ନୂଆଦିଲ୍ଲୀ, ୭।୯ : ଏବେ ଦିଲ୍ଲୀର ବାସିନ୍ଦାଙ୍କ ପାଇଁ ଆଉ ଏକ ନୂଆ ଉପହାର ଆସିଛି। ଏବେ ରାଷ୍ଟ୍ରପତି ଭବନରୁ ଜାତୀୟ ରାଜଧାନୀ ଦିଲ୍ଲୀର ଇଣ୍ଡିଆ ଗେଟ ପର୍ଯ୍ୟନ୍ତ ରାସ୍ତା କର୍ତ୍ତବ୍ୟ ପଥ ଭାବରେ ପରିଚିତ ହେବ। ବୁଧବାର ଅନୁଷ୍ଠିତ ଏନଡିଏମସିର ଏକ ସ୍ବତନ୍ତ୍ର ବୈ ଠକରେ ଏହାର ନାମ ରାଜପଥରୁ କର୍ତ୍ତବ୍ୟ ପଥକୁ ପରିବର୍ତ୍ତନ କରିବାକୁ ପ୍ରସ୍ତାବ ଦିଆଯାଇଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଏନଡିଏମସି ଅଧିକାରୀମାନେ ପୂର୍ବରୁ କହିଥିଲେ ଯେ ଗୃହ ଓ ନଗର ମନ୍ତ୍ରଣାଳୟ ପକ୍ଷରୁ ଏହି ପ୍ରସ୍ତାବ ଗ୍ରହଣ କରାଯାଇଛି, ଏହା ପରେ ପରିଷଦ ବୈଠକରେ ମଧ୍ୟ ଏହାକୁ ମଞ୍ଜୁର କରାଯାଇଛି।
ଏନଡିଏମସି ଉପାଧ୍ୟକ୍ଷ ସତୀଶ ଉପାଧ୍ୟାୟ ଏହା ମଧ୍ୟ କହିଛନ୍ତି ଯେ ଏନଡିଏମସି ଦ୍ୱାରା ପ୍ରସ୍ତାବ ପାରିତ ହେବା ପରେ ଏ ସମ୍ପର୍କରେ ବିଜ୍ଞପ୍ତି ମଧ୍ୟ ଜାରି କରାଯିବ। ଏହା ମଧ୍ୟ କୁହାଯାଇଛି ଯେ ପ୍ରସ୍ତାବ ସମାପ୍ତ ହେବା ପରେ ନେତାଜୀଙ୍କ ପ୍ରତିମୂର୍ତ୍ତି ଠାରୁ ଆରମ୍ଭ କରି ରାଷ୍ଟ୍ରୀୟ ଭବନ ପର୍ଯ୍ୟନ୍ତ ସମସ୍ତ ଅଞ୍ଚଳ କର୍ତ୍ତବ୍ୟ ପଥ ଭାବରେ ପରିଚିତ ହେବ।
ବ୍ରିଟିଶ ଶାସନ କାଳରେ କିଙ୍ଗସୱେକୁ ରାଜପଥ ଭାବରେ ନାମିତ କରାଯାଇଥିଲା। ଆଜି ଯେଉଁ ରାସ୍ତାରେ ପ୍ରଧାନମନ୍ତ୍ରୀଙ୍କ ବାସଭବନ ରହିଛି ତାହାର ନାମ ରେସ କୋର୍ସ ରୋଡରୁ ୨୦୧୫ ରେ ଲୋକ କଲ୍ୟାଣ ମାର୍ଗ ନାମରେ ନାମିତ ହୋଇଛି। ସେହି ବର୍ଷ, ଔରଙ୍ଗଜେବ ରୋଡର ନାମ ମଧ୍ୟ ଏପିଜେ ଅବଦୁଲ କଲାମ ମାର୍ଗ ଭାବେ ପରିବର୍ତ୍ତନ କରାଯାଇଥିଲା।
