ଛତ୍ରପୁର,୨୪ା୫(ଦିଲ୍ଲୀପ ସାମଲ): ଗଞ୍ଜାମ ଜିଲା ଗୋପାଳପୁର ବନ୍ଦର କର୍ମଚାରୀ ସଂଘର ସୁପରିଚାଳନା ନିମନ୍ତେ ଚଳିତବର୍ଷର ସଭ୍ୟମାନଙ୍କ ନିର୍ବାଚନ ପ୍ରକ୍ରିୟା ରବିବାର କଣମଣାସ୍ଥିତ ବାତ୍ୟା ଆଶ୍ରୟସ୍ଥଳୀଠାରେ ଅନୁଷ୍ଠିତ ହୋଇଯାଇଛି। ଏହି ନିର୍ବାଚନରେ ବିନୋଦ କୁମାର ସାହୁ ୟୁନିୟନର ସଭାପତି ଭାବେ ନିର୍ବାଚିତ ହୋଇଛନ୍ତି। ସେହିପରି ଉପସଭାପତି ଭାବେ ଏସ୍.ଚକ୍ରପାଣି ରେଡ୍ଡୀ ନିର୍ବାଚିତ ହୋଇଛନ୍ତି। ଜି. ଡମ୍ବୁରୁ ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଥିବା ବେଳେ ବି. ହରିବନ୍ଧୁ କାର୍ଯ୍ୟକାରୀ ସମ୍ପାଦକ ଏବଂ ବଟକୃଷ୍ଣ ପାଣିଗ୍ରାହୀଙ୍କୁ ଯୁଗ୍ମସମ୍ପାଦକ ଭାବେ ନିର୍ବାଚିତ କରାଯାଇଛି। ଉପଦେଷ୍ଟା ଭାବେ ନୀଳମାଧବ ବିଶୋୟୀ ଓ ଦୁର୍ଯ୍ୟୋଧନ ନାୟକଙ୍କୁ ଚୟନ କରାଯାଇଛି। ସେହିପରି ବଂଶୀଧର ପଢ଼ିଆରୀ କୋଷଧ୍ୟକ୍ଷ ଭାବେ ଦାୟିତ୍ୱ ତୁଲାଇବେ।
ମହାବୀର ପ୍ରସାଦ ପଟ୍ଟନାୟକ, ରଘୁ ରେଡ୍ଡୀ, ସୋମନାଥ ସାହୁ, ଶରତ ଚନ୍ଦ୍ର ଗୌଡ଼, ଦେବରାଜ ସାହୁ, ଡି. ପାତ୍ର, ଜି. ଗଣପତି, ଖଗେଶ୍ୱର ବେହେରା ଏବଂ ଶେଖ ନୂର୍ ଆଜାଦ କାର୍ଯ୍ୟନିର୍ବାହୀ ସଦସ୍ୟ ଭାବେ କାର୍ଯ୍ୟରତ ରହିବେ। ୟୁନିୟନର ସଦସ୍ୟଙ୍କ କହିବା ଅନୁଯାୟୀ ଏହି ନିର୍ବାଚନ ପ୍ରକ୍ରିୟା ସର୍ବସମ୍ମତିକ୍ରମେ ବିନା କୌଣସି ଚାପରେ ଏକ କାର୍ଯ୍ୟକାରିଣୀ ବୈଠକରେ ନିଷ୍ପତ୍ତି ନିଆଯାଇଛି। ସମସ୍ତେ ବିଶ୍ବାସ ପ୍ରକାଶ କରିଛନ୍ତି ଯେ, ଆଗାମୀ ଦିନରେ ଏହି ନବନିର୍ବାଚିତ ପ୍ରତିନିଧି ଦଳ ପ୍ରତ୍ୟେକ ସମସ୍ୟା ଉପରେ ବିସ୍ତୃତ ଭାବେ ଆଲୋଚନା କରି କର୍ମଚାରୀମାନଙ୍କ ସପକ୍ଷରେ କାର୍ଯ୍ୟ କରିବେ।
