କଟକ,୨୩ା୧ (କାର୍ତ୍ତିକ ସାହୁ) ମହାନ୍ ସ୍ବାଧୀନତା ସଂଗ୍ରାମୀ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୭ତମ ଜୟନ୍ତୀ ସମାରୋହ ଓଡ଼ିଆବଜାରସ୍ଥିତ ତାଙ୍କ ଜନ୍ମସ୍ଥାନରେ ମଙ୍ଗଳବାର ପାଳିତ ହୋଇଯାଇଛି। ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ, ସଂସ୍କୃତି ଓ ଅବକାରୀ ମନ୍ତ୍ରୀ ଅଶ୍ୱିନୀ କୁମାର ପାତ୍ର ସଂଗ୍ରହାଳୟ ପରିସରରେ ନେତାଜୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଜାତୀୟ ପତାକା ଉତ୍ତୋଳନ କରିଥିଲେ। ଓଡ଼ିଶା ଲଳିତ କଳା ଏକାଡେମୀର ଶିଳ୍ପୀମାନଙ୍କ ଦ୍ୱାରା ନେତାଜୀଙ୍କ ସମ୍ପର୍କିତ ମୃଣ୍ମୟ ଭାସ୍କର୍ଯ୍ୟ ପ୍ରଦର୍ଶନୀକୁ ଅତିଥିମାନେ ପରିଦର୍ଶନ କରିଥିଲେ। ଏହି ଅବସରରେ ଆୟୋଜିତ ସମ୍ବର୍ଦ୍ଧନା ସମାରୋହରେ ଅଂଶଗ୍ରହଣକାରୀ ଭାସ୍କର୍ଯ୍ୟ ଶିଳ୍ପୀମାନଙ୍କୁ ୧୦ ହଜାର ଟଙ୍କାର ଚେକ୍ ସହ ଉତ୍ତରୀୟ ଓ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରାଯାଇଥିଲା। ସିଏମ୍ସି ମେୟର ସୁବାସ ସିଂ, ଜିଲାପାଳ ନରହରି ସେଠୀ, ଓଡ଼ିଆ ଭାଷା, ସାହିତ୍ୟ, ସଂସ୍କୃତି ବିଭାଗର ଯୁଗ୍ମ ସଚିବ ଅତସି ଦାସ, ସ୍ବତନ୍ତ୍ର ଶାସନ ସଚିବ ମଧୁସୂଦନ ଦାସ, ଲଳିତ କଳା ଏକାଡେମୀର ସଚିବ ପଞ୍ଚାନନ ସାମଲ ଅତିଥି ଭାବେ ଯୋଗଦେଇଥିଲେ। ଲଳିତ କଳା ଏକାଡେମୀ ପକ୍ଷରୁ ମୃଣ୍ମୟ ପୁସ୍ତକ ଉନ୍ମୋଚିତ ହୋଇଥିଲା।
ବିଧି ଅନୁଯାୟୀ ଜିଲା ସଂସ୍କୃତି ବିଭାଗ ପକ୍ଷରୁ ନେତାଜୀ ଜନ୍ମସ୍ଥାନ ସଂଗ୍ରହାଳୟର ନେତାଜୀଙ୍କ ଜନ୍ମ ପ୍ରକୋଷ୍ଠରେ ହୋମ ଯଜ୍ଞ, ପୂଜାପାଠ ଦିନ ୧୨ଟା ବେଳେ କରାଯାଇଥିଲା। ଜିଲା ସଂସ୍କୃତି ଅଧିକାରୀ ନଳିନୀକାନ୍ତ ସାହୁ ପୁରୋଧା ଭାବେ ପୂଜାକାର୍ଯ୍ୟ ସମାପନ କରିଥିଲେ। ପରେ ବରଗଡ଼ର ମା’ ସମଲେଶ୍ୱରୀ ଗବେଷଣା କେନ୍ଦ୍ରର ନୃତ୍ୟଶିଳ୍ପୀମାନଙ୍କ ଦ୍ୱାରା ସମ୍ବଲପୁରୀ ନୃତ୍ୟ ଓ ସୌରଭ ନାୟକଙ୍କ ଦେଶାତ୍ମବୋଧକ ସଙ୍ଗୀତ ପରିବେଷଣରେ ସମଗ୍ର ପରିବେଶ ଉଲ୍ଲସିତ ହୋଇଥିଲା। ସଂଗ୍ରହାଳୟର କୋଠା, ଫୁଲବଗିଚା ଅତ୍ୟନ୍ତ ଆକର୍ଷଣୀୟ ଭାବେ ସଜ୍ଜିତ ହୋଇଥିଲା। ବହୁସଂଖ୍ୟକ ବିଦ୍ୟାଳୟ, ମହାବିଦ୍ୟାଳୟର ଛାତ୍ରୀଛାତ୍ର, ବିଭିନ୍ନ ସରକାରୀ, ବେସରକାରୀ ସଂଗଠନର ବ୍ୟକ୍ତି ବିଶେଷଙ୍କ ସମେତ ରାଜନୈତିକ ନେତୃବୃନ୍ଦ ଓ ଜନସାଧାରଣଙ୍କ ସମାଗମରେ ନେତାଜୀ ଜନ୍ମସ୍ଥାନ ତଥା ଜାନକୀ ନାଥ ଭବନ ଉତ୍ସବ ମୁଖରିତ ହୋଇଥିଲା। ନେତାଜୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ସହ ନାନା ଦେଶାତ୍ମବୋଧକ ନାରାରେ ସମ୍ପୂର୍ଣ୍ଣ ପରିବେଶ ପ୍ରକମ୍ପିତ ହୋଇଥିଲା। ପ୍ରତ୍ୟୁଷରେ ଜିଲା ସୂଚନା ଲୋକ ସମ୍ପର୍କ ବିଭାଗ ପକ୍ଷରୁ ଡାକବାଜି ଯନ୍ତ୍ର ଯୋଗେ ରାମଧୁନ ପରିବେଷଣ ସହ ସହରର ବିଭିନ୍ନ ସ୍ଥାନରେ ଅବସ୍ଥିତ ନେତାଜୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା। କଟକ ଏମ୍ପି ଭର୍ତ୍ତୃହରି ମହତାବ ନେତାଜୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପର କରିବା ସହ ବ୍ଲଡ୍ ଡୋନରସ୍ କାଉନସିଲ ପକ୍ଷରୁ ନେତାଜୀ ସେବା ସଦନଠାରେ ଆୟୋଜିତ ସ୍ବେଚ୍ଛାକୃତ ରକ୍ତଦାନ ଶିବିରକୁ ଉଦ୍ଘାଟନ କରିଥିଲେ। କଟକ ବାରବାଟି ବିଧାୟକ ଇଂ. ମହମ୍ମଦ ମୋକିମ, ପ୍ରାକ୍ତନ ବିଧାୟକ ଦେବାଶିଷ ସାମନ୍ତରାୟ, ପ୍ରାକ୍ତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ନେତାଜୀ ଜନ୍ମସ୍ଥାନ ସଂଗ୍ରହାଳୟରେ ନେତାଜୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ।
ଓଡ଼ିଶା ଲଲିତ କଳା ଏକIଡେମୀ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଏବଂ ନେତାଜୀ ଜନ୍ମସ୍ଥାନ ସଂଗ୍ରହାଳୟ ଟ୍ରଷ୍ଟ ଦ୍ୱାରା ନେତାଜୀଙ୍କ ବୀରତ୍ୱ, ଦର୍ଶନ ତଥା ତାଙ୍କ ସଂଗ୍ରାମୀ ଜୀବନର ପ୍ରମୁଖ ଘଟଣାବଳୀକୁ ନେଇ ଆୟୋଜିତ ମୃଣ୍ମୟ ଭାସ୍କର୍ଯ୍ୟ କଳା ଶିବିରରେ ୧୮ ଜଣ ମୃଣ୍ମୟ ଶିଳ୍ପୀ ଅଂଶଗ୍ରହଣ କରିଥିଲେ। କାର୍ଯ୍ୟକାରୀ ସମିତି ସଭ୍ୟ ମହେନ୍ଦ୍ର ପ୍ରସାଦ ମହାପାତ୍ର, ସାଧାରଣ ସମିତି ସଭ୍ୟା ସ୍ମିତା ମୁଳିଆ, ବରିଷ୍ଠ ଶିଳ୍ପୀ ରବି ନାରାୟଣ ରଥ, ନେତାଜୀ ସଂଗ୍ରହାଳୟ ଭାରପ୍ରାପ୍ତ ଅଧିକାରୀ ଜଳେନ୍ଦ୍ର ପ୍ରସାଦ ରାୟ ପ୍ରମୁଖ ଉପସ୍ଥିତ ରହି ଶିଳ୍ପୀଙ୍କୁ ଉତ୍ସାହିତ କରିଥିଲେ।
ନେତାଜୀଙ୍କ ଅଣନାତି ଜଣାଇଲେ ଶ୍ରଦ୍ଧାଞ୍ଜଳି
ନେତାଜୀଙ୍କ ଜୟନ୍ତୀରେ ପ୍ରତିବର୍ଷ ବୋଷ ପରିବାର ସଦସ୍ୟଙ୍କ ଆଗମନ ହୋଇଥାଏ। ଚଳିତ ବର୍ଷ ମଧ୍ୟ ନେତାଜୀଙ୍କ ଦୁଇ ନାତି ସୁପ୍ରିୟା ବୋଷ ଓ ଚିତ୍ତପ୍ରିୟ ବୋଷ ସଂଗ୍ରହାଳୟ ପରିଦର୍ଶନ କରିଛନ୍ତି। ଉଭୟେ ନେତାଜୀଙ୍କ ବଡ଼ ଭାଇ ସତୀଶ ଚନ୍ଦ୍ର ବୋଷଙ୍କ ପୁତ୍ର ଦ୍ୱିଜେନ୍ଦ୍ର ନାଥ ବୋଷଙ୍କ ପୁତ୍ର ବୋଲି କହିଛନ୍ତି। ନେତାଜୀଙ୍କ ଏହି ନାତିଦ୍ୱୟଙ୍କୁ ଦେଖି ପରିଦର୍ଶକମାନେ ମଧ୍ୟ ଉତ୍ସାହିତ ହୋଇଥିଲେ। ସେମାନଙ୍କୁ ଅଭିବାଦନ ଜଣାଇବା ସହ ଉଭୟଙ୍କ ସହ ଫଟୋ ଉଠାଇ ଆନନ୍ଦିତ ହୋଇଥିଲେ।
