ଜେରୁଜେଲମ୍,୨୮।୧୦: ଗାଜାରେ ଆମେରିକା ମଧ୍ୟସ୍ଥତାରେ ହୋଇଥିବା ଅସ୍ଥାୟୀ ଅସ୍ତ୍ରବିରତି ଭଙ୍ଗ ହେବାର ଆଶଙ୍କା ଦେଖାଦେଇଛି। ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ମଙ୍ଗଳବାର ସେନାର ମୁଖ୍ୟଙ୍କୁ ଗାଜାରେ ‘ଶକ୍ତିଶାଳୀ ଆକ୍ରମଣ’ ପାଇଁ ନିର୍ଦ୍ଦେଶ ଦେଇଛନ୍ତି। ନେତନ୍ୟାହୁଙ୍କ ଏହି ଘୋଷଣା ଇସ୍ରାଏଲ୍ ଏବଂ ହମାସ୍ ମଧ୍ୟରେ ଉତ୍ତେଜନା ପୁଣି ବଢ଼ାଇଛି।
ଇସ୍ରାଏଲ୍ ଅଧିକାରୀମାନେ କହିଛନ୍ତି ଯେ ଅସ୍ତ୍ରବିରତି ଚୁକ୍ତି ଅନୁଯାୟୀ ହମାସ୍ ତୁରନ୍ତ ସମସ୍ତ ଇସ୍ରାଏଲୀ ମୃତଦେହ ଫେରସ୍ତ କରିବ। କିନ୍ତୁ ହମାସ୍ ଜଣେ ବନ୍ଧକଙ୍କର ଯେଉଁ ଅବଶିଷ୍ଟାଂଶ ଫେରାଇଥିଲା, ତାହାକୁ ଇସ୍ରାଏଲ୍ ‘ଭୁଲ୍ ମୃତଦେହ’ ବୋଲି ଚିହ୍ନଟ କରିଛି। ଏହି କାର୍ଯ୍ୟକୁ ପ୍ରଧାନମନ୍ତ୍ରୀ ନେତନ୍ୟାହୁ “ଅସ୍ତ୍ରବିରତି ଚୁକ୍ତିର ସ୍ପଷ୍ଟ ଉଲ୍ଲଙ୍ଘନ” ବୋଲି କହି ନିନ୍ଦା କରିଛନ୍ତି।
ଇସ୍ରାଏଲ୍ ଅଧିକାରୀଙ୍କ ସୂଚନା ଅନୁଯାୟୀ, ଦକ୍ଷିଣ ଗାଜାରେ ଇସ୍ରାଏଲୀ ସୈନିକଙ୍କ ଉପରକୁ ଗୁଳିମାଡ଼ କରାଯାଇଥିଲା। ରଏଟର୍ସ ରିପୋର୍ଟ ଅନୁସାରେ, ଇସ୍ରାଏଲୀ ସେନା ଅଧିକାରୀମାନେ ମଧ୍ୟ ହମାସ କୁ ନିର୍ଦ୍ଧାରିତ ସ୍ଥାନର ପୂର୍ବ ଦିଗରେ ଇସ୍ରାଏଲୀ ସେନା ଉପରେ ଆକ୍ରମଣ କରି ଅସ୍ତ୍ରବିରତି ଉଲ୍ଲଙ୍ଘନ କରିଥିବା ଅଭିଯୋଗ କରିଛନ୍ତି।
