ବରଗଡ଼,୩୦।୧(ପ୍ରେମାନନ୍ଦ ଖମାରୀ):କେନ୍ଦୁପତ୍ର କର୍ମଚାରୀ ଓ ତୋଳାଳିଙ୍କ ପ୍ରତି ସରକାର ଅଣଦେଖା ମନୋଭାବ ପୋଷଣ କରୁଥିବା ଅଭିଯୋଗ ହୋଇଛି। ବର୍ଷସାରା କାମ ଯୋଗାଇବା ବଦଳରେ କେବଳ ସାମୟିକ ତଥା ଋତୁକାଳୀନ ଭାବେ ରୋଜଗାର ଦିଆଯାଉଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଫଳରେ ବହୁବିଧ ଅସୁବିଧାର ସମ୍ମୁଖୀନ ହେବାକୁ ପଡୁଛି ବୋଲି ପଶ୍ଚିମ ଓଡ଼ିଶା କେନ୍ଦୁପତ୍ର କର୍ମଚାରୀ ଓ ତୋଳାଳି ସଂଘ ଅଭିଯୋଗ କରିଛି। ଏହି କ୍ରମରେ ବର୍ଷସାରା ସେମାନଙ୍କୁ କାମ ଯୋଗାଇ ଦେବା ଦାବିରେ ଗୁରୁବାର ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ବରଗଡ଼ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି।
ସ୍ମାରକପତ୍ରରେ ଉଲ୍ଲେଖ ରହିଛି, କେନ୍ଦୁପତ୍ର ସେକ୍ଟର ସମେତ ଜଙ୍ଗଲ ସୁରକ୍ଷା ଏବଂ ରାଜ୍ୟର ଅର୍ଥନୀତି ଅଭିବୃଦ୍ଧିରେ କେନ୍ଦୁପତ୍ର କର୍ମଚାରୀ ଏବଂ ତୋଳାଳିମାନଙ୍କ ପ୍ରମୁଖ ଭୂମିକା ରହିଛି। କିନ୍ତୁ କେନ୍ଦୁପତ୍ର କର୍ମଚାରୀ ଏବଂ ତୋଳାଳିଙ୍କୁ ଋତୁକାଳୀନ ଭାବେ ନିୟୋଜନ କରାଯାଉଥିବା ଯୋଗୁ ସେମାନଙ୍କ ଆର୍ଥିକ ସ୍ଥିତି ଭୁଶୁଡ଼ି ପଡୁଛି। ବର୍ଷର ଅର୍ଦ୍ଧାଧିକ ଦିନ ବେରୋଜଗାରକ୍ଷମ ହୋଇପଡୁ ଥିବାବେଳେ ଜୀବନ, ଜୀବିକା ନିର୍ବାହ ତଥା ପରିବାର ଗୁଜୁରାଣ ମେଣ୍ଟାଇବା କାଠିକର ପାଠ ହୋଇପଡୁଛି। ଅନ୍ୟପକ୍ଷେ କେବଳ ଋତୁକାଳୀନ ନୁହେଁ, ବର୍ଷବ୍ୟାପୀ କାମ କରିବା ପାଇଁ କେନ୍ଦୁପତ୍ର କର୍ମଚାରୀ ଏବଂ ତୋଳାଳିମାନେ ଇଚ୍ଛୁକ ଅଛନ୍ତି।
ଏହି ଦୃଷ୍ଟିରୁ କେନ୍ଦୁପତ୍ର କର୍ମଚାରୀ ଏବଂ ତୋଳାଳିମାନଙ୍କୁ କେବଳ ଋତୁକାଳୀନ ଭାବେ ନୁହେଁ, ଜଙ୍ଗଲ ବିଭାଗର ବିଭିନ୍ନ କାର୍ଯ୍ୟରେ ବର୍ଷବ୍ୟାପୀ ନିୟୋଜନ କରିବା ପାଇଁ ସଂଘ ଦାବି କରିଛି। ସେମାନଙ୍କୁ କେନ୍ଦୁପତ୍ର ପ୍ରକ୍ରିୟାକରଣ, ଚାରାରୋପଣ, ଜଙ୍ଗଲ ସୁରକ୍ଷା ଏବଂ ସରକାରଙ୍କ ଦ୍ୱାରା ପ୍ରଣୀତ ଅନ୍ୟକାମରେ ନିୟୋଜନ କରିବାକୁ ଦାବି ହୋଇଛି। ଏହାହେଲେ କୌଣସି କେନ୍ଦୁପତ୍ର କର୍ମଚାରୀ ଓ ତୋଳାଳି କେବେ ବେରୋଜଗାରକ୍ଷମ ହେବେ ନାହିଁ, ବରଂ ରୋଜଗାର ପାଇଁ ସେମାନଙ୍କ ଜୀବନ, ଜୀବିକାରେ ବିକାଶ ଆସିବା ସହିତ ପରିବାର ଗୁଜୁରାଣ ମେଣ୍ଟାଇବା ଲାଘବ ହେବ ବୋଲି ସଂଘ ପକ୍ଷରୁ ସୂଚନା ଦିଆଯାଇଛି। ଫଳରେ ଏହାକୁ ବିଚାରକୁ ନେଇ ବିହିତ ପଦକ୍ଷେପ ନେବା ପାଇଁ କେନ୍ଦୁପତ୍ର କର୍ମଚାରୀ ଓ ତୋଳାଳି ସଂଘ ସ୍ମାରକପତ୍ରରେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛି। ସଂଘର ସଭାପତି ଛବିଳ ମୋହନ ସିଂ ଛିନ୍ଦା ଏବଂ ସମ୍ପାଦକ ସୁରେଶ ମହାନନ୍ଦଙ୍କ ନେତୃତ୍ୱରେ ଅନେକ କେନ୍ଦୁପତ୍ର କର୍ମଚାରୀ ଓ ତୋଳାଳି ସ୍ମାରକପତ୍ର ଦେବା ପାଇଁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
