କାଏମା,୨୦ା୫(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଜନହିତକର ଯୋଜନା କାର୍ଯ୍ୟକାରୀ କରୁଛନ୍ତି। ସେଗୁଡ଼ିକ କିପରି ଯୋଗ୍ୟ ହିତାଧିକାରୀଙ୍କ ନିକଟରେ ପହଞ୍ଚତ୍ବ ସେ ଦାୟିତ୍ୱ ପ୍ରଶାସନିକ ଅଧିକାରୀଙ୍କ ଉପରେ ନ୍ୟସ୍ତ କରାଯାଉଛି। ହେଲେ କେତେକ ସ୍ଥାନରେ ପ୍ରଶାସନିକ ଅଧିକାରୀଙ୍କ ଦାୟିତ୍ୱହୀନତା ଯୋଗୁ ବହୁ ବ୍ୟକ୍ତି ଅବହେଳିତ ଅବସ୍ଥାରେ ରହୁଛନ୍ତି। ଏହାର ଏକ ଉଦାହରଣ ଦେଖିବାକୁ ମିଳିଛି ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ଶାଳପତରିଆ ଆଦିବାସୀ ବସ୍ତିରେ। ଏଠାରେ ବାସବାସ କରୁଥିବା ୧୫ରୁ ଅଧିକ ପରିବାର ନାନା ଅସୁବିଧାରେ ରହିଛନ୍ତି। ପ୍ରଶାସନ ପକ୍ଷରୁ ମାତ୍ର ୯ଟି ପରିବାରକୁ ମିଳିଛି ଘରଢ଼ଇ ପଟ୍ଟା। ଏଠାରେ ପାନୀୟ ଜଳଠାରୁ ଆରମ୍ଭ କରି ରାସ୍ତା ବିଦ୍ୟୁତ୍ ଆଦି ଅନେକ ସମସ୍ୟା ରହିଛି। ହେଲେ ସେ ସବୁର ସମାଧାନ ହୋଇ ପାରୁନାହିଁ। ଏହି ପରିବାରଗୁଡ଼ିକ ଜରିପାଲ ଟାଙ୍ଗି ରହୁଥିଲେ ମଧ୍ୟ ଆବାସ ଯୋଜନାରେ ଘର ଖଣ୍ଡିଏ ମିଳିପାରିନାହିଁ। ପାନୀୟ ଜଳ ସମସ୍ୟା କହିଲେ ନସରେ। ଏଠାରେ ୨ ମାସ ହେବ ବସାଯାଇଥିବା ସରକାରୀ ନଳକୂପରୁ ବାହାରୁଛି ଗୋଳିଆ ପାଣି। ସେ ପାଣି ବ୍ୟବହାର ଉପଯୋଗୀ ହୋଇ ପାରୁନାହିଁ। ଅନ୍ୟ ଯେଉଁ ନଳକୂପ ରହିଛି ସେଥିରୁ ଗୋଟିଏ ବାଲ୍ଟି ଫୁଲ୍ ହେବାକୁ ଅନେକ ସମୟ ଲାଗୁଛି। ପାଣି ପାଇଁ ଲୋକେ ଘଣ୍ଟାଘଣ୍ଟା ଧରି ନଳପୂପ ନିକଟରେ ଅପେକ୍ଷା କରି ରହୁଛନ୍ତି। ସବୁ ସମୟରେ ପାଣି ଟୋପେ ପାଇଁ ହନ୍ତସନ୍ତ ହେଉଥିବା ଅଧିବାସୀମାନେ ଅଭିଯୋଗ କଲେ ବି ଶୁଣିବାକୁ କେହିନାହାନ୍ତି। ଝାଟିମାଟି ଘରେ ଛିଣ୍ଡା ଜରିପାଲ ତଳେ ବିତୁଛି ସେମାନଙ୍କ ଜୀବନ। ଆବାସ ତାଲିକାରେ ନାମ ଅନ୍ତର୍ଭୁକ୍ତ ହୋଇ ପାରୁନାହିଁ। ବିଶେଷକରି ସେମାନେ କେଉଁ ପଞ୍ଚାୟତର ତାହାକୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଫଳରେ ୨ ପଞ୍ଚାୟତ ଗଙ୍ଗାଧରପୁର ଓ କୁମାରୀ ପଞ୍ଚାୟତ ପାଇଁ ସମସ୍ୟା ସୃଷ୍ଟି ହୋଇଛି। ସେମାନଙ୍କୁ ଗଙ୍ଗାଧରପୁର ପଞ୍ଚାୟତ ଶାଳପତରିଆ ମୌଜାର ଜମିପଟ୍ଟା ମିଳିଛି। ହେଲେ କୁମାରୀ ପଞ୍ଚାୟତରୁ ରାଶନ ମିଳୁଛି। ଆଧାର କାର୍ଡରେ କୁମାରୀ ପଞ୍ଚାୟତ ଠିକଣା ରହିଛି। କିନ୍ତୁ ସେମାନେ କେଉଁ ପଞ୍ଚାୟତର ତାହା ସ୍ପଷ୍ଟ ହୋଇ ପାରୁନାହିଁ। ଫଳରେ ସେମାନଙ୍କୁ ସରକାରୀ ସହାୟତା ମିଳିବାରେ ସମସ୍ୟା ହେଉଛି।
ସେହିପରି ଶାଳପତରିଆବାସୀଙ୍କ ପାଇଁ ବିଦ୍ୟୁତ୍ ସେବା ଅପହଞ୍ଚ ହୋଇଛି। ବ୍ଲକ କାର୍ଯ୍ୟାଳୟଠାରୁ ଅଳ୍ପ ଦୂର ଜାରକା ବଜାର ଉପକଣ୍ଠରେ ଏହି ଅଞ୍ଚଳ ହୋଇଥିଲେ ବି ବହୁ ଅଣଦେଖା କରାଯାଇଛି। ପଠାପଢ଼ା କ୍ଷେତ୍ରରେ ପିଲା ବହୁ ପଛରେ ରହିଛନ୍ତି। ଗାଁକୁ ରାସ୍ତା ନ ଥିବାରୁ ବର୍ଷା ଦିନେ ଏଠାରେ ନାନା ସମସ୍ୟା ଦେଖା ଦେଇଥାଏ। ଲୋକେ ପାଣି କାଦୁଅରେ ପସି ଯାତାୟାତ କରିଥାନ୍ତି। ତେଣୁ ପ୍ରଶାସନ ଏହି ଆଦିବାସୀମାନଙ୍କ ସମସ୍ୟାର ତୁରନ୍ତ ସମାଧାନ କରିବାକୁ ଦାବି ହୋଇଛି।
ଏ ସମ୍ପର୍କରେ କୁମାରୀ ସରପଞ୍ଚଙ୍କ ପ୍ରତିନିଧି ପ୍ରଭୁରଞ୍ଜନ ସାମଲଙ୍କୁ ପଚାରିବାରେ ସେ କହିଛନ୍ତି, ଶାଳପତରିଆ(ଝାଲସୁଖା) କାହାର ପ୍ରଶାସନ ଧାର୍ଯ୍ୟ କରିବା ଦରକାର। ଏହା ଧାର୍ଯ୍ୟ କରାଗଲେ ସେମାନଙ୍କୁ ସରକାରୀ ସହାୟତା ମିଳିବା ସହଜ ହେବ। ଗଙ୍ଗାଧରପୁର ସରପଞ୍ଚ ତ୍ରିଲୋଚନ ଜେନାଙ୍କୁ ପଚାରିବାରେ ସେ ନକ୍ସା ଦେଖି ଏହି ଅଞ୍ଚଳ ତାଙ୍କ ପଞ୍ଚାୟତ ଅଧୀନରେ ଯାଉନାହିଁ ବୋଲି କହିଛନ୍ତି। ଏ ସମ୍ପର୍କରେ ପ୍ରତିକ୍ରୟା ପାଇଁ ବିଡିଓ ଦେବେନ୍ଦ୍ର ବଳଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରିନାହିଁ।
