ଦାରିଙ୍ଗବାଡ଼ି,୨୭ା୧୨(ଅରୁଣ ସାହୁ): ବିଭିନ୍ନ ଦଳରେ ଉଚ୍ଚ ଶିକ୍ଷିତ ଯୁବଗୋଷ୍ଠୀ ରାଜନୀତିକୁ ଆସିବା ଦେଖିବାକୁ ମିଳିଛି। ଏହି କ୍ରମରେ ରାଜ୍ୟ ଓ କେନ୍ଦ୍ରରେ ଶାସନ କରୁଥିବା ଭାଜପା ସରକାରଙ୍କୁ ଅନେକ ଯୁବଗୋଷ୍ଠୀ ପସନ୍ଦ କରୁଥିବା ବେଳେ ପଞ୍ଚାୟତଠାରୁ ଆରମ୍ଭ କରି ବ୍ଲକ ଓ ଜିଲାରେ ଦାୟିତ୍ୱ ଗ୍ରହଣ କରୁଛନ୍ତି। ଏହି କ୍ରମରେ ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ମଧ୍ୟ ଶିକ୍ଷିତ ଯୁବଗୋଷ୍ଠୀ ରାଜନୀତିକୁ ପସନ୍ଦ କରି ବିଭିନ୍ନ ଦାୟିତ୍ୱ ଗ୍ରହଣ କରୁଥିବା ଦେଖିବାକୁ ମିଳିଛି। ଦାରିଙ୍ଗବାଡ଼ିରେ ଭାଜପା ପକ୍ଷରୁ ମଣ୍ଡଳ ସଭାପତି ଭାବେ ମିଟୁ ସାହୁଙ୍କୁ ନିଯୁକ୍ତି ଦିଆଯାଇଥିଲା। ପରବର୍ତ୍ତୀ ସମୟରେ ଅନ୍ୟ କର୍ମକର୍ତ୍ତାଙ୍କ ନାମ ଘୋଷଣା କରିଛି ଭାଜପା ଦଳ।
ପ୍ରକାଶ ଯେ, ମିଟୁ ସାହୁ ମଣ୍ଡଳ ସଭାପତି ଦାୟିତ୍ୱ ନେବା ପରେ ତାଙ୍କ ଦଳରେ ସାଧାରଣ ସମ୍ପାଦକ ଭାବେ ରୁଦ୍ର ମାଧବ ସାହୁଙ୍କୁ ନୂତନ ଦାୟିତ୍ୱ ମିଳିଛି। କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ଏବଂ ଦଳର ଜିଲା ସଭାପତି ପଣ୍ଡିତ ବିଶିମାଝୀଙ୍କ ଅତି ବିଶ୍ୱାସ ଓ ଭରସା ଯୋଗ୍ୟ ବ୍ୟକ୍ତି ହେଉଛନ୍ତି ରୁଦ୍ରମାଧବ। ରୁଦ୍ର ମାଧବ ଛାତ୍ର ଜୀବନରୁ ରାଷ୍ଟ୍ରୀୟ ସ୍ବୟଂ ସେବକ ସଂଘରେ କାର୍ଯ୍ୟରତ ରହିଥିଲେ। ସେ ୨୦୧୩ରୁ ୨୦୧୬ ପର୍ଯ୍ୟନ୍ତ ସ୍ନାତକ ପର୍ଯ୍ୟନ୍ତ ପାଠପଢ଼ା ସହ ସଂଘରେ ସେବକ ଭାବେ ଦାୟିତ୍ୱ ତୁଲାଉଥିଲେ। ପରେ ସେ ୨୦୧୬ ରୁ ୨୦୧୮ ପର୍ଯ୍ୟନ୍ତ ଉତ୍କଳ ୟୁନିଭର୍ସିଟିରେ ମାଷ୍ଟର ଅଫ୍ ସୋସିଆଲ ଓ୍ବର୍କ ଅଧ୍ୟୟନ କରିଥିଲେ। ଏହି ପର୍ଯ୍ୟନ୍ତ ସେ ସ୍ବୟଂ ସେବକ ସଂଘରେ ସେବକ ଭାବେ ରହିଥିବା ବେଳେ ଅନେକ ସାମାଜିକ କାର୍ଯ୍ୟରେ ସେ ନିଜକୁ ଉତ୍ସବର୍ଗୀକୃତ କରିଥିଲେ। ରୁଦ୍ର ମାଧବଙ୍କୁ ଏହି ଦାୟିତ୍ୱ ମିଳିବା ପରେ ସେ କନ୍ଧମାଳ ଏମ୍ପି, ଜିଲା ସଭାପତି ଏବଂ ମଣ୍ଡଳ ସଭାପତିଙ୍କୁ ସାଧୁବାଦ ଜଣାଇବା ସହ ଦାରିଙ୍ଗବାଡ଼ିରେ ଭାଜପା ସଂଗଠନକୁ ଅଧିକା ଶକ୍ତିଶାଳୀ କରିବାକୁ ସେ କାର୍ଯ୍ୟ କରିବେ ବୋଲି କହିଛନ୍ତି।
ପ୍ରକାଶ ଯେ, ରୁଦ୍ରମାଧବଙ୍କ ସମେତ ଏହି ଦାୟିତ୍ୱ ରଞ୍ଜନ କୁମାର ସାହୁଙ୍କୁ ମଧ୍ୟ ଏହି ଦାୟିତ୍ୱ ଜିଲା ସଭାପତି ଓ ମଣ୍ଡଳ ସଭାପତିଙ୍କ ପକ୍ଷରୁ ଦିଆଯାଇଛି। ସେହିପରି ମଣ୍ଡଳ ଉପସଭାପତି ଭାବେ ୬ ଜଣଙ୍କୁ ଓ ସମ୍ପାଦକ ୬ ଜଣ, କୋଷାଧ୍ୟକ୍ଷ ଭାବେ ଜଣଙ୍କୁ ଚୟନ କରି ଦାୟିତ୍ୱ ଦିଆଯାଇଛି। ସେହିପରି ଭାଜପାର ଯୁବମୋର୍ଚ୍ଚା ସଭାପତି ଭାବେ ରୁଦ୍ର ନାରାୟଣ ବେହେରାଙ୍କୁ ଚୟନ କରାଯାଇଥିବା ବେଳେ ମହିଳା ମୋର୍ଚ୍ଚାର ସଭାନେତ୍ରୀ ଟୁନି ମୁଖୀ, କିଷାନ ମୋର୍ଚ୍ଚାର ସୁବଳ ନାୟକ, ଅନୁସୂଚିତ ଜାତି ମୋର୍ଚ୍ଚାର ଲେଙ୍କା ନାୟକ, ଜନଜାତି ମୋର୍ଚ୍ଚାର ଶାନ୍ତନୁ ପ୍ରଧାନ, ଓବିସି ମୋର୍ଚ୍ଚା ର ସୋଭାଗ୍ୟ ସୁବୁଦ୍ଧି, ସଂଖ୍ୟାଲଘୁ ମୋର୍ଚ୍ଚାର ଜିତେନ୍ଦ୍ର ପ୍ରଧାନଙ୍କୁ ଚୟନ କରାଯିବା ସହ ମଣ୍ଡଳ କାର୍ଯ୍ୟକାରୀ ସଦସ୍ୟଙ୍କୁ ମଧ୍ୟ ଚୟନ କରାଯାଇଛି। ଏହି ନୂତନ କର୍ମକର୍ତ୍ତାମାନେ ସମସ୍ତେ ଜିଲା ସଭାପତି ଓ ମଣ୍ଡଳ ସଭାପତିଙ୍କୁ ସାଧୁବାଦ ଜଣାଇଛନ୍ତି।