ବ୍ରହ୍ମପୁର,୨୦ା୧୦(ସୁବାସ ଚନ୍ଦ୍ର ପାଢ଼ୀ): ବହୁ ଚର୍ଚ୍ଚିତ ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ନୂଆ ମୋଡ଼। ବ୍ରହ୍ମପୁରର ଜଣେ କର୍ପୋରେଟର ଏହି ହତ୍ୟା ଘଟଣାର ମାଷ୍ଟରମାଇଣ୍ଡ ବୋଲି କୁହାଯାଉଛି। ବିହାରୀ ଯୁବକ ନୁହଁ ବରଂ ଦିଗପହଣ୍ଡି ଥାନା ଇଲାକାର ପିଲା ହିଁ ସୁପାରି ନେଇ ପୀତବାସଙ୍କୁ ଗୁଳି କରିଛନ୍ତି। ଏଥିପାଇଁ ୧୫ ଲକ୍ଷରୁ ଡିଲ୍ ହୋଇଥିଲା ବୋଲି ଶୁଣିବାକୁ ମିଳିଛି। ହେଲେ କର୍ପୋରେଟରଙ୍କ ସଂପୃକ୍ତି ଜଣାପଡ଼ିବା ପରେ ଏହି ହତ୍ୟା ଘଟଣା ରାଜନୈତିକ ଓ ବ୍ୟବସାୟିକ ଶତ୍ରୁତା ଆଡ଼କୁ ଅଙ୍ଗୁଳି ନିର୍ଦ୍ଦେଶ କରୁଛି।
ଗତ ୬ ତାରିଖରେ ରାଜ୍ୟ ଆଇନଜୀବୀ ପରିଷଦ ସଦସ୍ୟ ପୀତବାସଙ୍କୁ ବୈକୁଣ୍ଠନଗର ଛକଠାରେ ୨ ଜଣ ଯୁବକ ଅତି ନିକଟରୁ ଗୁଳିକରି ହତ୍ୟା କରିଥିଲେ। ହତ୍ୟାକାରୀମାନେ ବିହାର ରାଜ୍ୟର ସୁପାରି କିଲର ତଥା ସାର୍ପ ସୁଟର ବୋଲି ପୋଲିସର ପ୍ରାଥମିକ ତଦନ୍ତରୁ ଜଣାପଡିଥିଲା। ସେହିକ୍ରମରେ ପୋଲିସ ବିହାର ସମେତ ଉତ୍ତରାଖଣ୍ଡ, ପଶ୍ଚିମବଙ୍ଗ ଓ ଆନ୍ଧ୍ରପ୍ରଦେଶ ଯାଇ ୫ ଜଣ ଅଭିଯୁକ୍ତଙ୍କୁ ଉଠାଇ ଆଣିଥିଲା। ହେଲେ ତଦନ୍ତ ବେଳେ ସେହି ଯୁବକମାନେ ପୀତବାସଙ୍କୁ ହତ୍ୟା ପାଇଁ ଯୋଜନା କରି ବ୍ରହ୍ମପୁର ଆସିଥିଲେ ମଧ୍ୟ କୌଣସି କାରଣରୁ ଏହି ଡିଲ୍ରୁ ଓହରି ଯାଇଥିଲେ। ଏହାପରେ ହତ୍ୟା ଘଟଣାର ଷଡଯନ୍ତ୍ରକାରୀ ତଥା ମାଷ୍ଟରମାଇଣ୍ଡ୍ ଗଞ୍ଜାମର ୨ ଜଣ ଯୁବକଙ୍କୁ ସୁପାରି ଦେଇ ହତ୍ୟା କରିବାକୁ ରାଜି କରାଇଥିଲେ। ଏହି ପାଇଁ ଉଭୟ ଯୁବକ ୧୫ ଲକ୍ଷ ଟଙ୍କା ନେଇଥିବା କୁହାଯାଉଛି। ତେବେ ପୋଲିସ ବିହାର ଯୁବକ ସମେତ ଅନ୍ୟ ରାଜ୍ୟରୁ ଉଠାଇ ଆଣିଥିବା ଯୁବକଙ୍କୁ ଘନଘନ ଜେରା ବେଳେ ବହୁ ତଥ୍ୟ ହାସଲ କରିଥିଲା। ଜଣେ କର୍ପୋରେଟର ସମେତ ସହରର ଜଣେ ସକ୍ରିୟ ନେତା ଜିଳାର ଅନ୍ୟ ଜଣେ ବ୍ୟବସାୀୟୀଙ୍କ ସହଯୋଗୀ ଜରିଆରେ ବାହାର ରାଜ୍ୟର ଯୁବକଙ୍କୁ ସୁପାରି ଦେଇଥିଲେ । ବାହାର ରାଜ୍ୟର ଏହି ଯୁବକମାନେ ଗତ ସେପ୍ଟେମ୍ବର ମାସରେ ବ୍ରହ୍ମପୁର ଆସିଥିଲେ। ସେହି ସମୟରେ ସେମାନେ ଷଡଯନ୍ତ୍ରକାରୀ ଠାରୁ ୪୦ ହଜାର ଟଙ୍କା ନେଇ ବ୍ରହ୍ମପୁରରେ ଅନେକ ଦିନ ରହିଥିଲେ। ପୀତବାସଙ୍କୁ ପିଛା କରିବା ସହ ତାଙ୍କ ଗତିବିଧି ପରଖିଥିଲେ । ହେଲେ ସେ ଜଣେ ଆଇନଜୀବୀ ହେବା ସହ ଅନେକ ସମୟରେ ଜନଗହଳି ଅଞ୍ଚଳରେ ରହୁଥିବାରୁ ବାହାର ଅଞ୍ଚଳର ଏହି ଯୁବକମାନେ ତାଙ୍କୁ ହତ୍ୟା କରିବାକୁ ପଛଘୁଞ୍ଚା ଦେଇଥିଲେ। ସେହିକ୍ରମରେ ବାହାର ରାଜ୍ୟର ଏହି ଯୁବକମାନେ ବ୍ରହ୍ମପୁର ଛାଡି ଚାଲି ଯାଇଥିଲେ। ଏହାପରେ ଷଡ଼ଯନ୍ତ୍ରକାରୀମାନେ ନୂଆ ହତ୍ୟକାରୀ ଖୋଜିଥିଲେ। ଗଞ୍ଜାମ ଜିଲାର ୨ ଜଣ ଯୁବକ ପୀତବାସଙ୍କୁ ଗୁଳି କରି ହତ୍ୟା କରିବାକୁ ରାଜି ହୋଇଥିଲେ। ସେହିକ୍ରମରେ ଯୋଜନା ମଧ୍ୟ ପ୍ରସ୍ତୁତ ହୋଇଥିଲା। ପୋଲିସ ସଂପୃକ୍ତ କର୍ପୋରେଟର ଓ ନେତାଙ୍କୁ ଅଟକ ରଖି ପଚରାଉଚରା କରୁଥିବା ବିଶେଷସୂତ୍ରରୁ ଜଣାପଡ଼ିଛି। ହେଲେ ପୀତବାସଙ୍କୁ ହତ୍ୟା କରିଥିବା ଯୁବକମାନେ ବର୍ତ୍ତମାନ ପର୍ଯ୍ୟନ୍ତ ଫେରାର ଅଛନ୍ତି।
ସେହିପରି ଏହି ହତ୍ୟାରେ ସଂପୃକ୍ତ ବ୍ୟବସାୟୀଙ୍କ ସହଯୋଗୀ ଜଣଙ୍କ ମଧ୍ୟ ଫେରାର ରହିଛନ୍ତି। ପୋଲିସ ସେମାନଙ୍କୁ କାବୁ କରିବାକୁ ବିଭିନ୍ନ ସ୍ଥାନରେ ଜାଲ ବିଛାଇଛି ଏପଟେ ମାଷ୍ଟରମାଇଣ୍ଡଙ୍କ ବିରୋଧରେ ଅଧିକରୁ ଅଧିକ ପ୍ରମାଣ ଯୋଗାଡ଼ କରାଯାଉଥିବାରୁ ଏହି ହତ୍ୟା ଘଟଣାର ରହସ୍ୟ ଉନ୍ମୋଚନରେ ବିଳମ୍ବ ଘଟୁଥିବା କୁହାଯାଉଛି।