ସମସ୍ତ ସମ୍ବଳ ଆବଶ୍ୟକ। ପରିବେଶର ସୁରକ୍ଷା ପାଇଁ ଆମକୁ ନିଜକୁ ଗରିବ କରିବା ଆବଶ୍ୟକ ନାହିଁ। ଆମ ଦେଶକୁ ଅଧିକ ପରିଷ୍କାର, ସୁସ୍ଥ ଏବଂ ସୁଖୀ କରିବାର ସର୍ବୋତ୍ତମ ଉପାୟ ହେଉଛି ଅଧିକ ଆମେରିକୀୟ ଶକ୍ତି ବ୍ୟବହାର କରିବା। ଇତିହାସ ପ୍ରମାଣ କରେ ଯେ ଆମେରିକୀୟଙ୍କ ଅପେକ୍ଷା କେହି ଅଧିକ ଦକ୍ଷ ନୁହଁନ୍ତି। ଚାଇନା ଏକମାତ୍ର ଦେଶ ନୁହେଁ ଯାହାକୁ ମୁଁ ଉତ୍ତରଦାୟୀ କରିବି। ଆମ ବିରୋଧରେ ଶକ୍ତି ବ୍ୟବହାର କରୁଥିବା ପ୍ରତ୍ୟେକ ଶତ୍ରୁ ବିପକ୍ଷରେ ମୁଁ ଠିଆ ହେବି।
