ନ୍ୟୁୟର୍କ,୧ା୧୦: ଆମେରିକାର ନ୍ୟୁୟର୍କରେ ଶୁକ୍ରବାରଠାରୁ ପ୍ରବଳ ବର୍ଷା ଲାଗିରହିଥିବାବେଳେ ମେଟ୍ରୋପଲିଟାନ୍ ଅଞ୍ଚଳ ସମ୍ପୂର୍ଣ୍ଣ ଜଳମଗ୍ନ ହୋଇଯାଇଛି। ବିଭିନ୍ନ ରାସ୍ତାରେ ଅଣ୍ଟାଏ ଉଚ୍ଚରେ ପାଣି ଚାଲୁଥିବାରୁ ଯାତାୟାତ ଠପ୍ ହୋଇଯାଇଛି। ରେଳଲାଇନଗୁଡ଼ିକ ମଧ୍ୟ ବର୍ଷପାଣିରେ ବୁଡ଼ିଯାଇଛି। ଅଟ୍ଟାଳିକାଗୁଡ଼ିକର ବେସ୍ମେଣ୍ଟ ବୁଡ଼ିଯାଇଛି। ସହରର ଲାଗୌର୍ଡିଆ ଏୟାରପୋର୍ଟକୁ ଦୀର୍ଘସମୟ ବନ୍ଦ କରିଦିଆଯାଇଥିଲା। ବହୁ ଦଶନ୍ଧି ମଧ୍ୟରେ ଏହା ସହରର ସବୁଠୁ ବର୍ଷଣମୁଖର ଦିନ ବୋଲି କୁହାଯାଉଛି। ଶୁକ୍ରବାର ରାତିରେ ବ୍ରୁକ୍ଲିନ୍ର କେତେକ ଅଞ୍ଚଳରେ ୧୮.୪୧ ସେଣ୍ଟିମିଟରରୁ ଅଧିକ ବର୍ଷା ହୋଇଛି। ଗୋଟିଏ ସ୍ଥାନରେ ଘଣ୍ଟାଏ ମଧ୍ୟରେ ୬ ସେଣ୍ଟିମିଟର ବର୍ଷା ହୋଇଥିବା ପାଣିପାଗ ବିଭାଗ କହିଛି। ଜନ୍ ଏଫ୍. କେନେଡି ଏୟାରପୋର୍ଟରେ ରେକର୍ଡ ୨୧.୯୭ ସେଣ୍ଟିମିଟର ବର୍ଷା ହୋଇଛି। ଏପରିକି ୧୯୬୦ର ବାତ୍ୟା ଡୋନାରେ ମଧ୍ୟ ଏତେ ପରିମାଣରେ ବର୍ଷା ହୋଇ ନ ଥିଲା। ଆହୁରି ବର୍ଷା ହେବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛି।
ହରିକେନ୍ ଇଡାରେ ବର୍ଷା ରେକର୍ଡ ଭାଙ୍ଗିଥିଲା ଏବଂ ନ୍ୟୁୟର୍କ ସହରରେ ଅନୂ୍ୟନ ୧୩ ଜଣ ପ୍ରାଣ ହରାଇଥିଲେ। ଏହାର ଦୁଇବର୍ଷ ପରେ ଶୁକ୍ରବାର ରାତିରେ ହୋଇଥିବା ଲଗାଣ ବର୍ଷାରେ କେହି ମୃତ କିମ୍ବା ଗୁରୁତର ଆହତ ହୋଇଥିବାରୁ ଖବର ମିଳିନାହିଁ। ତେବେ ଏହା ପୁଣିଥରେ ଲୋକଙ୍କ ମନରେ ଇଡା ବାତ୍ୟାର ଭୟ ସୃଷ୍ଟି କରିଛି। ଉଡ୍ସାଇଡ୍ରେ ରହୁଥିବା ଜୟ ଓ୍ବଙ୍ଗ କହିଛନ୍ତି, ବର୍ଷାପାଣିର ଢେଉ ତାଙ୍କ ଘର ସାମ୍ନା କବାଟରେ ମାଡ଼ ହେଉଛି। ଚାରିଆଡ଼େ ସମୁଦ୍ର ଭଳି ହୋଇଯାଇଥିବାରୁ ଘରୁ ବାହାରିବା ବିପଜ୍ଜନକ ହୋଇପଡ଼ିଥିବା ସେ କହିଛନ୍ତି। ଅନେକ ଘରର ବେସ୍ମେଣ୍ଟ ବୁଡ଼ିଥିଲେ ମଧ୍ୟ ସେଠାରୁ ଲୋକମାନଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ଗଭର୍ନର କାଥି ହୋଚୁଲ ଏବଂ ମେୟର ଏରିକ ଆଡାମ୍ସ ଜରୁରୀ ସ୍ଥିତି ଜାରି କରିବା ସହ ଲୋକମାନଙ୍କୁ ଯଥାସମ୍ଭବ ଘରେ ରହିବାକୁ ନିବେଦନ କରିଛନ୍ତି।
