ବଅଁରପାଳ,୩ା୧୨ (ଡି.ଏନ.ଏ.): ଅନୁଗୋଳ ଜିଲା ନାଲ୍କୋର ନୂଆ କାର୍ଯ୍ୟନିର୍ବାହୀ ନିର୍ଦ୍ଦେଶକ (ଇଡି) ଭାବେ ନିଯୁକ୍ତି ପାଇଥିବା ଭୀମସେନ ପ୍ରଧାନ ଶୁକ୍ରବାର ସ୍ମେଲଟର ଓ ପାଓ୍ବାର କମ୍ପ୍ଲେକ୍ସଠାରେ କାର୍ଯ୍ୟଭାର ଗ୍ରହଣ କରିଛନ୍ତି। ଏହି ଅବସରରେ ଏସ୍ ଆଣ୍ଡ ପି କମ୍ପ୍ଲେକ୍ସର କର୍ମଚାରୀଗଣ, ସମସ୍ତ ୟୁନିୟନ ସଦସ୍ୟ, କଣ୍ଟ୍ରାକ୍ଟର ସଂଘ କର୍ମକର୍ତ୍ତା ନୂଆ ଇଡିଙ୍କୁ ସ୍ବାଗତ ଜଣାଇଥିଲେ। ଏହା ପୂର୍ବରୁ ପ୍ରଧାନ ନାଲ୍କୋ ଦାମନଯୋଡିଠାରେ ଜିଜିଏମ୍ ଭାବେ କାର୍ଯ୍ୟରତ ଥିଲେ। ଏନ୍ଆଇଟି ରାଉରକେଲାରୁ କେମିକାଲ ଇଞ୍ଜିନିୟରିଂରେ ସ୍ନାତକ ହାସଲ କରିଥିବା ପ୍ରଧାନ ନାଲ୍କୋରେ ଇଞ୍ଜିନିୟର ଭାବେ ଚାକିରି ଜୀବନ ଆରମ୍ଭ କରିଥିଲେ। ଦୀର୍ଘ ୩୭ ବର୍ଷ ଧରି ସେ ଅନେକ ଗୁରୁତ୍ୱପୂର୍ଣ୍ଣ ବିଭାଗରେ ସଫଳତାର ସହ କାର୍ଯ୍ୟ ସମ୍ପାଦନ କରିଛନ୍ତି। ଭାରତ ସରକାରଙ୍କ ତରଫରୁ ଏକ ଆନ୍ତର୍ଜାତିକ ବ୍ୟବସାୟିକ ବିବାଦର ସମାଧାନ ଦିଗରେ ଗଠନ କରାଯାଇଥିବା ଏକ୍ସପର୍ଟ କମିଟିରେ ସେ ସଦସ୍ୟ ଭାବେ କାର୍ଯ୍ୟ କରିଥିଲେ।
