ଖୋର୍ଦ୍ଧା,୨୩।୨: (ପ୍ରଭାତ ପାଣିଗ୍ରାହୀ) ଖୋର୍ଦ୍ଧା ଜିଲାରେ ଚାଲିଥିବା ଧାନକିଣାରେ ଚରମ ଅବ୍ୟବସ୍ଥା ନେଇ ପ୍ରତିବାଦ କରିଛି ନବନିର୍ମାଣ କୃଷକ ସଂଗଠନ । ଜିଲାପାଳଙ୍କ କାର୍ଯ୍ୟାଳୟକୁ ଧସେଇ ପଶିଛନ୍ତି । ଜିଲା ପ୍ରଶାସନ, ଯୋଗାଣ, ମିଲର, ଏଆରସିଏସ୍, ସମବାୟ ସମ୍ପାଦକ ଧାନ ବ୍ୟବସାୟୀଙ୍କ ମଧୁଚନ୍ଦ୍ରିକାରେ ମଣ୍ଡି ଚାଲିଥିବା ଅଭିଯୋଗ ଆଣିଛନ୍ତି ।
ଧାନମଣ୍ଡି ଆଳରେ କୋଟି ଟଙ୍କାର ପାଣ୍ଠି ଆଦାୟ କରୁଛନ୍ତି । ଏ ନେଇ ବିଭିନ୍ନ ସମୟରେ ଅଭିଯୋଗ ହେଉଥିଲେ ମଧ୍ୟ କେହି କାର୍ଯ୍ୟାନୁଷ୍ଠାନ ନେଉନାହାନ୍ତି । ଏଭଳି ଅରାଜକତା ଓ ଜଙ୍ଗଲରାଜ ବିରୋଧରେ ଖୋର୍ଦ୍ଧା ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିଛି ନବନିର୍ମାଣ କୃଷକ ସଂଗଠନ ।
ଧାନରେ ଆଦୌ ଆଦ୍ରତା ନଥିବାରୁ ସବୁ ଧାନ ଏଫ୍ଏକ୍ୟୁ ମାନର । ରାଜ୍ୟର କୃଷି ଓ ସମବାୟ ମନ୍ତ୍ରୀ ଧାନ ଖରାପ ହେଲେ ଦେଢ କେଜିରୁ ଦୁଇ କେଜି କାଟ ହୋଇପାରିବ ବୋଲି କହୁଥିଲା ବେଳେ ଖୋର୍ଦ୍ଧା ଜିଲାରେ ୫କେଜି କାଟ କାହିଁକି ହେଉଛି ତାର ଉତ୍ତର ଦାବି କରିଥିଲେ । ଦୁର୍ନୀତିଗ୍ରସ୍ତ ମିଲରଙ୍କୁ ଧାନ କିଣାରୁ ବାଦ ଦିଅ, ଅସାଧୁ ସମବାୟ ସମ୍ପାଦକଙ୍କୁ କାର୍ଯ୍ୟରୁ ଅନ୍ତର କରିବା ପାଇଁ ସ୍ଲୋଗାନ ଦେଇଥିଲେ ନବନିର୍ମାଣ କୃଷକ ସଂଗଠନ ।