ନୂଆଦିଲ୍ଲୀ,୧୬ା୭(ପି.ଟି.): ଶୁଣାଣିରେ ସୁବିଧା ପାଇଁ ବିଭିନ୍ନ ହାଇକୋର୍ଟରେ ବିଚାରାଧୀନ ଥିବା ଏନ୍ଇଇଟି-ୟୁଜି ବିବାଦ ମାମଲାଗୁଡ଼ିକୁ ସୁପ୍ରିମକୋର୍ଟକୁ ସ୍ଥାନାନ୍ତର କରିବା ନିମନ୍ତେ ନ୍ୟାଶନାଲ ଟେଷ୍ଟିଂ ଏଜେନ୍ସି (ଏନ୍ଟିଏ) ଆବେଦନ କରିଥିଲା। ଏନେଇ ସର୍ବୋଚ୍ଚ ଅଦାଲତ ସୋମବାର ଘରୋଇ ପକ୍ଷଗୁଡ଼ିକୁ ନୋଟିସ ଜାରି କରିଛନ୍ତି। ଜୁନ୍ ୧୪ରେ ଏନ୍ଟିଏର ଅନୁରୂପ ଆବେଦନ ଉପରେ ଅବକାଶକାଳୀନ ଖଣ୍ଡପୀଠ ମଧ୍ୟ ପକ୍ଷମାନଙ୍କୁ ନୋଟିସ୍ ପଠାଇଥିଲେ। ପ୍ରଶ୍ନପତ୍ର ଲିକ୍, ଅସାଧୁ ଉପାୟ ଅବଲମ୍ବନ ଆଦି ଅନିୟମିତତା ପାଇଁ ମେଡିକାଲ ପ୍ରବେଶିକା ପରୀକ୍ଷା ଏନ୍ଇଇଟି-ୟୁଜି ବାତିଲ କରିବା ପାଇଁ ଅନେକ ପିଟିଶନ ବିଭିନ୍ନ ହାଇକୋର୍ଟରେ ଦାଏର ହୋଇଛି। ଏହି ପରିପ୍ରେକ୍ଷୀରେ ସାନି ପିଟିଶନଗୁଡ଼ିକୁ ମଧ୍ୟ ସର୍ବୋଚ୍ଚ ଅଦାଲତକୁ ସ୍ଥାନାନ୍ତର କରାଯିବାକୁ ସୋମବାର ଏନ୍ଟିଏ ପକ୍ଷରୁ ଆଇନଜୀବୀ ବର୍ଦ୍ଧମାନ କୌଶିକ ଅପିଲ୍ କରିଥିଲେ। ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ୍ ଜେ.ବି. ପର୍ଡିଓ୍ବାଲଙ୍କ ଖଣ୍ଡପୀଠ ଏଥିପାଇଁ ପକ୍ଷଗୁଡ଼ିକୁ ନୋଟିସ ଜାରି କରିବା ସହ ଜୁଲାଇ ୧୮ରେ ସମସ୍ତ ଆବେଦନର ଏକତ୍ର ଶୁଣାଣି କରାଯିବ ବୋଲି କହିଛନ୍ତି। ସିଜେଆଇଙ୍କ କହିବା ଅନୁଯାୟୀ, ସର୍ବୋଚ୍ଚ ଅଦାଲତ ସ୍ଥାନାନ୍ତର ପିଟିଶନ ଉପରେ ନୋଟିସ ଜାରି କରିଥିବାରୁ ହାଇକୋର୍ଟଗୁଡ଼ିକ ଶୁଣାଣିକୁ ଆଗେଇବେ ନାହିଁ। ଏହାକୁ ସମ୍ପୃକ୍ତ ହାଇକୋର୍ଟଗୁଡ଼ିକର ଦୃଷ୍ଟିକୁ ଆଣିବା ପାଇଁ ଖଣ୍ଡପୀଠ ଏନ୍ଟିଏର ଓକିଲଙ୍କୁ କହିଛନ୍ତି।
ସୂଚନାଯୋଗ୍ୟ, ଏନ୍ଇଇଟି-ୟୁଜି ପରୀକ୍ଷା ବାତିଲ ସହ ପୁନର୍ବାର କରାଇବା ପାଇଁ ୩୮ଟି ପିଟିଶନ ସୁପ୍ରିମକୋର୍ଟରେ ଦାଏର ହୋଇଥିଲା। ଜୁଲାଇ ୧୧ରେ ସେଗୁଡ଼ିକର ଶୁଣାଣି ହେବାକୁ ଥିବାବେଳେ ଖଣ୍ଡପୀଠ ଏହାକୁ ଜୁଲାଇ ୧୮କୁ ଘଞ୍ଚାଇଥିଲେ। ଖଣ୍ଡପୀଠ ଇତିମଧ୍ୟରେ ଏନ୍ଇଇଟି ଅନିୟମିତତା ସମ୍ପର୍କିତ ସିବିଆଇ ତଦନ୍ତର ଅଗ୍ରଗତି ସମ୍ପର୍କିତ ଷ୍ଟାଟସ୍ ରିପୋର୍ଟ ପାଇଛନ୍ତି। ଗତ ୧୦ ତାରିଖରେ କେନ୍ଦ୍ର ସରକାର ସର୍ବୋଚ୍ଚ ଅଦାଲତରେ ଏକ ଅତିରିକ୍ତ ସତ୍ୟପାଠ ଦାଖଲ କରିଥିଲେ। ଆଇଆଇଟି ମାଡ୍ରାସ ଦ୍ୱାରା ଏନ୍ଇଇଟି-ୟୁଜି ପରୀକ୍ଷା ଫଳର ସମୀକ୍ଷା କରାଯାଇଥିଲା, ଯେଉଁଥିରେ ବ୍ୟାପକ ଅସାଧୁ ଉପାୟ ଅବଲମ୍ବନ ଏବଂ ଅନ୍ୟାନ୍ୟ ଅନିୟମିତତା ସମ୍ପର୍କିତ କୌଣସି ପ୍ରମାଣ ମିଳିନାହିଁ ବୋଲି କେନ୍ଦ୍ର ଅଦାଲତଙ୍କୁ ଜଣାଇଥିଲା। ମେ’ ୫ରେ ଅନୁଷ୍ଠିତ ଏହି ପରୀକ୍ଷାରେ ବ୍ୟାପକ ଅନିୟମିତତାର ପ୍ରମାଣ ମିଳିଲେ ସାନି ପରୀକ୍ଷା ପାଇଁ ନିର୍ଦ୍ଦେଶ ଦିଆଯାଇପାରିବ ବୋଲି ଜୁଲାଇ ୮ରେ ସରକାର ସୁପ୍ରିମକୋର୍ଟଙ୍କୁ ଜଣାଇଥିଲେ।
