ସମ୍ବଲପୁର,୨୧।୪: (ବ୍ୟୁରୋ) ସମ୍ବଲପୁର ନାଗରିକ କଲ୍ୟାଣ ସମିତି ସଦସ୍ୟମାନେ ସମ୍ବଲପୁର ଉତ୍ତରାଞ୍ଚଳ ରାଜସ୍ବ କମିଶନର ଡ. ସୁରେଶ ଚନ୍ଦ୍ର ଦଳେଇଙ୍କୁ ଭେଟି ଦାବି ପତ୍ର ଦେଇଛନ୍ତି। ସମ୍ବଲପୁରରେ ହୋଇଥିବା ହିଂସା ଘଟଣା ପରେ ସହର ଅଶାନ୍ତ ହୋଇପଡିଛି। ନେଟ୍ସେବା ବନ୍ଦ ଯୋଗୁ ବିଶେଷ କରି ଶିକ୍ଷା ନଗରୀ ଭାବେ ପରିଚିତ ସମ୍ବଲପୁରର ଛାତ୍ରୀଛାତ୍ରମାନେ ହଇରାଣ ହେଉଛନ୍ତି। ଏଠାରେ ଆଇଆଇଏମ୍, ମେଡିକାଲ କଲେଜ, ଜିଏମ୍ୟୁ, ଏସ୍ୟୁ ଭଳି ୫ରୁ ଊର୍ଦ୍ଧ୍ୱ ବିଶ୍ୱବିଦ୍ୟାଳୟ ରହିଛି। ଏହା ସହ ଅଗ୍ରଣୀ ଶିକ୍ଷା ଅନୁଷ୍ଠାନ ରହିଛି। ଏସବୁରେ ହଜାର ସଂଖ୍ୟାରେ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ନେଟ୍ ସେବା ବନ୍ଦ ଯୋଗୁ ସେମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଏବେ ପରିସ୍ଥିତି ସ୍ବାଭାବିକ ହେଉଥିବା ମନେ ହେଉଛି । ତେଣୁ ନେଟ୍ସେବା କୋହଳ କରିବା ଦିଗରେ ପଦକ୍ଷେପ ଗ୍ରହଣ କରାଯାଉ। ଏହାସହ ଏହି ଘଟଣାରେ ଯେଉଁମାନଙ୍କ ସମ୍ପୃକ୍ତି ରହିଛି ସେମାନଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ସମିତି ସଦସ୍ୟ ଦାବି କରିଥିଲେ। ଶାନ୍ତି ଫେରାଇ ଆଣିବାରେ ଯାହା ପଦକ୍ଷେପ ଗ୍ରହଣ କରାଯିବ ସେଥିରେ ସମିତି ସହଯୋଗ କରୁଛି ବୋଲି ଆଲୋଚନା କରିଥିଲେ। ସମିତିର ମହେନ୍ଦ୍ର ମିଶ୍ର, ଡାକ୍ତର ସଞ୍ଜୀବ ମିଶ୍ର ପ୍ରମୁଖ ଉପସ୍ଥିତ ଥିଲେ।
