କାବୁଲ,୨୬ା୧୨: ଆଇପିଏଲ୍ ୨୦୨୪ ପୂର୍ବରୁ ଦଳଗୁଡ଼ିକ ଲାଗି ଏକ ଚିନ୍ତାଜନକ ଖବର ସାମ୍ନାକୁ ଆସିଛି। ଆଫଗାନିସ୍ତାନର ୩ ଖେଳାଳି ମୁଜିବ୍ ଉର ରେହମାନ, ନବୀନ ଉଲ୍ ହକ୍ ଓ ଫଜଲ୍ହକ୍ ଫାରୁକିଙ୍କୁ ଆଫଗାନିସ୍ତାନ କ୍ରିକେଟ ବୋର୍ଡ(ଏସିବି) ପକ୍ଷରୁ ନୋ ଅବ୍ଜେକ୍ସନ ସାର୍ଟିଫିକେଟ ପ୍ରଦାନ କରାଯିବାକୁ ମନା କରାଯାଇଛି। ଏହି ୩ ଖେଳାଳି ଜାତୀୟ ଦଳ ପାଇଁ ନ ଖେଳି ବିଭିନ୍ନ ଫ୍ରାଞ୍ଚାଇଜ କ୍ରିକେଟ ଖେଳିବାକୁ ପ୍ରାଧାନ୍ୟ ଦେଇଥିବା ବେଳେ ଏସିବି ଏଭଳି ନିଷ୍ପତ୍ତି ନେଇଛି। ଖେଳାଳି ମାନେ ଏସିବିର ସେଣ୍ଟ୍ରାଲ କଣ୍ଟ୍ରାକ୍ଟକୁ ପ୍ରତ୍ୟାଖ୍ୟାନ କରିଥିଲେ। ଫଳରେ ଜାତୀୟ କ୍ରିକେଟର ହିତକୁ ଆଖି ଆଗରେ ରଖି ଏହି ୩ ଖେଳାଳିଙ୍କୁ ଆଗାମୀ ଦୁଇ ବର୍ଷ ଯାଏ ବିଦେଶୀ ଲିଗ୍ରେ ଖେଳିବାକୁ ଅନୁମତି ନ ଦେବା ଲାଗି ଏସିବି ନିଷ୍ପତ୍ତି ନେଇଛି। ଫଳରେ ଆସନ୍ତା ଆଇପିଏଲ୍ରେ ଏହି ୩ ଖେଳାଳିଙ୍କ ଅଂଶଗ୍ରହଣ କରିବାକୁ ନେଇ ଆଶଙ୍କା ଲାଗି ରହିଛି। ତେବେ ମୁଜିବ୍ଙ୍କୁ ୨ କୋଟି ଟଙ୍କାରେ କୋଲକାତା ନାଇଟ୍ ରାଇଡର୍ସ କିଣିଥିବା ବେଳେ ନବୀନ ଓ ଫାରୁକିଙ୍କୁ ଯଥାକ୍ରମେ ଲକ୍ଷ୍ନୌ ସୁପର ଜାଏଣ୍ଟ୍ସ ଓ ସନରାଇଜର୍ସ ହାଇଦ୍ରାବାଦ ରିଟେନ୍ କରିଥିଲା।
