ପାଟନା,୨୫।୧୧: ବିହାର ବିଧାନସଭା ବାଚସ୍ପତି ଭାବେ ଏନ୍ଡିଏର ବିଜୟ ସିହ୍ନା ନିର୍ବାଚିତ ହୋଇଛନ୍ତି। ବୁଧବାର ବାଚସ୍ପତି ନିର୍ବାଚନ ପୂର୍ବରୁ ଆରଜେଡି ସଭାପତି ଲାଲୁ ପ୍ରସାଦ ଯାଦବଙ୍କ ଏକ ଅଡିଓ ଭାଇରାଲ ହେବାରେ ଲାଗିଛି। ଏହି ଅଡିଓରେ ଲାଲୁ ଏନଡିଏର ‘ପାଶୱାନ’ ନାମକ ଜଣେ ବିଧାୟକଙ୍କୁ ଫୋନ କରି ବିରୋଧୀ ପ୍ରାର୍ଥୀଙ୍କୁ ସମର୍ଥନ ଦେବା କଥା କହିଛନ୍ତି। ସୂଚନା ଅନୁଯାୟୀ ‘ପାଶୱାନ’ ନାମକ ବିଧାୟକ ଲାଲୁଙ୍କ ସହ କଥା ହୋଇଛନ୍ତି, ସେ ହେଉଛନ୍ତି ଜେଡିୟୁ ବିଧାୟକ ଲଲନ ପାଶୱାନ। ବାଚସ୍ପତି ନିର୍ବାଚନ ପରେ ଲଲନ ଏକଥା ସ୍ବୀକାର କରିଛନ୍ତି। ସେ କହିଛନ୍ତି ଲାଲୁ ମୋତେ ଫୋନ୍ କରିଥିଲେ। ମୋ ବ୍ୟକ୍ତିଗତ ସଚିନ ଫୋନ୍ ଉଠାଇଥିଲେ। ନିର୍ବାଚନ ଜିତିବା ପରେ ଶୁଭେଚ୍ଛା ଜଣାଇବା ପାଇଁ ସେ ଫୋନ୍ କରିଥାଇପାରିଥାନ୍ତି ଭାବି ତାଙ୍କ ସହ କଥା ହେଲି। କିନ୍ତୁ ସେ ଶୁଭେଚ୍ଛା ଜଣାଇବା ପରିବର୍ତ୍ତେ ଏନଡିଏ ସରକାରକୁ ଭାଙ୍ଗିବା କଥା ମୋତେ କହିଥିଲେ। ଏପରି କଲେ ତୁମକୁ ମନ୍ତ୍ରୀ ପଦ ଦିଆଯିବ ବୋଲି ମଧ୍ୟ କହିଥିଲେ। କିନ୍ତୁ ମୁଁ ଏହା କରିବାକୁ ମନା କରିଦେଇଥିଲି ବୋଲି ସେ କହିଛନ୍ତି। ଆରଜେଡି ଏହି ଅଡିଓ ନକଲି ବୋଲି କହିଛି। ଭାଜପାର ବରିଷ୍ଠ ନେତା ସୁଶୀଲ ମୋଦି ଲାଲୁ ଏନଡିଏ ସରକାରକୁ ହଟାଇବାକୁ ଷଡଯନ୍ତ୍ର କରିଥିବା ଅଭିଯୋଗ କରିଛନ୍ତି।
