ନୂଆପଡ଼ା,୧୪ା୧୧: ଓଡ଼ିଶାରେ ବିଧାନସଭା ନିର୍ବାଚନ ପରାଜୟ ପରେ ପ୍ରଥମ ଉପନିର୍ବାଚନରେ ବିଜେଡି ହାରିବା ଅଭିମୁଖେ ଗତି କରୁଛି। ନୂଆପଡ଼ା ଉପନିର୍ବାଚନରେ ଭାରତୀୟ ଜନତା ପାର୍ଟି (ଭାଜପା) ପ୍ରାର୍ଥୀ ଜୟ ଢୋଲକିଆ ଏକ ବୃହତ୍ ବିଜୟ ଆଡ଼କୁ ଅଗ୍ରସର ହେଉଛନ୍ତି, ଯାହା ପରେ ଦଳ ଶିବିରରେ ଉତ୍ସାହ ଦେଖାଦେଇଛି।
ଭୋଟ୍ ଗଣତିର ୧୨ ରାଉଣ୍ଡ୍ ସୁଦ୍ଧା ଜୟ ଢ଼ୋଲକିଆ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀଙ୍କ ଠାରୁ ବହୁ ଆଗରେ ଅଛନ୍ତି।
ଭୋଟ୍ ସଂଖ୍ୟା:
ଜୟ ଢ଼ୋଲକିଆ (ବିଜେପି): ୫୯,୩୬୬ ଭୋଟ୍
ସ୍ନେହାଙ୍ଗିନୀ ଛୁରିଆ (ବିଜେଡି): ୧୯,୦୫୩ ଭୋଟ୍
ଘାସିରାମ ମାଝୀ (କଂଗ୍ରେସ): ୧୭,୪୩୭ ଭୋଟ୍
ନିର୍ବାଚନ ପୂର୍ବରୁ ନବୀନ ପଟ୍ଟନାୟକ ପ୍ରଚାର କରିବା ସହିତ ଦଳ ଏହାର ଅନେକ ବଡ଼ ଛାମୁଆ ନେତାଙ୍କୁ ଦାୟିତ୍ୱ ଦେଇଥିଲେ ମଧ୍ୟ ବିଜେଡି ନୈରାଶ୍ୟଜନକ ପ୍ରଦର୍ଶନ କରିଛି।ବିଧାନସଭା ନିର୍ବାଚନରେ ଭାଜପାର ବିପୁଳ ବିଜୟ ପରେ ପୁଣି ଥରେ ଉପନିର୍ବାଚନରେ ଦଳର ଏହି ଅଗ୍ରଣୀ ଓଡ଼ିଶା ରାଜନୀତିରେ ଦଳର କ୍ରମବର୍ଦ୍ଧିଷ୍ଣୁ ଶକ୍ତିକୁ ଦର୍ଶାଉଛି।
ବିଧାୟକ ରାଜେନ୍ଦ୍ର ଢ଼ୋଲକିଆ (ଜୟ ଢ଼ୋଲକିଆଙ୍କ ବାପା)ଙ୍କ ଦେହାନ୍ତ ପରେ ଏହି ଆସନ ଖାଲି ପଡ଼ିଥିଲା। ନଭେମ୍ବର ୧୧ରେ ହୋଇଥିବା ଏହି ଉପନିର୍ବାଚନରେ ୧୪ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଥିଲେ। ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ଏହି ଉପନିର୍ବାଚନରେ ରେକର୍ଡ ୮୩.୪୫% ମତଦାନ ହୋଇଥିଲା।
